原先想係虎年第一篇講下開心事，但疫情下所謂低處未算低，12/6/4 變成 4/2，同多兩個friend食餐飯隨時竹蒿灣見，唉！
反正6點後食飯免問，造就了Early Dinner的出現，又或者下午茶食得豐富些少。
近日九龍酒店龍逸軒推出以中式點心主打的「精緻點心下午茶」，兩個人食可以，一位更加無問題，相當靈活。
供應時間為下午3點45分至5點45分，原價是$294.8，如果經 eshop 訂位，可享8折優惠，算起來不過是$241.2/位，計落都化算。
下午茶共有14款食物，已經包埋茶芥加一，仲要有鮑魚燒賣、蝦多士、蝦餃，單尾仲要係鮑汁撈麵，加埋4款甜品，莫講話女士胃口細，就連自己食完都覺飽，因為可以外賣，或者可以考慮做晚餐。
餐廳家陣有C同D區，而且酒店衛生條件會較好，坐位間寬敞，食落都安心。
前菜
分別是鎮江肴肉及涼拌海蜇，都是常見的小食，肴肉味道及質感恰如其分，海蜇亦清爽彈牙。
蒸點
最有回本氛圍當然係原隻鮑魚燒賣，鮑魚絕非手指公大小，食落柔韌滿有彈性，豬肉鬆軟富肉香，好味。
而晶瑩鮮蝦餃的餃皮通透，看得到蝦肉色，摺紋清晰分明，口感清爽，有水準。
同行朋友C君最欣賞的香茜素魚翅餃，雖然未夠飽滿，但荽茜的香氣不俗。
煎炸
炸物中竟然有沙律醬蝦多士，上次 a la carte 時炸得啱啱好，而今次就稍微過了火，不過食落都仲好香脆可口。
至於XO醬蘿蔔糕，煎得工整，個人貪心一點，XO醬可以下得更重手。
金勾鹹水角反而炸得幾好，口感煙韌。
香煎牛肉包就要趁熱食，煎得微焦幾香口，而且好似上海生煎包的感覺。
麵點
單尾是鮑魚汁寬條麵，原版本是預先撈好，但個人覺得醬汁另上，任由客人調教醬汁份量效果會更好。
好開心麵條的鹼水味輕盈，拌起鮑魚汁好惹味，滿足。
甜品
甜品都有4款，包括燕麥香芒卷、流沙奶皇煎堆、懷舊芝麻卷以及冰花雪耳燉萬壽果。
其實太太幾鍾意香芒卷，軟糯而香甜，芝麻卷無須多講，是童年回憶。
可惜煎堆未夠流心，但都做到外層脆香的感覺。
而冰花雪耳都幾大碗，相信是原本份量上，絕無將價就貨，呷一口，清潤甜美，好啱近日天氣。
講真，200幾蚊已經可以充當晚飯，就算無時間堂食，外賣都係一個不錯的做法。
Facebook專頁 : The Kowloon Hotel
優惠傳送門 : 精緻點心下午茶
地址
: 尖沙咀彌敦道19-21號九龍酒店2樓
電話 : 27343722
味道 : 4 環境 : 5 服務 : 5 衛生 : 5 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!