香港人真係好鍾意「打邊爐」，無論天氣去到30幾度都好，最多開「行」冷氣機，照樣淥一餐！
就算閣下幾鍾意打邊爐都好，都希望食物種類多、質數好、湯底正，如果加埋環境佳、服務貼心就更加無得輸啦！
大埔雖然係舊舖，但食店新舊林立，有不少仲係卧虎藏龍之輩，而今次就介紹一間湯底超正既火鍋店「豐生水起」。
其實食材好，都要處理得宜先有用，而「豐生水起」的主理人，正是曾獲米芝蓮一星榮譽的陳國強師傅。
雖然餐廳位於大埔，其實係太和火車站行過去都不過是十分鐘左右腳程，若果是有車人士仲方便，因為門前是露天咪錶位，非常方便。
餐前先調教自己專屬醬油，很欣賞店方為了確保衛生，以自家機器作獨立包裝，又真係好少見。
既然目標是火鍋，當然要先點湯底吧！
經朋友大力推薦，先來黃湯鴛鴦花膠雞鍋（$268/小，$398/大），內裡放滿了花膠及魚肚，加上三黃雞、老雞、上肉及金華火腿熬足十多個小時，根本就是煲翅的方法，呷一口， 嘴唇竟然有黏口的感覺，骨膠原都跑到湯裡去，鮮甜到一個點，
花膠及魚肚滋補養顏，對女士尤其好功效，喝多兩杯毫無難度。
花膠及魚肚滋補養顏，對女士尤其好功效，喝多兩杯毫無難度。
即場仲有新鮮清遠雞加持，大火滾五分鐘後轉細火，雞肉保持嫩滑而且雞味濃郁，這個火鍋湯底可說是無出其右。
杏汁燉白肺湯鍋（$238）
另一個湯底同樣不得了，先將豬肺、瘦肉及雞腳燉足四小時，上檯時再加入杏汁，乳白色的湯底散發陣陣杏仁香氣，豬肺燉至軟腍，雞腳的骨膠原亦通通跑到湯裡去，比起坊間名店毫不遜色，超正。
肉類
選擇當然多，只簡單的選了幾款。
新鮮本地手切牛頸脊（$248/小，$368/大）
個人最喜歡的部位，牛花平均而肉味濃郁，又有嚼口，必食。
新鮮本地手切牛邊抓（$268）
問我係乜？又真係搔爆頭，翻看資料，原來牛邊抓是在肋骨位，屬於包圍腩位的肌肉，色澤比較深，脂肪較多，吃起來特別富油香。
豐生豚肉盛（$238）
當中已包含了日本鹿兒島豬腩片、西班牙黑毛豬海頭肉片及西班牙黑毛豬肋條。
對於戒食牛肉的朋友，又多了一個選擇。
如果喜好油香的，個人推介豬腩片，至少無須淥太耐嘛！
海鮮
極品海鮮盛（$308/兩人份，$688/4人份，$988/6人份）
配料好豐富，有龍躉片、肉蟹、鮑魚、海蝦、扇貝及蟶子，全部都係新鮮貨，食材好已經贏在起跑線上。
丸類
八福臨門鮮打丸盛（$98）
心多的朋友，鮮打丸盛未嘗不是一個上好的選擇，8款丸是鮮蝦丸、墨魚丸、鮮牛丸、豚肉丸、鮮雞丸、羊肉丸、潮州魚丸及鯪魚丸，至少試完先考慮追加邊一款。
餃子
仗著人多，先後試了北京餃子（$68）、韭菜餃（$68）、京蔥牛肉餃（$68）及小籠包（$68），可以各適其適，自己就比較喜歡小籠包，咬落滿是肉汁，比起傳統食法，又是另一番滋味。
豆品組合盛（$68）
已經有齊豆卜、響鈴及腐竹，真係人多好辦事。
若果對火鍋沒興趣，「豐山水起」的小菜亦有上佳的表現，絕不會令人失望。
紫菜墨片頭（$78）及黃金炸魚皮（$68）
兩道都是佐酒菜，炸得好香口而不會過火，當然，黃金魚皮會比較邪惡，但偶爾一次無妨吖。
陳廚羊肉串（$38）
真係要食得辣先好點，羊肉的羶香不算澎湃，但辣勁卻是不得了，大前題係先來一杯啤酒保底。
火焰砵酒焗桶蠔（$188）
用錫紙包裹去焗，上菜時澆上砵酒再點火，空氣中瀰漫了酒香，桶蠔大大隻又香口，送啤酒一流。
拔絲脆皮菠蘿咕嚕肉（$148）
又是一道處理得相當有水準的菜色。
咕嚕肉裹上一層薄薄的脆漿，就算掛滿了醬汁，咬落依然脆口，甜酸度的拿捏亦夠平均，用上新鮮菠蘿更見誠意，不過個人就不太喜歡灑上芝麻，以及用開邊菠蘿作盛具，簡簡單單已經好足夠。
生炒臘味糯米飯（$138）
炒得夠乾身有嚼勁，醬油緊緊包裹了每顆飯粒，又有臘味的油香，正如一句「我好飽，但無話食唔落喎」！
甜品
椰汁燉雪燕（$38/位）
餐後再來一碗homemade中式甜品，清甜可口，今次的確大滿足。
地址
: 大埔翠和里5號麗和閣地下F號舖
電話 : 2728 0668
味道 :
4 環境 : 3
服務 : 4 衛生 : 4 抵食 : 4 位置 : 3
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!
