Date archives: February 23, 2023

 經過一星期辛勤工作，weekend梗係想瞓多陣，起身懶懶閒，最好就早餐夾埋lunch一齊食，今次就介紹一個性價比高又好食既 Saturday Brunch。 位於尖沙咀海景嘉福酒店，除了中菜廳海景軒出名外，旁邊的意大利餐廳Theo Mistral，同樣有出色表現。 餐廳設計簡潔，略帶昏黃的燈光，令人有種謐靜安寧的氛圍，真係好啱同另一半食飯聊天。 整個周末Brunch都只不過$468/位，若想盡情暢飲，餐廳提供了三款無限暢飲，包括Italian Peroni Beer （HK198）、Aperol Spritz （HK$158）(Aperol, Prosecco)以及Theo’s Homemade Italian Lemonade （HK$68），悉隨專便。 意式頭盤 自家製麵包配橄欖油及陳年黑醋、意大利橄欖、巴馬芝士餐前送上的蕃茄包及香草包最好趁仲有餘溫時食，過後會變硬便影響口感。 另外有意大利橄欖及巴馬芝士，同行朋友喜歡另點白酒佐芝士，我就喜歡用蜂蜜，總之是各有所好。 意式拼盤-巴馬火腿、風乾牛肉、豬後頸肉、燒火腿露筍卷、蕃茄蒜香多士、水牛芝士餐廳會按人頭計送上頭盤，巴馬火腿配水牛芝士最常見，但質素好；個人更喜歡火腿露筍卷的油香夾爽口，更加令人吃不停口反而係伴碟的烤蕃茄，酸酸地令人好開胃。 黑松露水牛芝士配意大利蕃茄、火箭菜、陳年黑醋放上黑松露的水牛芝士，更是頭盤的亮點，新鮮的芝士，一剖開便散發濃郁的香氣，軟綿的口感，伴以蕃茄片，又是美味滿分。 地中海八爪魚沙律配西蘭花、脆包粒、脆蒜片、阿瑪爾菲檸檬汁自少就喜歡食八爪魚，尤其是大大片有嚼勁更好，地中海美食是近年健康食法，西蘭花啱心意，加入蒜片好香口，澆上新鮮檸檬汁帶來酸度，不錯。 主菜（任選一款） 薄餅配蕃茄醬、水牛芝士、羅勒、巴馬火腿、巴馬芝士、蕃茄及火箭菜很傳統的風味，薄餅批底好香口，邊位微焦而不過火，火喉拿捏得相當準，享用時當然要用手拎起大口咬落去，享受那朕脆香感覺。 慢煮鴨肉雲吞配豬背油、巴馬芝士、羊肚菌汁意大利雲吞是名物，加入豬背油更是幽香，餡料的鴨肉鬆軟入味，雲吞皮沾上羊肚菌汁份外惹味，但要注意一點，雲吞只得4粒，所以超過4位就要同人分享啊！ 或 慢煮和牛闊扁麵配蕃茄及意大利紅酒汁、露絲瑪利香草、巴馬芝士和牛的油香，令闊扁麵味道更香，有紅酒汁的加持，多了少許酒香，可以的話真想完全佔有一碟。 或 波士頓龍蝦、魚子醬、幼扁麵配意大利蕃茄、香蒜、辣椒（另加$60）新鮮龍蝦加魚子醬，夠矜貴了吧？幼扁麵完美地把醬汁掛上，混和了魚子醬及龍蝦肉，食味更佳。 或慢煮龍蝦汁燴海鮮配虎蝦、爐魚、帶子、青口、海蜆、薯仔（另加$90）根本係法國南部馬賽海鮮湯 Bouillabaisse，材料豐富到一個點，有齊大虎蝦、爐魚柳、帶子粒、藍青口以及海蜆，湯底更是濃稠的龍蝦汁，每口都是海鮮的精華，另加$90，都覺得值回票價。 或 麵包糠烤澳洲羊鞍配黑松露薯蓉、大蒜苗、甘筍、西蘭花（另加$120）其實Theo Mistral既羊鞍真係好正，烤至肉質嫣紅，有嚼口而鬆軟，羊肉味不會太羶，但骨膜位又好豐富油香，份量足足有四大條，置底有薯蓉，伴碟菜蔬又多，雖然要加錢，但好滿足。 甜品甜品總共有四款，包括了自家製Amalfi檸檬撻（Signature Amalfi Lemon Tart）、自家製無麩質軟身朱古力蛋糕（Gluten Free Son Chocolate Cake）、自家製淡芝士蛋糕（Ricotta & Sultanas Cheese Cake）以及自家製香草意式奶凍（Homemade Vanilla Pannacotta）。 檸檬撻絕對是店方名物，甜酸度拿捏得相當好，清新怡人的檸檬香氣份外誘人；朱古力蛋糕口感豐腴，又係必食。 其實餐廳平日同星期天一樣有Semi-Buffet，質素同樣高，值得一試。…

 每次去權八都要老遠地跑過海，但今年開始就方便得多了，除了原先的銅鑼灣店搬往新地址外，九龍區方面，亦在尖沙咀北京道一號開設九龍旗艦店，地點就在原先胡同的舊址。 地方是寬敞得多，而且靠窗的落地玻璃，維港夜景盡入眼簾。 唯一要挑剔的，是欠了塌塌米房，未免有點美中不足。 有美景當然要同太太飲返杯，再欣賞優美的維港景色，誠意推薦以Rum酒、紅莓及草莓調製的Sakura-Berry Daiquiri（$108）及以新鮮菠蘿汁調製的Japanese Cassis Pineapple（$108）。 餐前小食是［酸汁伴牛筋］（$68），牛筋炆得好軟稔，牛筋的膠質豐富，真係好啱我，而且帶微酸，減輕了油膩的感覺，相當討好。 再來是［宮崎豚肉胡麻沙律］（$168），豚肉片夠薄食，咬落不太費勁，拌和蒜片、生菜、松子、紅椒絲及胡麻醬，非常惹味。 其實餐牌有太多菜色好吸引，下酒菜又點可以忽略［炸鮮蟹肉餅］（$138）炸得啱啱好，蟹肉鮮甜，仲有一條日本青椒，正好用來解膩。 跟太太分別點了［海鮮茶碗蒸］（$68）以及［海膽茶碗蒸］（$98），兩者本身餡料已經有蝦仁、冬菇及蟹肉，海膽茶碗蒸是加添了一份海膽，但可能加熱後的海膽失去了神韻，似乎簡單的海鮮茶碗蒸是更勝一籌。 太太最鍾意食刺身，作為寵妻號當然照顧有加，時令的［特上刺身拼盤(7種)］（$768），包括了牡丹蝦、金目鱲、拖羅、油甘魚腩、帶子、劍魚腩以及深海池魚，全部都是新鮮貨，當中肉質柔軟的帶子以及金目鱲是最得我心。 至於另一款近日大熱菜色［極上三色卷］（$438），賣相都好澎湃，碎吞拿魚腩海膽三文魚籽堆成小山丘似的，一夾起，三文魚籽便滾落，一口吃下，鮮味盡現。 串燒一向係權八強項，尤其是［燒芝士］（$58），更是必食，烤得外層焦香，芝士味突出，不錯。 意猶未盡，追加了［梅紫蘇雞肩］（$58）、［雞腎］（$48）及［蔥鹽牛舌］（$78），同樣是燒得啱啱好，有焦香而沒有過火的焦位，有水準。 其實權八除了串燒，天婦羅都不錯，［權八特上天婦羅併盤］（$288）已包括秋葵、蟹鉗、車海老及紫蘇葉，看看置底的吸油紙沒多餘的油份，相當對辦。 而［權八汁燒免治雞肉軟骨棒宮崎蛋］（$78）不單有嚼口及juicy，沾上蛋漿口感更是豐腴。 早排天氣都熱，來一客［權八手打冷蕎麥麵］（$118）就啱啱好滿足埋我既澱粉質意慾，更何況蕎麥麵係自家製，誠意十足。 吃日本菜，總不能沒有壽司，［Omakase Sushi］已有齊海膽、醬油帶子、左口魚邊、赤身及最特別的拖羅加赤身。 太太知我鍾意食海膽，特意留比我，真體貼。 而太太就對左口魚邊情有獨鍾，喜歡魚香豐富，總之是各有所好。 想一餐飯完美，甜品作壓軸是理所當然吧！店方名物［甜品拼盤］（$138）不作他選，拼盤已包括了椰汁南瓜白玉子、一口大福、紅豆布甸及士多啤梨，當中尤其是椰汁南瓜白玉子最得我心，軟糯的口感，配以甜美的南瓜汁，實在太美妙了。 集團專頁 : 1957 & Co.   Facebook專頁 : Gonpachi   地址 : 尖沙咀北京道一號28樓   電話 : 2727 1957   味道 : 4  環境 : 4  服務 :…

 新年期間，除了拜年忙到甩轆之外，難得兩個仔都無“欄街”，一家四口係屋企打麻雀增進感情，嘻嘻哈哈又一日，就連食評都放埋一邊。 家陣返工既返工，返學既返學，又係時候同大家分享下之前的體驗。 早排近年尾，同一班好友齊齊係Marco Polo Hong Kong 內的 Savvy 食團年飯。 Savvy外觀似酒吧，尤其是近門口處的吧檯更是打卡位，但內裡是別有天地，空間大得離奇，當你以為係食 Fine Dining 時，其實佢係食東南亞菜，係咪好有趣呢？ 餐前先來杯好意頭的［Golden Ball］，好香芒果味，又鮮甜，我好鍾意。 新春好意頭，祝大家都撈得風生水起，［三文魚撈起］有三文魚片、海帶、甘筍絲、薄脆、花生、青瓜、彩椒及花生，色彩繽紛，開動前澆上日式芝麻醬，然後大家齊齊夾起配料，仲要越高越好，象徵一級更勝一級，加埋祝福語句，好玩又開心。 前菜的拼盤相當豐富，當中包括了雞肉及牛肉沙嗲串、酥炸軟殼蟹配越式咖喱及蒜茸包、泰式海蝦柚子沙律及馬來西亞Rojak沙律，充滿了南亞風情，如果有埋越式春卷式粉包就更加合我心意。 既然係團年飯，鮑參翅肚走不了，原砂鍋上的［佛跳牆］海參、花膠、鮑魚、髮菜、元貝、蠔豉、娃娃菜及蘿蔔，諗得到的海味都差不多到齊，豐富到一個點。 所謂［無雞不成宴］，或者大家都好難想像係一間睇落似西餐廳，可以食到［霸王雞］。 畢竟係酒店，雞是新鮮貨，食落肉嫩味香，尤其是連埋薑蔥絲一齊食，更是美味，最好真係加碗白飯。 去完中國又飛去印度，因為有［印式秘製咖喱拼盤］，用上彎月形餐具擺碟，有齊咖喱雞、烤雞、咖喱雜菜、印度脆餅、咖喱蝦及印度飯，中間係naan bread 配 mint sauce，任意配搭，悉隨專便。 轉頭又去了泰國，來一個店方名物的「虹吸」［泰式大頭蝦冬蔭功］，一個虹吸咖啡器，上層是南薑、檸檬葉、香茅及青檸，下層是熬煮過的湯底，利用火槍的熱力，把湯底逼上上層，吸收了香料的味道後徐徐下降，充滿了玩味的感覺，非常獨特，蝦肉又夠鮮甜，正。 再來的主食是［烤羊扒配迷迭香汁］，羊扒烤至medium rare，肉色透著嫣紅色，羶味不太重，咬落軟稔有嚼口，好啱自己。 單尾是［泰式炒金邊粉］，放上一片煎得金黃的雞蛋皮，內裡的金邊粉，炒得夠乾身，不錯。 甜品車好幾款上次都食過，但差不多一年前的事了，首選當然係 Mont Blanc，豐富的栗子蓉比預期中更滑溜，味道香甜，個人最鍾意。 另一款是 Signature Blueberry Cheese Cake，用上了澳洲芝士，味道濃郁，外層圍上白朱古力，再放上新鮮藍莓，正好起了平衡的作用。 至於賣相最好的，就一定係 Oops，餡料是香梨果粒、芒果及熱情果，酸酸地好開胃。 而最重口味就一定係 Chocolate Truffle Cake，70度的Dark Chocolate啱我口味，truffle的香氣不會太濃烈，啱啱好。 跟朋友開開心心的度過一個晚上，雖然新年已過，仍衷心祝大家全年健健康康，飲和食德！ 酒店專頁 : Prince Hotel, Marco…

 聽過［積勞成疾］未？ 自己工作了幾十年，右手已經有多年［網球手］，病發時，右手痛到不能提起，連“扭”毛巾都有問題，經專科轉介睇物理治療，都只可以每星期覆診一次，都幾花時間。 有網友知我右手經常痛楚，便介紹了 ELEEELS S2   熱石按摩棒。 據知 ELEEELS S2 屬最新型號，不單集功能與科技於一身，而且使用時更方便，在家中就可以輕輕鬆鬆享受按摩樂趣。 ELEEELS S2 採用人手打磨天然砭石，分有平頭及尖頭，用於身體不同部位，而且只有1.5KG重，手棒上有4段熱力供選擇（包括45°C/50°C/55°C及60°C），只須用Type C充電，叉滿一次可用足3小時，又真係幾方便好用喎。 原來熱石棒能提供7大用途，當中包括了熱敷、日式指壓、輕敲、錘擊、打圈、壓刮及平推。 雖然見到有人示範，但當然親身體驗最好。 即場有Sense of Touch 水療中心專業按摩師，用ELEEELS S2熱石棒按壓痛楚部位，由於砭石有遠紅外線功能，可以幫助血液循環及舒緩痛楚，仲有3000多次超聲波脈衝疏通經絡，更有熱力加持，筋膜位的確鬆動了不少，至於背脊同後腰，就要勞煩太太出手，不過都好吖，可以互相幫忙，增進感情。 話時話，下星期就係［情人節］，大家有無諗過買返部送比另一半？實際得黎又幫到對方，確係Win Win。   P.S : ELEEELS S2 熱石按摩套裝，包括： 1 支平頭熱石按摩棒 1 支尖頭熱石按摩棒 1 支芳療按摩油   而首批推出的 ELEEELS S2，更特別聯乘屢穫殊榮的 Sense of Touch 水療中心免費額外贈送紅外線桑拿乙次(價錢$600)及全身按摩護理療程7折體驗優惠，是情人節最佳禮物。 ELEEELS S2 熱石按摩棒套裝 HK$1399 於各大零售商有售 官網 https://zh.eleeels.com/ 以上內容純屬個人分享，如想有更詳盡資料，請與該品牌查詢。   希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!  …

 闊別3年，就連回鄉卡都擺到過期，想北上，更換有效證件是首要的事吧！ 作為首日復通關，人流不多，手續亦跟以往一樣，只是時間都花在填寫申報表上。 其他站頭我不知，但上水站裡裡外外都放有告示版同QR Code，方便大家即時下載，仲會有職員教大家入資料。 而QR Code主要分為微信版同網絡版，建議大家選用微信版，同埋預早少少題表，因為當呈交資料後，同即時彈出“黑碼”，大家可以Cap圖，方便出入境用，而且關口有Wifi，無須怕上唔到網，加上用微信版，下次出入無須再將所有資料重新填多次。 走過熟悉的通道，原先一出關口就可以落地鐵站，但今天將入口推前大約一百米左右。 畢竟係第一日復通關，兩地邊防都派出大量人手，深圳方面更加有公安同特警係附近駐防，亦預留大量地方予人排隊。早幾年前張“深圳通”竟然仲有錢可以用，但地鐵線已經開到十幾條線，真是四通以達。 可能好多人的電話卡已經過期，所以今日辦理開卡的店舖都人頭湧湧。 只不過昔日人來人往的羅湖商業城就相對顯得冷清。 今次特意走訪了好受香港人歡迎既東門。 步行街人流比以前的確少近半，而出口亦有改動，原有的購物中心出口卻變了死場。 至於最多人去既美食街，亦有不少攤檔已經消失，但好彩仲見到有炸“蟲蟲”，唔知邊個敢食呢？反而美甲同足浴小店開始見到有生機，間間都有港人客。 但對於香港人可能有點不習慣，因為通街都係“電”單車左穿右插，人少少都仲可以，遇上假日人多時真係要小心，仲有好多人都無戴口罩，粗略估計，點都有一兩成人，不過自己已經習慣了戴口罩，所以影響不大。但好可惜附近的布藝城因要重建，家陣已變成白地，有部份店舖就遷往對面商場。去完東門，順道走去KK Mall 睇睇，可能係閒日關係，就算是中午遊人不多，但餐廳就幾好生意。 近日好多網友都問到“水療中心”有無開，當日留低不少腳毛既［瑪雅城］，亦已經一片滄涼破落，至於福田附近幾間，稍後會再跟進。至於返香港，大家無須行長樓梯，因為地下近出口處有條電梯上二樓，可沿左邊通道進入出入境大樓。 縱觀羅湖管制站出入都方便，訪客熟習流程後相信會更暢順，只不過車廂由12卡變成9卡，鐵路沿線居民出入只會越來越逼。 希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!   http://www.facebook.com/foodiephilip

 尖沙咀棉登徑真係好地方，因為實在有太多餐廳，除了拉麵、火鍋、西餐廳，仲有日式燒鳥店，之前都曾經去過木戶，但坐吧檯就真係第一次，可以睇住來自宮崎縣的日籍總廚木村潤一郎徒手燒鰻魚，充滿視覺效果。 是晚餐廳推薦了三款清酒，經同行兩位酒徒認證後，選擇了中間保留原有風味的生原酒。 率先以［木戶自家製蟹味噌］（$138）挑起大家的食慾，配以青瓜條、甘筍條、露筍及西芹條，色彩繽紛，沾上蟹味噌的蔬菜條，份外覺得惹味。 再來是個人好鍾意的［厚燒牛舌］（$88），屬每次食串燒必點之物，尤其是選用中間肉質最嫩的部位，找不到挑剔的地方，肉香味濃，咬一口，呷一啖清酒，回味無窮。 終於到了主角出場，店方選用日本奈良出產的大和妃子雞，而且放養了120日，品質有保證，嫩滑之餘，雞味更是一絕，雖然是否世一我不知，但係香港都算數一數二。 第一口［大和雞雞腿肉］（$45）質地飽滿有肉汁，外層些少焦香，好味。 隨後的［大和雞雞頸肉］（$42）同樣精彩，一條雞頸有幾多肉心知肚明，要撕開再串起去燒，更加花心機，但效果出奇地好，尤其是燒到恰到好處，又有油香，其實飲返杯啤酒仲啱。 當然，必點有［大和雞雞腎］（$42），咬落爽彈帶咸香，正。 正所謂由頭食到落尾，只要拋開心理壓力，［大和雞雞尾］（$42）絕對是一味上佳的佐酒菜。 想多點不同口味，建議試試［韮菜芝士豚肉卷］（$43），半溶芝士與韮菜的味道毫無違和感，豚肉軟熟而有嚼口，不錯。 至於冠上［總廚木村先生家族秘傳宮崎南蠻炸雞1956年］（$188）名號的菜色，彷彿鑿上［正宗］兩字實在令人期待。 雞肉炸得香口而不過火，配上醬汁更是惹味到一個點，風味絕佳。 同樣係雞頸肉，但［宮崎式雞頸肉炭火鐵板燒伴柚子胡椒醬］（$248）又是另一種滋味，以熊熊烈火把外層燒至香口，內裡是緊鎖肉汁，配以柚子胡椒醬來平衡油膩的口感，拿捏得相當好。 臨時想起有［宮崎式雞冠炭火鐵板燒］，當然不會錯過，講真，每隻雞只得一個雞冠，要儲起一碟貨都不容易。 雞冠燒得焦香，尤其是咬落帶爽脆的感覺，好特別。 相信是晚亮點，一定係［總廚特別限定極上日本鰻魚爐燒］（$388），原條日本直送，由於已經預先處理好，即場拆封放上火炙加熱，方便快捷，再以炭爐奉客，視覺效果一流，而且鰻魚肉質細嫩，偶有碎骨亦問題不大。 同行友人見鄰坐有人點［炸雞翼］，口水流之下就來一份，大廚選用秋田縣出產比內地雞，又係認真而且有保證之作，炸得色澤金黃，香脆可口，果然沒令人失望。 另一款炸物係［炸廣島蠔］（$65），大大隻又juicy。 食食下，突然友人想起店方有［自家製雞肉丸配黃金蛋］（$43），好彩即場仲有貨，用雞肉丸蘸點了日本蛋漿，外層滿有蛋香，而內裡有嚼口，超正。 總係喜歡以澱粉質作單尾，就以［櫻花蝦櫻花飯糰］ （$48）及［日式醬油燒飯糰］（$38）來壓軸。 畢竟棉登徑出入方便，加上食物有質素，難怪整晚都人流不絕。 地址 : 尖沙咀棉登徑8號地下G12-13號舖   電話 : 21046855   味道 : 4  環境 : 3  服務 : 4  衛生 : 4  抵食 : 4  位置 : 5   希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!…