月份: 2021 年 1 月

鮮淮山雜菌素糕~素食者的賀年糕點 @ 奇華餅家

 


仲有不足一個月就到新年，今年更加令人體會「年關難過年年過」，但希望在明天，係新一年大家都要身體健康呀!


每年都有新攪作的「奇華餅家」，雖然在疫情下依然沒有放軟手腳，推出了「鮮淮山雜菌素糕」（$112），正好對準了素食者的心癮，至少沒有混入臘腸及臘肉，吃得夠健康。

糕底以鮮淮山，不單加入粒顆分明的南瓜，更有陣陣幽香的羊肚菌、乾草菇及雜菌，令口感更複雜及層次分明，煎得微焦後蘸點辣椒醬，再加杯香濃普洱，用作早餐或下午茶真是一流享受。

新年當然是有年糕招呼親友，尤其是無得出街飲茶，有人拜年可以煎幾件「薑汁黑糖年糕」（$102），慢慢食同吹水，而且有薑汁的辛香，吃起來不會太膩。

至於擺放全盒或者送禮，又有好多選擇。

「 賀年熊貓糖盒禮盒」（ 一盒四罐）（$160）

薑味花生軟糖、南棗合桃糕、黑糖杏仁脆糖及芝麻花生軟糖，每款各八件，如果不想一口氣購買多款，亦可單個選購，每款$40，悉隨尊便。

另外，更可以「 換購賀年熊貓玻璃密封瓶」。

凡購買任何產品滿港幣$50，即可加港幣$25換購賀年熊貓玻璃密封瓶乙個，
若然閣下是「奇華Fans」換購價是$22。

而「精裝雜錦蛋卷」（$75）內含牛油、椰蓉、黑芝麻、海苔、咖啡及薑汁口味各一包，又係下午茶同宵夜的良伴。

其實仲有好多不同配搭及產品，尤其是傳統風味小食，更是多元化，總有一款啱妳心意。

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip

今天星閃閃 @ 大班樓 ( 中環 )

 

選擇今天發文，正是米芝蓮派成績表的日子，而我深信大班樓是實力份子，每年默默耕耘多年，創製出不少令人驚嘆的菜色，努力是應該得到回報的，在疫情的壓力下，仍可以榮獲一星殊榮，就更值得鼓掌。

身邊的朋友都知我係「大班樓」粉絲，每年總要攪好幾次飯局，最誇張係試過一個月內食了三次，仲要係除了主打菜色外，其他菜色會因應自攜佳釀的配搭而改動。


上年在疫情下，「大班樓」亦難以倖免於難，疫中求變，在中午時段推出了相當抵食的套餐。

中午時段光顧倒是初次，有陽光透入的感覺更柔和舒適，就算是疫情下，依然是客滿，畢竟飯總要食，難得有折扣，只要時間許可，慢慢食都不錯！

二人精選套餐

August Seasonal Menu For Two Persons


子薑

Pickled Young Ginger

餐前送上自家製子薑，每年都是限量製作，沽清便算，所以有得食就不要錯過。

子薑口感清新爽脆，少許辛香與及甜酸味道，更加挑起了食慾。


凍滷水花椒小吊桶

Cold Soya Szechuan Pepper Marinated Baby

兩隻小巧的吊桶，滷得好入味，凍食更能突出花椒的辛香。


炭火第一刀叉燒

The Chairman Fatty Char Siu

肉質真係好軟稔，油脂位好香，焦位帶炭香，配碗白飯無得輸。


羊雜臭豆腐鍋

Fermented Bean Curd and Lamb Offal Szechuan Port


之前約腳食飯，要考慮女士的口味，所以好多次都無食，今日同行係舊同事，兩條麻甩無有怕，反而有意想不到的驚喜。

羊雜份量啱啱好，炆得夠稔及入味；豆腐應該是自家出品，內裡釀有肉碎及荸薺粒，增添了口感，豆腐質地比較粗糙，反而可以沾滿了羊雜的羶香，但不會過份，辣辣地加上京蔥的香氣，構成一個獨一無二的美味圖畫，雖然第一次食，但印象難忘。


雞油花雕蟹配陳村粉

Steamed Fresh Flowery Crab with Aged ShaoXing Wine, Fragrant Chicken Oil​ & Flat Rice Noodles​


店方名物，套餐中自然不可少，早幾年單點都要近$1300，家陣兩人份自然會細些少，但係中午食，感覺都幾奢華。

在雞油花雕的基礎上加入蜆汁，把鮮度進一步提昇，加上滑溜的陳村粉，真係食了這麼多年，仍是百吃不厭，其實大家可以試下叫碗白飯拌汁，熱燙的飯香把蟹汁的鮮味發揮的淋漓盡致，而且更有嚼口，對於無澱粉質不歡的在下，實在難以自持。


魚米湯煮琵琶蝦

Slippers Lobsters Poached in Rice Broth and Shrimp Oil

看似簡單，其實蘊含大道理，琵琶蝦若然不新鮮，肉質好易「霉」，用米漿泡浸，在爽彈的口感中，表面多了一層香滑的米漿，用米香襯托出蝦肉的鮮爽，更細緻是澆上蝦油，突顯出了蝦香。

樟木菊花煙燻七味黑鵝

Camphor Wood Smoked 7 Spiced Goose

去到此刻，就算食量如焚化爐的自己，都開始有點招架不住。

未上檯已經傳來陣陣濃郁的煙燻香味，一睇，原來是半隻燻鵝。

由於近月都仲係有少少凍，鵝肉仍是肥美，尤其是皮下脂肪入口即化，確是人間美味，鵝皮不單炸得脆卜卜，而且煙燻味直接逼入鵝骨，咬起來每口都是燻香，建議大家不如用手拎起食，因為食完連隻手指都有香味。

蔥油炒豆苗

Stir Fired Pea Sprouts with Seallion Oil

家陣時令菜當然少不了豆苗，炒得翠綠油潤，食落完成無渣，清清腸胃最啱。

臘味蕃薯煲仔飯

Cured Meat and Sweet Potato Hot Pot Rice

先講一下，以我所知，大班樓的臘肉同腸都係自家生曬，食落富油香又有嚼口，飯粒煮得粒顆分明，加入蕃薯食起來多了少許甜香，煲邊的飯焦香脆可口，更是童年回憶。


甜品三味：生磨杏仁茶，桂花棗皇糕，綠豆豆沙餅


好奇怪，出外用餐如果無甜品壓尾，總是覺得欠了點什麼。

杏仁茶亦是店方名物，濃稠香滑，小小的一杯，卻令口腔滿是杏香；桂花棗皇糕酸甜夾雜；而綠豆豆沙餅甜而不膩，兩啖食完。

P.S : 奉勸大家最好留肚，因為樣樣都好好食，根本每款菜色都想清碟！

 

地址
: 中環九如坊18號地下

 

電話 : 2555 2202

 

味道 :
5  環境 : 4 
服務 :
5  衛生 : 5 
抵食 :
5  位置 : 4

 

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip

家中的米芝蓮享受 X 親民價錢 @ 國金軒 ( 尖沙咀美麗華酒店 )

 


屈指一算，不足一個月就到新年。

係限聚令下，想幾家人聚埋食團年飯真係有難度，一來出外用餐無疑唔使諗，係屋企又未必有咁大地方，相信到時只得「各自為政」。

講到「團年飯」，當然想食得好，但到時去街市買餸，恐怕都係似打仗，倒不如叫外賣算啦！

樓下茶餐廳食得多，的確有點悶，好彩近月酒店推出不少性價比高的外賣餐。

早幾個月前試過尖沙咀美麗華酒店Yamm的西式套餐，食物不單上豐富，而且餐具仲可以循環再用，非常環保，呢點值得拍手讚讚。

近日酒店中菜廳「國金軒」又有新攪作，推出「家庭喜粵菜譜」，有頭盤、海鮮、湯品、兩款主菜及單尾，4位用都不過$688，呢個價位的確令人難以置信。

頭盤（一款）



雖然「女兒紅花影醉雞」係頭盤，但打開盒一睇，一隻完整雞髀呈現眼前，澆上附送的女兒紅，濃郁的酒香即時瀰漫，雞肉非常嫩滑，泡浸得恰到好處，不錯。

其他菜色仲有XO醬蘿蔔糕（16粒）、鮑汁雞腳（8隻）、手拍青瓜、椒麻辣子雞脆骨或煙燻羅漢素卷（6件），款式都幾多，但只得一款略嫌未夠喉，如果可以加錢要多個頭盤就更靈活多變。

湯品

原本套餐有滋補例湯或粟米魚肚羹（每款4位），但想食好少少，又或者有親友到訪，亦可加錢upgrade。

自己就點了杏汁雪蓮子白肺湯 X 2（每位另加$60）及慈禧花膠湯 x 2（每位另加$120）。

杏汁湯的質感濃稠，滿滿的杏香四溢，白肺煮得軟稔入味，真係好正。

若然不太喜歡杏仁味，亦有火喉十足的花膠湯，清甜可口，芳香醇厚，又係好啱女士。

海鮮



自己比較懶，食蟹嫌麻煩，食蝦就最好，一於豉油王花竹蝦（4隻）。


每隻都半呎以上大，蝦殼炸得卜卜脆，豉油收汁處理得好好，味道都滲入蝦肉，食落非常惹味，蝦肉爽口彈牙，而且啖啖肉，真係好滿足。

講真吖，係街市買四隻大花竹蝦都要過百蚊，家陣有大廚烹調，自己無須動手，加埋兩個餸，頭盤同單尾，都係$700左右。（當然以不加錢做大前題），仲要國金軒出品，值啦！

如果不喜歡食蝦，可以選擇麵包蟹（約600g）（雞油花雕蒸、欖菜辣子爆或避風塘炒）或者沙巴龍躉（約600g）（淮陽玉液浸、麻辣水煮或川式酸菜），若果比我可以選多一樣，我諗我會要川式酸菜魚，因為酸酸辣辣都幾醒胃。

主菜

選擇多完化，菜色由素菜到豬、雞、蝦不等，餐牌有黑松露鮮蘑菇蝦仁滑蛋、鳳梨咕嚕黑豚肉、古法陳村棗皇蒸三黃雞、怡香茄子、生炒蝦醬金勾豚肉鮮蔬、榆耳百合雙翡翠、手刴鱆魚花菇豚肉餅、上湯菜膽三黃雞、欖菜辣子肉鬆燒豆腐及魚湯魚腐泡時蔬。

經太太嚴格精心挑選，點了XO醬韭菜花腰果鮮蝦球及蜜餞伊比利亞黑豚 （6件）。

「XO醬韭菜花腰果鮮蝦球」醬汁啱啱好，辣辣地好惹味，蝦球肉質爽彈，連埋韭菜花一齊食仲香口，送飯一流
。


至於「蜜餞伊比利亞黑豚」會將叉燒汁另上，又係一個細心位。

望落色澤不顯眼，其實係肉質及味道取勝，豚肉質地鬆軟有嚼口，蜜味不會過強，配白飯就最啱，而置底的蠔油豆煮得外稔內煙韌，又好入味，留返睇波時食仲得。

飯類

做得酒店 take away，當然不會比個白飯就算數，單尾包含了欖菜龍皇翠玉絲苗、乾炒牛河、雪岭魚野菌鮮茄米線及龍蝦湯海皇西施泡飯（加$80），可以任選其一。

四款中以「龍蝦湯海皇西施泡飯」最吸引，因為脆米及湯底是另上，幾時食就稍微加熱龍蝦湯，淋落海皇飯底，再澆上脆米，根本同係現場食相差無幾，飯底加入了帶子、蝦仁等海鮮，尤其是有新鮮菜頭，食落層次分明，每口都帶龍蝦湯的馥郁香氣，其實除了無人服務外，其實安坐家中都可以有酒店級享受，仲可以開懷暢飲，「冧」左即刻去瞓都仲得。

要提一提，套餐不設送餐服務，想食就要自己拎，不過食物包裝得非常細緻，足以令客人放心，想係年夜飯又或者同屋企人食得豐富一點，呢個套餐真心推薦！

優惠專頁 : 國金軒

 

酒店專頁 :  The Mira, Hong Kong

 

地址 : 尖汁咀彌敦道118號The Mira Hong Kong 3樓

 

電話 :
2315 5222

 

味道 : 5  環境 : 5  服務 : 5  衛生 : 5  抵食 : 4  位置 : 5

 

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip

坐榻榻米嘆Sake X 串燒壽司下午茶 @ 權八 (銅鑼灣)

 


自從下午6點成了死線之後，下午茶彷彿成了餐廳的救生圈，甚至乎不少酒店都推出 take away afternoon tea，換了係年幾前，真係諗都無諗過。

不過就係因為大家都疫境求存，的確令食客可以用較低廉的價格去享受美食。


1957集團旗下的四間餐廳，先後推出以 signature  菜色包裝的下午茶，早前的「安南」餐廳下午茶，更是超筍價$238，已經又點心又有粉麵，仲要包飲品，CP值令人難以置信，難怪優惠一出，即刻火旺。



今次輪到「權八」出招，下午茶有四款日式小食、壽司三款、串燒五款及甜品四款，當中包括了招牌手握壽司、炸鮮蟹肉餅、唐揚雞柳同椰汁南瓜白玉。



以不到$400（加一當然另計）價格，除了正常飲品，竟然可以品嚐兩杯白鶴純米酒或手工啤酒，如果係平日 happy hour 點都要幾十蚊杯啦！



始終係大型日式餐廳，除了一般的座位外，更有「榻榻米」房可供選擇，大家訂檯時記得講聲。



由於下午茶有即烤串燒，建議大家同侍應交帶一聲，不妨食完小食同壽司，之後先再食熱辣辣既蟹餅、雞柳同串燒就最啱 timing，而且餐飲竟然有白鶴純米酒提供，用串燒佐酒真係無得輸。


日式小食



餐前先送上日式小食，枝豆用鹽漬過，帶少少咸香，兩個人慢慢食消磨時間一流，而飛魚子沙律又係即叫即整，絕對不會係晨早整定，可以放到出水貨色，而且食得出食材新鮮，口感清新怡人。


特意同侍應講低炸鮮蟹肉餅同唐揚雞柳跟串燒上。



蟹餅炸得色澤淡黃，火喉控制得極好，配上日本小青椒，帶來少許辛勁，令味覺更豐富，蟹餅外層微脆，內裡熱辣辣，蟹肉甜香，加入了3.6牛乳增添了滑溜的口感，食得出的細緻，好味。



至於唐揚雞柳炸得外層香脆，雞肉卻保留幼嫩的質感，又是佐酒的良伴。


壽司



下午茶加入了壽司元素，和風感覺更盛，即握的三文魚及吞拿魚壽司，飯粒鬆緊有緻，吃得出的新鮮，絕不會將貨就價，做壞招牌；而芝麻炸蝦反卷個人更喜歡，海蝦是即炸，點解知？因為蝦殼咬落脆卜卜，誠意十足。


串燒



以備長炭即烤，每款食物都沾上了炭火的香氣，的確好少地方食到，就算有，都未必咁嘅價錢，燒雞翼火喉掌控平均，放近嘴邊已傳來陣陣焦香，割開兩半令火力均勻，食落不會過於乾身，雞皮滲出油香更是邪惡。

蒜片豬頸肉是另一道令人難以抗拒的美色，薄片豬頸肉烤得夠香，連同脆蒜片一齊食，只嫌一串未夠喉啊！


加上甜蜜的日本番薯、有嚼口的杏鮑菇與及自然甜味的燒粟米，種類可說是多完化。



甜點



首選當然係餐廳名物椰汁南瓜白玉子，入口是淡淡的椰子幽香，南瓜汁好甜美，丸子QQ彈，尤其是置底的香草雪糕，足以令人吃不停口。


而蜜瓜糯米糍口感煙韌，不過係幾款甜品中最甜，適宜放係最後食。



每次食紅豆綠茶蕨餅，都會聯想起當年某店有人瘋狂排隊，就係為了一嚐蕨餅的滋味，可想而知其魅力，舌尖感受了十勝紅豆軟糯甜美，咬起來綠茶餅甘香煙韌，小小的兩片，大大的滿足。



壓軸的是日精選蛋糕，今次是藍莓芝士蛋糕，質感紮實，芝士味不會過於濃烈，與藍莓的鮮甜好合襯，而且每人一小件，份量恰好。



飲品更加不得了，除了正常無酒精飲品外，竟然有白鶴純米酒及手工啤酒，下午茶正是放鬆心神，跟朋友聊聊天放電的私屬時光，說說笑笑，又是一個美好的下午！


下午茶兩人份$388，連加一都不過$400鬆少少，如果嫌三層架的下午茶太單調，是時間轉轉口味了！

地址
: 銅鑼灣希慎道33號利園一期4樓

 

電話 : 2787 3688

 

味道 :
4  環境 : 5 
服務 : 4  衛生 : 5  抵食 : 5  位置 : 5

 

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip

午餐價錢晚餐享受 @ 花月庭 (旺角帝京酒店)

 


經歷了難熬的2020年，很多活動都彷彿停頓了，最新的消息，就連年宵市場都取消，花了多個月心機的花農，真是欲哭無淚，血本無歸。

希望新一年隨著疫苗的出現，能夠有轉機吧！

在最新的限聚令下，晚上六時打後已沒有堂食，客人想食好少少，一係就外賣，一係就食lunch。

或者大家都鬱得太耐，只要有機會釋放自己就不會錯過。

旺角火車站帝京酒店花月庭餐廳，一向主打自助餐，取消了晚間自助餐，就將原先的菜色「移船就磡」，轉到午間自助餐，令菜色更多完化。

基於疫情下，食物全都蓋上透明蓋，而客人取食物時亦必須戴上口罩，至於夾食物的餐具，亦會不停更換，又是一個加分點。

生蠔



想不到午間自助餐竟然有法國及美國生蠔兩款提供，為求衛生，開蠔後指定沖水10秒，而且每次只准取兩隻，雖然要等耐些少，但值得吖！

法國蠔比較細隻，但蠔味較重及creamy，美國蠔近年已不是大而無當，一口一隻，肉質有點爽口，真是一個驚喜位。

海鮮



就算是中午，陣容都毫不簡單，除了沒有龍蝦，基本上晚間差不多，有雪花蟹爪、海蝦、蜆、墨魚仔及新西蘭青口，解凍處理得相當好，沒有討厭的雪味。

Carving Station



先後提供烤澳洲M5和牛肩及烤火腿兩款肉類。

和牛肩特意等切至中間位置，因為有medium rare 的質感，滲出少許血絲肉質嫣紅富肉味，灑點鹽來提鮮，味道更佳。

刺身



有三文魚、吞拿魚、八爪魚、馬刀貝、魷魚及鯛魚，各要了兩三片試試，可能太耐沒食刺身了，特別覺得滋味。

生滾粥



配料豐富，客人可選擇雞肉、帶子、牛肉、螺片、蝦及蠔，而且是即叫即煮，份量又不會太大碗，粥底綿滑，配菜下點辣菜甫及薄脆，好味到一個點。

湯品



中西兩款湯是西洋菜蜜棗西施骨及南瓜忌廉湯。

中湯夠火喉，好有家庭湯水氛圍；而西餐好甜滑，配麵包最好。

熱葷

想不到午餐可以豐富到一個點，平日只會在晚間出現的菜色，家陣都有提供。

芝士龍蝦汁海鮮闊條麵

沾滿了龍蝦汁，口感豐腴，海鮮配料都變得可有可無。

燒羊髀配rosemary汁

毫不覺羶，而且羊髀肉好稔身又入味，可以一試。

蒜香檸檬蒸比目魚

陣陣蒜香而魚肉質地嫩滑。

韓式燉牛肋骨

又係炆得好稔，一戳已經骨肉分離，咬落毫不費力，伴碟的蘿蔔吸收了肉汁，本身又清甜，好味。

辣酒煮翡翠螺



將花螺變成翡翠螺，最衰無竹籤，要用牙籤「了」，肉質煙韌，都幾辣下。

黑椒啫啫牛仔骨

一向都係骨多過肉，不過都好惹味。

其他仲有柚子麻香炸雞球、薑汁芥蘭、薑蔥龍利柳煲 、臘味糯米飯、椒鹽三文魚 及日式燒雞，花月庭一向花款夠多稱譽，睇下閣下食得幾多款，自己就一半已經舉白旗。

係大堂另一邊，竟然有第一次見既豬腳薑，主角豬腳又真係炆得好稔同入味，其實太太好鍾意食，唯有下次先。

如果喜歡咖喱既朋友，又有港式咖哩雞同雜果果仁咖哩配印度薄餅同印度薄脆。

燒味



一向都喜歡花月庭的海南雞飯，所以每次都會整返碗，雞肉好嫩滑又有雞味，油飯粒顆分明，好香。

至於叉燒，就當然要配白飯啦！不過就略嫌未夠肥。

灼料吧



配料有貢丸、墨魚丸、魚片、九芽菜、蘿蔔、豆卜、魚腐、冬菇、油麥菜及唐生菜，而麵底有金邊粉、油麵及米粉，自己係澱粉怪，點都要食返碗。

天婦羅



又乜野好得過食到即炸天婦羅？尤其是炸蝦、蕃薯同南瓜炸得夠乾身，油份不算多，脆漿略嫌未夠平均但算薄，合格。

壽司




有囝囝鍾意食既明太子火炙海老壽司同火炙三文魚壽司，加埋鰻魚芝士壽司卷、三文魚壽司及吞拿魚壽司，種類不算多，但質素幾好。

芝士、雜錦凍肉及沙律



若然想清清地，大可食下cold cut 同沙律，因為有意大利莎樂美腸、煙鴨胸、煙三文魚、薯仔沙律、南瓜沙律及長通粉沙律。

最受歡迎當然係原隻24個月西班牙風乾火腿啦！

客人又可以DIY沙律，任意選取九芽菜、西蘭花、西生菜、紅葉菜、紅邊生菜及羅馬生菜，炮製啱自己口味沙律。

甜品



首選當然食雪糕，Movenpick 有焦糖、熱情果芒果sorbet、士多啤梨及雲呢拿夢幻，加埋雀巢朱古力及芒果味，一共六款，就算外邊天寒地凍，室內溫笠笠，好耐無食啦，一於同囝囝一人一杯。

今次甜品加強陣容，有signature 紅桑子芝士紅絲絨蛋糕同伯爵茶香橙雲呢拿慕絲蛋糕，大家記得要試，而且喜歡既，仲可以去餅房買返屋企享受。

其他甜品比較小巧，每次一件都係問題，有藍莓芝士蛋糕、班蘭蛋糕、芒果芝士蛋糕、紅桑子法式小蛋糕同埋豆腐芝士蛋糕。


仲有豆腐花、葡撻、焗牛油麵包布甸及窩夫。

凍櫃



囝囝就鍾情於凍櫃的甜品，尤其是香甜既芒果布甸。

自己就試埋黃金朱古力慕絲、栗子蛋糕、北海道3.6牛奶布甸、綠茶紅豆布甸、黑森林蛋糕同桂花糕。

仲有小朋友一定鍾意既爆谷機。

真係飽到上喉嚨。

飲品以往有專人調配，家陣全自助，係自助飲品區設有好幾部機，可以沖調出熱奶茶、凍奶茶、熱朱古力、凍朱古力、熱柑桔綠茶、凍柑橘綠茶、熱檸檬茶同凍檸檬茶。

而另兩部就可以沖泡出不同口味既咖啡，真係好啱想飲多兩杯既客人。

係疫景下大家都過得好辛苦，但飯總要食，難得可以係中午時段享受到晚餐的水準，就算晚上有限聚令，倒不妨試下午間小敍。

P.S : 星期一至星期五

1200至1430 成人$348/小童$248/長者$288

1445至1700 成人$318/小童$228/長者$268

         星期六、日及假期

1200至1430 成人$398/小童$278/長者$338

Facebook 專頁 : 花月庭

 

酒店專頁 : 帝京酒店

 

地址 : 旺角太子道西193號帝京酒店2樓

 

電話 : 2622 6154

 

味道 : 4  環境 : 4  服務 : 4  衛生 : 4  抵食 : 4  位置 : 5

 

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip

2020年度驚喜 X 極速奪星餐廳 @ TIRPSE ( 尖沙咀 K11 Musea )


 

一眨眼，又是新的一年，就推薦一間上年最令個人驚喜的餐廳。



自從疫情出現後，好多餐廳都大受影響，部份更是暫停營業，身邊不少相識多年的飲食圈中朋友都要放no pay leave，情況令人憂心。



K11 Musea 可以話今年話題商場，各式食店進駐，令人目不暇給，眼花繚亂，但又好少重覆。



若閣下愛看的日劇，一定數到木村的「摘星廚神」，而該劇的背景與「TIRPSE」店長又有著千絲萬縷的關係。



法日菜的精彩處在於揉合了兩者的精髓，難怪當日可以用破紀錄式兩個月就奪取米芝蓮1星榮譽，更曾獲 Diners Club International 選為全球50大最佳餐廳。



今次「TIRPSE」落戶 K11 Musea，選址極佳，180度無敵海景，中午時段室外自然光透入，倍感舒適，加上CP值最高的「LUXURY」套餐，真係無得輸，點解？因為Set Lunch只不過 $600 左右，而Set Dinner 只不過僅多了一個Main Course，但差不多要 $1200，看來，這個夜景都幾值租。


由於是日本菜，順道找來好友分享。


其實餐廳另有廂房，但都是採用落地玻璃設計，室外景觀一覽無遺。


很欣賞主理人找來前 Robuchon 經理打點一切， 對於菜色瞭如指掌，如數家珍，越介紹就越挑起食慾。



率先上場的 Ciabatta 麵包籃已經有驚喜，咬落質地鬆軟，塗上 Homemade 醬料，增添了滑溜及芝士的幽香，加上是日無食早餐，就更覺肚餓，輕易而舉更消滅了。



AMUSE BOUCHE

アミューズブーシュ

賣相小巧精緻，但味道複雜細膩，外上層是細碎的芝士絲，置底是 Artichoke，中間是入口即溶，口感豐腴的北海道海膽，的確是人間美味。



STARTER

Shirako . Potato . Truffle

白子、ジャガイモ、トリュフ

白子先用北海道牛乳泡浸24小時來闢腥，然後輕煎至外表微脆，質地輕如無物，毫無腥味，襯以置底綿滑的薯蓉，放上幾片黑松露片，香氣縈繞，盡見廚師的功力。



SOUP

White Kidney Bean. Chorizo

白いんげん豆、チョリソー

將白腰豆打至起沙，中間放上棉花糖，更是神來之筆，澆上西班牙辣肉腸油，令賣相不會單調，而且少許辛勁更挑起食慾。


MAIN COURSE (3 Choose 1)

有三款選擇，可以任選其一。



Branchiostegus . Clam . Yuzu

マートウギョ、アサリのエキス、ゆず風味

香煎金鯛魚（即是馬頭魚）

連著魚鱗一齊淋油，令魚鱗片片豎起，口感清新爽脆，配以由蜆肉、Yuzu 及魚骨煮成的清湯，不單帶來陣陣清香，更突出了鮮味，就連白菜的味道都變得豐富。



Guinea Fowl . Carrot . Girolle (+HKD68)

ホロホロ鳥、人参のソース、ジロール茸の

ソテー

擺碟賣相亮麗，有時候食物未入口，單看外表已令人垂涎欲滴，大廚將法國珍珠雞以慢煮手法處理，雖然是雞胸部位，但仍保留嫩滑的肉質，廚師在火喉的掌控上值得一讚，而澆上甜美的南瓜汁，帶出了雞肉的甜美，side dish 是翠綠的菠菜苗及雞油菇，又是一道滿分作。


U.S. Prime Beef . Black garlic .

Cacao Red Wine Sauce (+HKD88)

米国プライム牛肉、 黒ニンニクのビューレ、

カカオ風味の赤ワインソース

雖然要另加錢，但個人覺得是值回票價，選用了tenderloin 位置，肉質鬆軟有嚼口，肉味又濃，蘸點一下可可紅酒汁及黑蒜醬，令肉味起了變化，但個人始終喜歡簡單的下點海鹽來提鮮。

伴碟的芹菜頭及紅菜頭，都經烤過，好味。



MINI DESSERT


Guinness Ice Cream (BuckWheat’s Seed’s Caramel)

ギネスアイスクリーム

一道 Homemade 黑啤雪糕，甜中夾甘，淡淡的酒香，味道獨特，插上白朱古力片，平均了甜與苦。


DESSERT(2 Choose 1)



Kalamansi Mousse

(Strawberry & Pomegranate Sauce. Ginger Sorbet)

カラマンシのムース、イチゴとザクロのソース、生姜のソル

ベ

可以說是層層疊疊的味道，青柑桔mousse口感清新怡人，包裹了白朱古力殼，而餡料是石榴醬汁及草莓慕絲，甜中帶酸，平衡點拿捏得相當準。


更何況配姜味雪芭，正好喚醒了舌尖的感覺。



Mascarpone Cream

(Kumquat Confit & Palo Santo Ice cream)

マスカルボーネクリーム、キンカンのコンフィ、パロサント
のアイスクリーム

外層脆皮是蛋白砂糖加入忌廉，內裡是美國南部檀香雪糕及柑橘皮，吃起來甜而不膩。



Petit Four

壓軸的甜品是同樣的精彩，小巧可愛的是普洱棉花糖，軟綿綿的口感，卻有著濃郁的茶香。


另一件是意大利杏仁蛋糕，因為經過浸酒，所以質感絕不會感到結實，而且有淡淡的酒香，相當吸引。



Coffee or Tea

コーヒー 又はティー

餐後太太點了薄荷茶，自己當然是伯爵茶，散發著佛手柑的幽香，令人心曠神怡，真是一個完美的中午，此情此景，好想再度重溫。


當日中午價是Price HKD 598，另加10% SERVICE CHARGE。



喜歡喝上一杯的請放心，價錢相當合理而且有專業的侍酒師介紹合適的table wine，而今次就配搭了兩枝同樣來自法國的佳釀，Champagne Louis Auger Brut N.V （$168 ）與及 CHĂTEAU LARCIS
DUCASSE, GRAND CRU 2005 （$98）。

 

地址 : 尖沙咀梳士巴利道18號Victoria Dockside K11 Musea2樓219號舖

 

電話 : 23330031

 

味道 : 5  環境 : 5  服務 : 5  衛生 : 5  抵食 : 5  位置 : 5

 

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

 

http://www.facebook.com/foodiephilip