紅磡.土瓜灣 - 美食焚化爐

《點心風雲錄XVIII》景色怡人 X 點心出色 @ 紅糖 ( 紅磡香港嘉里酒店 )

苦候多時，終於可以了無拘束的在街上走動，即時有朋友相約飯聚，地點就選了紅磡嘉里酒店的紅糖中菜廳。

自從中菜行政總廚余偉經掌廚以來，每每都有驚喜，今次就試試新舊菜色。

率先要分享的，必定係［紅糖金魚餃］，押得上紅糖名號，當然有信心，以鱈魚肉替代常用的蝦肉，加入欖菜更是別具用心，賣相神似一條游動中的金魚，在陽光下閃閃發光，真的有點捨不得咬下去。

今次亦是以點心為主，一碟三款點心是［松露野菌餃］、［巴馬火腿黃橋燒餅］以及［鱘龍魚籽富貴蝦餃］。

先講講［松露野菌餃］，外層加入菜汁，令餃皮呈淡綠色，相當好看，野菌味好突出，絲毫沒給松露的味道蓋過，反而有提香的感覺。

另一款是［巴馬火腿黃橋燒餅］，望落真係好似煎堆，餡料卻是巴馬火腿，好一道融合了片西的點心。

而［鱘龍魚籽富貴蝦餃］就顯得相當矜貴，澄麵粉皮搓得通透，瀨尿蝦肉甜美可口，放上了鱘龍魚籽味道更鮮，少許金箔，黑金相間，好睇又好食。

又是一碟三款點心，賣相絕佳之一係［玫瑰花富貴蝦凍］，果凍之內是加入玫瑰花的瀨尿蝦肉，質地軟鬆可口，又有玫瑰花香，很特別。

三款點心中，最得我心必定係名物［楓糖黑豚肉叉燒］，本身已軟熟有嚼口，醃得夠蜜味，尤其是冰肉肥美，配返碗白飯一流。

以新鮮檸檬汁來處理［檸檬蝦球］，清香的檸檬味，蝦肉爽彈，掛上了鮮檸汁後，酸酸甜甜的，非常惹味。

有朋友念念不忘［脆蝦紅米腸粉］點心，以紅米水作腸粉皮，色澤艷麗，咬落中間微脆，好味其實好簡單。

［淮揚玉液泡星班球］又是一道貴氣菜色，星班肉質細緻嫩滑，本身已經好鍾意，再以濃郁的雞湯泡浸，找不到不好吃的道理。

對於喜歡喝湯的朋友，［原個椰皇燉花膠鮑魚］必定令你回味無窮，先燉好花膠鮑魚湯底，再加入椰皇肉及椰皇水，清甜度爆燈，一揭開蓋，陣陣醇香隨之而來，湯色清澈見底，精華都跑到湯裡，以時間換來的美味，超正。

身邊相熟的朋友，都知自己好鐘意食柚皮，這道［蝦籽柚皮關東遼參］就深得我心，柚皮苦澀味盡去，入口軟綿，扣得入味，關東遼參充滿了骨膠原，扣得入味，對自己這類中年人好啱，真係要補補。

最後當然係甜品時間，［紅糖甜品拼盤］當中有齊琥珀核桃酥、金果香芒玉露及奶黃小柑桔。

女士們最喜歡［奶黃小柑桔］，除了神似外，有柑桔的清香，內裡的奶黃甜滑，大滿足。

［金果香芒玉露］根本是楊枝甘露的強化版，加入金奇異果就更健康。

真心佩服紅糖的甜品師傅，每次［琥珀核桃酥］都得真既一樣，核桃的質感與口感，都屬無得輸。

Facebook 專頁 : Kerry Hotel Hong Kong

地址
: 紅磡紅鸞道38號香港嘉里酒店7樓

電話 : 22525279 / 22525888

味道 : 5 環境 : 5 服務 : 5 衛生 : 5 抵食 : 4 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

經典再現 @ 雪園會館 ( 紅磡 )

年輕時經過北角雪園，總是有點遙不可及的感覺，直到2000代光榮結業，以為就此在香港飲食圈中消失。

原來近日其中一位老板，靜稍稍地在紅磡重新開業，並改名為［雪園會館］。

其實原址是一間單幢式酒店，在疫情下亦支撐不住，幸好附近有大學，所以搖身一變，成為大學生的
Apartment，而一樓就成了［雪園會館］的新址。

餐廳前身是主打Buffet，家陣部份位置改得更具時尚感，給住客休息上網，而另一邊就是雪園所在。

雪園除了大廳外，尚有幾間廂房，但設有最低消費。

蘿蔔絲海蜇皮（$108）

近年食得海蜇頭太多，轉食海蜇皮口感多了一份柔軟感，而加入蘿蔔絲更有清爽的感覺，陣陣麻油香下，不錯。

醉香乳鴿（$148）

乳鴿並非浸過夜，避免有酒的苦澀味，反而臨上檯先加入酒，令鴿肉有酒香，而肉質保持嫩滑。

楊州素黃雀（$128）

有時真係佩服香港人的聯想力，由於生根先炸後滷，色澤似禾花雀，所以索性叫黃雀，而生根又入味。

酒糟牛脷（$168）

淮揚菜中少見的牛肉菜色，牛脷薄切後以酒糟滷過，牛味不單沒有流失，卻又有軟綿的口感，很精彩的一道菜。

口水豬手（$118）

同樣只在川菜中出現的菜色。

豬手啤水處理得相當好，皮質位爽口彈牙，而辣汁可能遷就香港人口味，有麻辛而不澎湃，反而挑起了食慾。

鎮江肴肉（$108）

很多時都見到的菜色，肉味好香，而膠質位亦恰如其分。

翡翠河蝦球（$180）

一般蝦膠都係以海蝦為主，以河蝦打成蝦膠真係好少見，須知河蝦偏細隻，剝蝦殼好花時間，仲要打成蝦膠，的確好花時間，再加入菠菜汁，令色澤亮麗，更是花心思，炸得啱啱好，入口軟綿又彈牙，賣相雖然簡單，但真心推薦。

火瞳雞燉津白湯（$1480一份/880半份）

令我諗起幾年前係尖沙咀一間老店（現已結業）食過，配上窩窩頭食，美味程度爆燈，家陣單槍上陣，風采依然，原隻新鮮清遠雞加入經處理過的肘子，再放入原條津白清燉，所有精華溶入湯裡，而津白亦吸收了湯汁，軟稔可口，份量又足，無得輸。

煙燻河鰻（$980）

連頭連尾上，的確令人嘩一聲，證明係新鮮貨，雖然河鰻已起大骨，但厚肉依然內藏碎骨，食時候要小心，不過煙燻味好重而且好入味，正。

手撕童子雞（$368）

選用不足兩斤的新鮮雞作童子雞，肉質有保證，而且皮下脂肪極少，雞肉全人手撕成條狀，食落更有層次，作價$300幾，一點都不貴。

百頁結紅燒肉（$168）

充滿本幫菜濃油赤醬的氛圍，百頁結蘸滿了肉汁是精華所在，紅燒肉略嫌未夠肥，油香差了點，不過個汁用來拌白飯一流。

小籠包（$60/4隻）

可以用皮薄餡靚來形容，夾起不單沒穿破，而且可以睇到內裡肉汁，厲害，豬肉刻意地保留了有嚼口，好滿意。

經典生煎包（$72/4隻）

精彩處在於包底，煎得不可以用脆來形容，反而是近似威化的酥脆，好少地方做得到，又是必食菜色。

雪園芝麻球（$32/2隻）

本身有芝麻及是日流心奶黃兩款，外層的芝麻粒沾得未夠平均，但餡料熱燙呈流心狀態，相當對板，炸得色澤金黃是用上新油，所以沒有夾雜異味。

地址
: 紅磡蕪湖街83號Y83大學生公寓1樓101號舖

電話 : 3897 9686

味道 : 4 環境 : 4 服務 : 5 衛生 : 5 抵食 : 4 位置 : 3

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

Lobby Lounge X Plantin Kaviari @ Lobby Lounge ( 紅磡香港嘉里酒店 )

誰說下午茶是女孩子的專利，能跟另一半放下繁瑣的家事與俗務，放鬆心情充充電，先可以迎接未來的挑戰與壓力。

早前就根太太到訪了紅磡嘉理酒店，試試最新推出的［黑鑽松露］下午茶。

今次 Afternoon Tea Set 跟魚子醬名牌合作（Lobby Lounge X Plantin Kaviari）兩位享用，星期一至五都只不過$638，至於星期六日及公眾假期，則要$668。

很喜歡室外的陽光從落地大玻璃透入，一室明亮的感覺真好，再加上寬敞的空間感，令人倍覺舒適。

這個下午茶就先由鹹點揭開序幕。

SAVORIES

SAFFRON TROUT ROE AMBER

Blue Mussel Jelly, Kaviari Lobster Rillettes

藏紅花鱒魚子琥珀

單論賣相是最吸睛的一道鹹點。

原隻藍青口以jelly包裹，咬落有少許Q彈，再放上鱒魚籽，令色彩及口感更具層次，或者是今個下午茶的亮點之一。

DEEP-FRIED EDIBLE FROG LOLLIPOP

Plantin Truffle Herbs Cream

酥炸田雞球棒

近年下午茶真係百花齊放，想不到連田雞肉都用上了，外層微脆，而內裡加入了松露香草忌廉汁，不錯的組合。

Menu is created with Plantin Kaviari gourme

PLANTIN WILD MUSHROOM MOUSSE

Black Truffle Paste, Porcini

野菌慕絲

另上的一道甜品，有著田園的風味，兩粿小蘑菇在草叢間茂密生長，其實是野菌慕絲，真有趣。

KAVIARI KRISTAL® CAVIAR EGG BENEDICT

Comté Cheese Foam, Quail Egg, Brioche

晶鑽魚子醬班尼迪蛋

賣相小巧別緻，以鵪鶉蛋取代了雞蛋，置底是法式甜包，再放上康堤芝士泡沫及晶鑽魚子醬，食起來倍覺矜貴。

SALMON RILLETTES & KAVIARI

TRANSMONTANUS CAVIAR SANDWICH

Smoked Salmon, Zucchini

三文魚肉醬及白鱘魚魚子醬三文治

圓形的三文治又幾有趣，中間餡料是煙燻三文魚，裹以三文魚肉醬，外層是意大利青瓜片，置頂是主角白鱘魚魚子醬，細緻度好高，食落層次分明。

SWEETS 甜點

MILK CHOCOLATE & TONKA CAKE

Hazelnut Dacquoise, Pabana Exotic Cream

牛奶朱古力零陵蛋糕

甘甜的味道好突出，質感亦在預期中，可能大家會覺得有點平凡，但無可否認，如果下午茶欠了這一類甜點，又會覺得未夠完美。

BELLINI MACARON

White Peach Cream, Veuve Clicquot Jelly

貝里尼馬卡龍

Macaron內裡是芳香的白桃忌廉，放上一片白朱古力，再以香檳果凍作點綴，好睇又好味。

WINTER FRUITS CAKE

Vanilla Mousse, Chestnut Vermicelli

冬季水果蛋糕

賣相雖然簡單，但很喜歡甜而不膩的栗子蓉，加上慕絲的滑溜，輕輕鬆鬆便消滅了。

PISTACHIO & RASPBERRY CAKE

Pistachio Mousse, Raspberry Confit

開心果紅桑子蛋糕

酸酸甜甜的味道，拿捏得相當準繩，就連太太也喜歡。

FRESHLY BAKED SIGNATURE SCONES

新鮮烘焙鬆餅

拎上手仍有微溫，我鍾意，而且有（Traditional）原味及（Strawberry）士多啤梨兩款口味，但是日突然改成了提子口味，可能廚師會考慮水果的質素吧！

大家可以塗上三款（Bonne Maman Jams Selection）法式果醬又或者（Traditional Clotted Cream）傳統奶油忌廉，食落份外覺得滋味。

想奢華一點？沒問題，原來只要另加HKD$168，便有KAVIARI CAVIAR嚐味拼盤昇華你的體驗。

Kaviari Kristal Caviar

當中包含了Kaviari Oscietre Caviar(2g)及Kaviari Transmontanus Caviar (2g)。

配以布林餅、酸奶油、蛋黃、蛋白及香蔥。

其實除了原有的茶或咖啡外，客人只要按照以下做法，便可以獲得“冷泡海帶紅茶湯力”乙杯。

特飲以冷泡烏龍茶作base，加入湯力水及海帶，非常清新怡人，不錯。

1.追縱@kerryhotelhk Instagram

2. 於個人帳戶分享此下午茶照片，並加上hashtag

#KerryHotelHK 及地標Kerry Hotel, Hong Kong

3. 向大堂茶座員工展示有關Instagram帖子,即可免費獲贈“冷泡海帶紅茶湯力”乙杯

至於餐飲一向多選擇，單是茶類已經有English Breakfast （英式早餐茶）、Earl Grey （伯爵茶）、Jasmine Tea （茉莉花茶）、Peppermint（薄荷茶）、Chamomile（洋甘菊茶）、Tie Guan Yin （鐵觀音）、Yuan Yang – Blend of Coffee and Milk Tea（鴛鴦）及Silk Stocking Tea – Hong Kong-style Milk Tea（港式絲襪奶茶）。

咖啡更是有Regular Coffee（咖啡）、Americano（美式咖啡）、Flat White（澳式白咖啡）、Cappuccino（意式泡沫咖啡）、Caffè Latte （鮮奶咖啡）、Caffè Latte Mocha（摩卡咖啡）、Kerry Chocolate（熱朱古力）以及Hot Fresh Milk（熱鮮牛奶）。

太太係薄荷茶死忠，當然自動自覺代點啦！自己就偏好伯爵茶的幽香，來一杯倍覺怡人。

最難得係咖啡或茶無須加錢就已經可以兩小時無限添飲，不過只限同款飲品。

想進一步享受，又可以用港幣$188加配法國凱歌香檳兩杯。

Facebook : Kerry Hotel Hong Kong

地址：紅磡紅鸞道38號香港嘉里酒店1樓

電話：22525237

味道 :
4 環境 : 5
服務 : 4 衛生 : 5 抵食 : 5 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

久違了的Buffet滋味 X 任食法國生蠔 X 香煎鵝肝 @ 8度餐廳 ( 土瓜灣8度海逸酒店 )

自己3歲已經係土瓜灣居住，母親舊居仍在，偶爾都會返去打個白鴿轉，亦見證了好多老店結業，實在有點唏噓。

不過新舊交替始終係必然事，盡量平常心吧！

早幾年都經常造訪8度海逸酒店，在疫情稍為緩和下，可以同位幾年不見的朋友聚舊。

可能大家屈得太耐，是晚Buffet爆到七彩，遇上了久違的熱鬧氣氛。

亦因為但凡於酒店 eshop 預訂可享高達8折優惠；至於星期六、日或公眾假期(成$598/長者$528/小童$458)晚餐亦可享85折優惠；而星期一至四（成人$568/長者$478/小童$408）首100位預訂更享額外九折優惠，但凡四位或以上同行優惠自助晚餐，生日之星可享半價優惠（以原價計算）或免費生日蛋糕一磅或紅/白餐酒乙支。

法國生蠔

最值租當然係即開法國生蠔，保證新鮮，而且絕不是大而無當貨色，想食？麻煩排多兩轉，因為每次只準拎兩隻。

海鮮

畢竟好耐無食自助餐，遇見翡翠螺、亞拉斯加皇后蟹腳、海蝦以及藍青口，當然要盡情食過夠本。

刺身

種類都好多，有齊油甘魚、蟹柳、玉子、鯛魚、三文魚、吞拿魚、甜蝦以及鯖魚，解凍處理得好好，沒半點雪味，再加點醬油，鮮味都提升了。

Carving Station

燒特級牛肉

食肉獸當然首選燒牛肉，切了薄薄一片，肉味不俗。

煎鵝肝伴黑松露汁

除了生蠔係回本位，即煎鵝肝又係重點推介，雖然都幾邪惡，但偶爾一次無壞吖！

麻辣鮮蜆煲

麻辣做得好，只會令人越食越想食，蜆肉雖然係事先灼過，鮮味稍遜，但好處係確保所以有蜆都開殼。

熱葷

其實餐廳都好多熱葷。

清蒸大海班

用上兩斤左右青班，蒸得啱啱好，豉油令魚肉更鮮，難怪每次出場都好快被消滅。

日式醬燒牛肋骨

鍾意食肉的朋友，牛肋骨又係必食，炆得夠稔同入味。

至於泰式豬頸肉、XO醬蜜豆炒雞球同西蘭花炒花枝都幾啱自己口味。

仲有廚師精選意大利粉、紫蘿咕嚕肉、燒羊脾、楊州炒飯、泰式咖喱蝦、小籠包以及薄餅。

其實仲未講完，因為係另一邊，有個人推介既香煎龍脷柳、辣酒煮花螺同埋芝士忌廉汁煮藍青口。

當中藍青口真係可以食過不停。

想食素？會有葡汁焗雜菜、芝士焗薯蓉、蒜蓉炒雜菜、野菌炒茄子同埋炒豆角。

燒烤區

有海蝦、蕃薯、栗米、雞肉腸、煙肉卷以及燒雞。

喜歡咖喱的朋友，有咖喱雞、咖喱雜菜同咖喱牛腩。

湯品

中式是粉葛赤小豆煲唐排，好有家庭湯水feel，反正近日自己少煲湯，當然飲返兩碗。

而西湯是南瓜忌廉湯，質感幾滑溜甜美，喜歡飲湯的朋友，又多個選擇。

Cold Cut and Cheese

有芝士碟、雜錦凍肉盤、煙三文魚、日式南瓜沙律、牛肝菌、風味海鮮沙律、意式雜椒沙律、素翅沙律、葵心木瓜沙律、秋葵沙律及鮮果碟。

口水雞不會太辣，反而幾惹味。

甜品

雪糕

有Cookies & Cream、Chocolate同埋Strawberries & Cream三款，而且係獨立迷你包裝，保證衛生，食幾多都得。

亦有即製哈根大師配窩夫，係熱辣辣既窩夫上，放上一球冰凍的雪糕，再灑些少topping係面，無得輸。.

熱食甜品仲有葡撻、牛奶麵包布丁配雲喱拿汁同蛋白杏仁茶。

係甜品專區，首選一定係餐廳名物芒果拿破崙，雖然賣相不及以前，但味道依然可口，所以都好受歡迎。

另一款個人鍾意食就係Tiramisu，濕潤的感覺，輕盈的口感真好。

當然不會得幾款甜品，法式焦糖燉蛋、紐約芝士蛋糕、德國芝士蛋糕、芒果慕絲蛋糕、Oreo
Cookie Cheese Cake、車厘子撻、栗子忌廉蛋糕、草莓慕絲蛋糕、蛋白梳乎厘、雜錦蛋糕與雜錦Jelly。

至於飲品，除了奶茶、咖啡外，仲有橙汁都係Free Flow。

Facebook 酒店專頁 : 8度海逸酒店

餐廳專頁 : 8度餐廳

地址 : 土瓜灣九龍城道199號8度海逸酒店地下

電話 : 21261960

味道 : 4 環境 :
4 服務 :
4 衛生 : 4 抵食 :
4 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

《點心風雲錄XV》紅磡最佳點心 X 拉絲蘿蔔酥 X 流心鵪鶉蛋 @ 紅糖 ( 紅磡香港嘉里酒店 )

身邊的朋友都知我鍾情一盅兩件，更試過一日之內走訪三間不同級別的餐廳。

位於紅磡Kerry Hotel的紅糖中菜廳，點心造型有心思，金魚餃、燒鵝酥、梨形咸水角同奶黃小柑都非常有趣，當然味道亦同樣出色，所以係自己同舊同事飲茶的好地方。

而近日又有新點心出現，心思思又去試試。

在蔚藍的天空下，四周景色都變得更立體，但30幾度氣溫，還是躲入酒店嘆杯茶更好。

藕斷絲連（$78）

蘿蔔絲酥餅食得多，之前是甘筍造型，今次加入芝士又幾有新意，依然用上日本大根，甜度有保證，賣相更是似迷你版蓮藕，切開見一絲絲蘿蔔，仲有芝士帶來拉絲效果，不單視覺效果一流，食落外層酥化而內裡是濃郁的蘿蔔香氣。

雪山叉燒包（$88）

很鬆化的外層，內裡是叉燒餡料，幸好叉燒醬未算太多，而且叉燒亦刴得夠細粒，我鍾意。

巴馬火腿黃橋燒餅（$88）

起初還以為是普通燒餅，但烘得色澤金黃，而且外層帶點酥化，餡料是巴馬火腿，揉合了中西食材的元素，雖然未必為大眾接受，但無疑肯嘗試是好事。

鱘龍魚籽富貴蝦餃（$98）

畢竟是酒店中菜廳，用料都份外講究，簡單的蝦餃都要加上鱘龍魚籽，矜貴之餘，餃皮搓得通透富彈性。

蝦籽遼參和牛面札（$88）

在傳統中注入新元素，是酒店中菜廳的玩法，似乎是淮山雞札的概念，以粗條蛋麵包裹遼參、鮮淮山以及遼參，淋上鮑汁與灑上蝦籽，賣相及食味都不錯，尤其是麵條沒太多梘水味，但似乎淋身些少，個人是偏好有嚼口的麵條。

流心鵪鶉蛋燒賣（$88）

細細個時，除了鍾意食舊式灌湯餃外，鵪鶉蛋燒賣是另一樣情有獨鍾的點心，一碟三件，但每次都係齋食鵪鶉蛋，置底豬肉通通奉獻比老爸，所以話每件點心都是回憶。

今次將鵪鶉蛋釀入豬肉內蒸，而又能保持流心效果，即叫即蒸是正道，火喉的掌握亦見精準，豬肉份量啱啱好包裹整個鵪鶉蛋，好味。

桃膠山藥魚湯泡時蔬（$248）

是時候來點菜蔬清清味蕾了。

莧菜蘸上了奶白的魚湯，多了一份鮮甜的感覺，加上健康的桃膠及山藥，真好。

龍蝦湯蟹肉野菌炆伊麵（$248）

始終都要有澱粉質打打底，驟眼看是平平無奇，原來龍蝦湯都給麵條吸去，食落好惹味，貪心一點，蟹肉重手一些更好。

乾清棗皇糕（$78）

黏性極強，口感Q彈，棗香味濃。

紅糖甜品拼盤（$108）

很喜歡紅糖的甜品組合，當中包括了琥珀合桃酥、奶黃小柑橘以及青蘋果菊花凍。

建議大家由淡至濃去享受，尤其是合桃是蓮蓉及朱古力的組合，味道較重。

今次幾款點心仍保持水準，未知下次又會帶來什麼驚喜？

Facebook 專頁 : Kerry Hotel Hong Kong

地址
: 紅磡紅鸞道38號香港嘉里酒店7樓

電話 : 22525279 / 22525888

味道 : 5 環境 : 5 服務 : 5 衛生 : 5 抵食 : 4 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

榴槤來了 X 下午茶自助餐 @ Big Bay Cafe ( 紅磡香港嘉里酒店 )

家陣每逢經過生果舖，總是見推起一箱箱的榴槤，店主一破開果殼，即時香氣四溢，令人食指大動。

不過每次要整個買，家人又未必個個食，心多的，想食多幾款又怕麻煩。

其實諗諗下，不如去食有榴槤提供的 Buffet，因為好多時都會搖身一變，化成不同口味的甜品。

而香港嘉里酒店就首度推出東南亞主題榴槤甜點自助下午茶，或者可以幫到大家。

今次大灣咖啡廳（Big Bay Cafe）將於這個炎夏7、8月，推出全新東南亞美食及榴槤下午茶自助餐,供應星、馬、泰各地的地道佳餚，還有多達十款榴槤甜品和鹹點，若然閣下是榴槤迷，就更加係
Win Win。

請注意，【下午茶自助餐】供應日期只限於 2022年7月9日至8月28日(逢星期六及星期日)，時間為下午3時15分至下午5時，每位HKD$300(當然要另加一服務費)。

其實逢星期五、六、日及公眾假期，Dinner Buffet，都有榴槤菜色提供，而且更有4款不同品種的榴槤肉奉上，喜歡食榴槤的朋友可要留意了。

除了上述所提及的美食外，更包括無限暢飲椰子水、香茅特飲、咖啡及茶。

若果想多點享受，又或者有小朋友想飲果汁，餐廳又有$68，free flow果汁同汽水。

就分享下今次主打的榴槤菜色。

榴槤薄餅

絕對有驚喜，12吋薄身餅底，烤得脆卜卜，平舖的榴槤呈半溶狀態，再灑上開心果碎，令味道及口感更佳，不過真係要趁熱食。

脆炸D24榴槤球 (輪流供應)

感覺上似係放入了榴槤肉的迷你煎堆，咬落外層煙韌，而內裡是熱燙的D24榴槤，甜美可口，好味。

D101榴槤港式多士 (輪流供應)

而另一款是化身成多士，但切開兩半便會發覺是中空，原來廚師已另外準備了榴槤肉，大家可把榴槤肉釀入多士，香脆之餘更加是美味爆燈。

榴槤巴斯克蛋糕

又是出奇地好味，榴槤味不會太嗆，蛋糕質地鬆軟，而且份量小巧，不會佔太多胃納。

榴槤銅鑼燒

銅鑼燒吃過不少，但加入榴槤的倒是第一次，餡料當然是榴槤，再蓋上一片蕨餅，多了一份QQ的感覺，甜度又啱啱好，個人幾鍾意。

榴槤芒果糯米飯

可能掛住影相，所以放得太耐，飯粒有點硬，說是榴槤芒果，但榴槤味輕如無物，相信給椰漿味蓋過了。

牛奶朱古力綠茶榴槤撻

賣相小巧，內裡的榴槤比較輕手，朱古力的比例啱啱好，撻皮亦覺酥化。

榴槤泡芙

喜歡榴槤的朋友首選，因為一咬落去，飽滿的榴槤肉便湧出，味道澎湃，味覺大滿足。

榴槤歌劇院蛋糕

可說是食榴槤的入門版，因為咖啡的味道太霸氣，令榴槤味不太突出，但反而令人可慢慢接受。

榴槤蜜柚忌廉蛋糕

好Creamy的口感，蜜柚與榴槤的味道個人覺得幾夾，而且質地滑溜，我鍾意。

榴槤拿破崙

又係要快食，因為夾層酥皮沾上水氣太耐，便會變得較淋。

下午茶點都要有Scone先似樣，雖然好似好飽肚，但迷你版又會好少少，分別塗上clotted cream同果醬，不錯。

單講甜品有點悶，就介紹一下泰式炒金邊粉Pad Thai，金邊粉炒得有些少濕潤，但油份不多，非常香口，又有鮮蝦同叉燒，材料豐富，中間夾雜有花生碎，有少許嚼口，食落幾開胃。

作為下午茶自助餐，當然仲有其他美食，其實真係好豐富。

P.S : 香格里拉會會員專享 – 同行兒童賓客自助餐優惠：

(1) 首兩名0至3歲小童可免費享用自助餐(最少與一位成人賓客同行);第三位或以上的同行小童可

享半價優惠。

(2) 4至11歲小童可享自助餐原價五折優惠。

如欲查詢,請致電22525246與大灣咖啡廳聯絡及訂座。

Facebook專頁 : Kerry Hotel Hong Kong

地址
: 紅磡紅鸞道38號香港嘉里酒店3樓

電話 : 22525246

味道 : 4 環境 : 4 服務 : 4 衛生 : 5 抵食 : 5 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

高質爐端燒 @ 爐端燒 ( 紅磡海濱廣場地下 )(九龍海逸君綽酒店)

等了又等，餐廳終於可以半解放，總好過每檯小貓三兩隻，有幾多人晚晚撐檯腳吖！

有時都想除低口罩，成班人嘻嘻哈哈，大杯啤酒先可以解壓。

早排同朋友係紅磡海逸君綽酒店內扒房試過free flow生蠔同牛扒，雖然家陣已經加價，但依然抵食( 詳細分享 )。

今次轉轉口味，試下爐端爐，睇睇水準又如何？

餐廳內分成多個用餐區，靠牆邊的多是二人座，想靜靜地同朋友傾計，又不太介意想睇師傅燒烤的，都是一個好選擇。

相對而言，想睇下火光烘烘，聞到焦香味道，挑起食慾的，就一定要坐吧檯。

畢竟餐廳主打爐端燒，所以設有三個燒烤區，每區可容納12人以上，而各有一位師傅坐陣中央，相當之有氣勢。

其實早兩年曾經光顧過，亦有朋友為我慶生，所以留下良好印象，而今次主要同幾位朋友試下 a
la carte menu 內的菜色。

另外，若然閣下係大胃王，正好週末有放題「相撲手午餐」，逢週六，週日及公眾假期中午12時至下午2時30分供應，成人/HK$608 小童/HK$508，當然要另加10%服務費。

每當師傅處理好食物時，便會用足4足的長條木板遞上，有時真佩服大廚的腕力，整晚做同一動作幾十次而面不改容。

雖然主打爐端燒，但餐牌上依然有其他菜色。

前菜

ふぐ

Dried blowfish

河豚乾（$180 ）

蛍いか一夜干し

Hotaru-ika ichiya boshi

螢光魷魚一夜乾（$160 ）

先來一份河豚乾及螢光魷魚一夜乾，伴以常見的沙律醬，同樣有嚼口，而且味道濃縮，聊聊天消磨時間最好。

うなぎ骨せんべい

Unagi hone senbei

鰻魚骨乾（$180）

しらす干

Boshi tatemi iwashi

白飯魚乾（（$120）

再來是賣相很獨特的鰻魚骨乾，不過咬落要小心，很容易給刺傷口腔，反而白飯魚乾薄薄的一片，很容易便消滅了。

日本は新鮮な魚

Air express

日本直送鮮魚（$800）

前菜過後，是刺身時間，是日點選了由日本直送的眼仁奈，白身肉很軟韌，幾個人分享啱啱好。

而魚骨不要浪費，一於拎去酥炸，佐酒一流。

ほっき貝

Hokki kai

北寄貝（$360）

另一款刺身是北寄貝，肉質很爽甜品，亦屬於自己喜愛的刺身之一（實情係差不多所有刺身都鍾意），不錯。

白ミル貝

Japanese geoduck

白象拔蚌（$540）

最後一款是白象拔蚌，嫩滑細緻的肉質，蘸點一下醬油來提鮮，誰會不愛？

牛タン

Wagyu Ox-tongue

和牛牛舌（$240）

終於到主角出場，打頭陣的牛舌柔韌而富肉味，簡單的灑點鹽，真是人間美味。

日本砂肝

Japanese chicken kidneys

日本雞腎（$140）

兩款爽口野打孖上，雞腎的爽彈比牛舌強得多，送啤酒啱晒。

とうみょう

Japanese snow peas leaf

日本豆苗（$120）

用錫紙包好再烤，沒有難聞的臭青味，色澤翠綠幼嫩，正好清清味蕾。

味来とうもろこし

Mirai tomorokoshi

味來栗米（$200）

白中透黃的味來粟米，烤至外層微焦，一咬穿，即時傳來甜美的感覺，好味。

殻付帆立貝

Scallop in shell

殼付帆立貝（$360）

火喉啱啱好，肉質絲毫不覺韌，吃得出的鮮味。

殻付岩がき

Karatsuki iwa-gaki

日本岩蠔（$200 up）

超大隻，肉質肥美可口，蠔味濃，海水味輕盈，滿意。

銀鱈西京焼

Cod fish

西京銀鱈魚（$290）

滿是魚油的香味，魚肉嫩滑到可以不用咀嚼，魚皮份外惹味，千萬不要錯過。

宮崎牛肉 A4

Miyazaki beef steak A4

宮崎牛肉A4 (280g) （$980）

師傅細心地先將邊位油脂割開另外處理，燒到卜卜脆好香口。

而牛肉就烤至肉香四溢，質地鬆軟有嚼口，中間位更是呈誘人的嫣紅色，滲出少許血絲，好食到停不了。

意猶未盡，又見好傾，師傅即興送上幾串雞肉串，內裡夾有已刴碎的雞軟骨，烤得焦香又有嚼口，正。

食得肉類多，臨時追加沖繩苦瓜同露筍，雖說沖繩苦瓜比起什麼雷公鑿更澎湃，但老實講，在下係甘之如飴，爽口程度爆燈，我鍾意；而露筍大大條但又好爽甜，收貨。

すいみつももシャーべット

Coconut, Peach, Apple sherbet

椰子﹑蜜桃﹑蘋果雪葩（$100）

甜品是椰子﹑蜜桃﹑蘋果三款雪葩，當然係互相share啦。

三款中個人偏好椰子，內裡有著絲絲椰子肉，香味好突出；至於其他兩款都不錯，果香味好出，但個人覺得偏甜。

整體而言好滿意，師傅掌火能力一流，而且揮灑自如，又好傾得，時間過得特別快。

Facebook 專頁 : Harbour Grand Kowloon

地址
: 紅磡德豐街22號海濱廣場二期地下

電話 : 2996 8438

味道 :
4 環境 : 4
服務 : 4 衛生 : 4 抵食 : 4 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

酒店扒房任食法國生蠔($250) X 牛扒 ( $420 ) (6月作出調整) @ Harbour Grill ( 紅磡九龍海逸君綽酒店 )

疫情好返少少，晚餐時間同人數都放寬，的確令好多餐廳乘時推出優惠。

早排試過紅磡海逸君綽酒店扒房 Harbour Grll 套餐，以為已經好抵食，點知好戲在後頭。

原來逢星期一至五，另有特別優惠（但其後太受歡迎，所以在價格及菜色上都有所調整，文末會再講）。

5月31日前

星期一，Free Flow 法國生蠔（$208）

星期二，Free Flow 法國青口（$208）

星期三，Surf & Truf ($408)

星期四，和牛漢堡（$168）

星期五，Free Flow 牛扒（$328）

星期一，生蠔

$208加埋一，都係$250有找，晚飯可以食d乜？

如果話比妳知，兩位女士可以每位食4打以上生蠔又點玩法？

當日餐廳選用法國 Huitre Fine 生蠔，體形大概是no.3/4左右，可以分即開生蠔又或是芝士菠菜茸焗，一行4人，先來生熟各一打，基本上是秒殺，餐廳上菜速度亦合理，因為無時間限制，同行兩位女士前前後後至少每人4打，今次真係有本有利，就算加杯酒都係多一百幾十，相當相宜，喜歡食蠔的朋友，絕對是最佳選擇。

星期五，牛扒

先後試了三塊。

第一塊，medium rare，生熟程度啱啱好，但可能燒網未夠熱，所以表面欠了焦香。

第二塊，medium

賣相靚好多，網紋清晰可見，肉香與焦香夾雜，好味。

除了第一塊有烤蒜及薯條外，打從第二塊已經是實牙實齒一塊上，仲好，免得浪費，提一提，薯條即炸，超正。

第三塊，medium

已經烤得駕輕就熟，無須多講，依然消滅了。

連另叫麵包籃及兩款甜品，埋單人均$550，問大家去邊度搵？

6月後，除價格作出調整外，仲要每位係a la carte menu內點上是旦一樣，舉例，可以加個甜品。

星期一，Free Flow 牛扒（$420）

星期二，Surf & Truf ($420)

星期三，Free Flow 生蠔（$298）

星期四，Free Flow 香煎鵝肝（$268）

星期五，Seafood Platter（生蠔、龍蝦、蟹爪、青口、帶子及海蝦）（$688/兩位）

其實每晚都有不同 Table Wine 供應，都是$100 以內！

最後都要提提大家，畢竟是優惠期，餐廳有可能作出改動，最好係用餐前問清楚收費詳情，以免引起爭執。

Facebook 專頁 : Harbour Grand Kowloon

餐廳專頁 : Harbour Grill

地址
: 紅磡德豐街20號九龍海逸君綽酒店地下

電話 : 2996 8433

味道 : 4 環境 : 5 服務 : 5 衛生 : 5 抵食 : 5 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

難以置信的性價比 X 指定日子一個價錢任食法國生蠔、藍貝或牛扒 @ Harbour Grill ( 紅磡九龍海逸君綽酒店 )

九龍海逸君綽酒店出入了多次，但Harbour Grill 倒是初次邂逅。

餐廳不單坐擁180度海景，而且座位間寬敞得令人難以置信，作為Fine Dining的餐廳，又在酒店之內，原以為收費會較進取，但當望望近日的推介時，確實是有驚喜。

未分享Set Dinner時，先講講餐廳另一種CP值超高的晚餐。

由星期一至五，餐廳每晚都有不同的優惠。

星期一是All You Can Eat 法國生蠔，仲可以選擇熟食，都只不過是$208，無聽錯，真係$208，當然，並不包頭盤、前菜及飲品，另外仲要加一，但試想下一隻生蠔要幾錢？食一打有幾難？

星期二又係任食 French Bouchot Mussel（$208），仲要加埋薯條，死未？家陣係一間普通餐廳炒碟本地蜆都要一百幾十啦，係咪？

星期三、四就並非任食，星期三係龍蝦配安格斯牛（$480），星期四則是和牛漢堡（$168），係咪好抵食呢？

至於星期五，又返到任食安格斯扒的日子，都只不過$380，換上了牛魔皇，簡直是難以自控。

言歸正傳，又講下每晚都有既 Set Dinner。

前餐先送上煙肉包及芝麻包，兩款同樣是Homemade的，誠意十足，而且做得相當有水準，上檯時仍帶微溫，而且外脆內軟，陣陣芳香，塗點牛油食，真係人間美味。

單係 Appetizers 已經有5款選擇，有沙律、Balik Salmon配法式酸奶油及 Beluga caviar、帶子配藍蟹餅、法國田螺及法國鴿肉，已帶來無限驚喜。

U10 scallop And Colossal Blue Crab Cake

肥大肉厚的帶子輕輕煎過，加上藍蟹餅，伴以海膽及香草牛油汁，完美的把海洋的味道帶給大家。

French Burgundy Escargots

若果想轉轉口味，又有法國 Burgundy 田螺，而且足足有8隻，份量超多又夠大，蓋上香草醬，再以蒜蓉牛油焗至啱啱好，用小叉輕輕一挑，就已經可以享用，正。

Pigeon Ballotine

其實最有驚喜的，就一定是香煎白鴿卷配黑松露汁。

足足有兩大件鴿肉，以煙肉緊密包好，鴿肉柔軟嫩滑，質感上佳，而且吸收了煙肉的香味，又有黑松露汁的點綴，實在精彩。

Soup

又係有兩款。

White Truffle Cappuccino

試了一口朋友的選擇，湯面白松露泡沫輕若無物，但又幽香四溢。

Boston Lobster Bisque

龍蝦湯質地濃稠，每口都是龍蝦的精華，舀一下，更是有不少新鮮龍蝦肉，喜歡的朋友絕不能錯過。

到了主角出場的時間。

之前提過星期三係海陸大會，客人可以在海鮮類及肉類各選一款。

Surf & Turf Main Course

同行朋友就選了龍蝦與西冷的組合。

Atlantic White Cod Fillet

鱈魚不單份量十足，煎得恰好，試了一口，魚香味豐富，質地幼滑，下次再來要自己好好享受一份。

Gratinated Lobster or Lobster Thermidor

海鮮類又怎能缺少龍蝦呢？龍蝦吃得出的新鮮，肉質爽彈又多膏，Thermidor sauce
甜美豐腴，可說是絕妙的演繹。

Australian Ocean Trout

至於另一道就是澳洲海鱒魚，喜歡海魚的朋友，又多一款選擇。

Chor-Grill

US Stockyard Black Angus Beef Sirloin

炭燒美國安格斯西冷牛排

表面用炭火烤至有網紋，多了一陣炭香，而medium rare的控制，肉質呈嫣紅色
，相當對辦，肉味豐富有嚼口，個人喜好蘸點海鹽，增添鮮味，伴碟的蒜片脆卜卜，又是不可錯過。

US stockyard Black Angus Beef Tenderloin In Lavender Crust

炭燒美國安格斯牛柳

友人的牛柳同樣吸引，在medium rare加持下，肉質鬆軟，肉味豐盈，兩者是各有千秋。

Pyrenees Hall Milk Fed Baby Rack

炭燒草飼羊架

或者是今晚的亮點，撲上香草的外層，火喉控制一流，切開一試，又是完美的嫩滑質感，少許羊肉應有羶味而不過火，細想起來，可以話是近幾年食過最佳的烤羊架。

Dessert

Cheese Platter 是廚師以當天貨色來提供，雖然會是靚貨，但因為火焰雪山是二人份，唯有留待下次吧！

Mille Feuille

黑與白的對踫，先試味道清香的吉士忌廉法式千層酥配雲呢拿雪糕，酥脆的口感，層次分明，輕易令愛甜的朋友秒殺了。

Rich Chocolate Crunch Cake

一向喜歡濃度高的Dark Chocolate，內裡更有脆脆的口感，配以朱古力雪糕，我鐘意。

Baked Alaska Ice Cream

（須要另加$120，但份量足夠兩位享用）

勾起了小小拍拖回憶，當年跟太太食Buffet，其中一個亮點就是每晚都有火焰雪山的出現，當然，二人份大極有限，或者下次同太太慶祝結婚周年，又多了一個選擇。

Coffee or Tea

最後當然要來杯 Earl Grey Tea，好讓幽香的佛手柑味道，清洗一下味蕾。

連加一都只不過$1000左右，但由餐包至餐飲都令人有滿意的感覺，而且冷眼旁觀，侍應的服務相當到位，可能餐廳內的桌數不多，能顧及每檯客人的需要，又是一個加分點。

實在忍不住 All You Can Eat 的誘惑，跟幾位朋友已經即時 book 定食蠔同扒，未知大家又會選那一天？

Facebook 專頁 : Harbour Grand Kowloon

餐廳專頁 : Harbour Grill

地址
: 紅磡德豐街20號九龍海逸君綽酒店地下

電話 : 2996 8433

味道 : 4 環境 : 5 服務 : 5 衛生 : 5 抵食 : 5 位置 : 4

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip

衝動點唱 X Godiva 甜蜜獻禮下午茶 @ Green ( 尖沙咀唯港薈地下 )

近年的 Afternoon Tea Set，已再不是單純的三層架，少女們的打卡點，反而是更多完化，早前曾同太太在8號風球下試過懷舊式的下午茶，而今次同樣是帶點懷舊風的《Gifts Of Godiva》Afternoon Tea。

Hotel Icon 的 Green，榴槤甜品做到出神入化，一提起榴槤，第一個聯想起的，必定是 Green，但近日餐廳與朱古力品牌Godiva聯乘，推出了充滿了玩味的下午茶。

Menu收藏在黑膠唱片封套內，形神俱似。

最厲害是擺放食物的竟然是一部會轉動的唱片機，的確令人勾起香港樂壇最光輝燦爛的年代。

Godiva 甜蜜獻禮下午茶

星期一至五每位$408/兩位$748

星期六日及公眾假期每位$438兩位$788
每位客人可獲得法國氣泡酒乙杯

先講講其中一個亮點，就係兩小時 Free Flow Godiva 朱古力軟雪糕，除了用小碗盛器外，更可以選擇甜筒，再任意擺上朱古力草莓，成件事真係開心好多。

Savouries 鹹點

朱古力脆皮鴨肝慕斯伴黑魚子

很有趣的組合，入口先知道係鴨肝慕絲，外層是脆卜卜的白朱古力，有鹹甜夾雜的感覺。

Impossible 他他

用 Impossible 肉，質感與真肉稍微有出入，但近年興素食，也好，健康點嘛！

煙三文魚伴三文魚子

三文魚吃得出的肥美，但略嫌放在湯匙上比較佔地方，令到整體感覺睇落逼狹，有點美中不足。

甜蝦血腥瑪麗、辣肉腸橄欖串

兩款鹹點結合，Martina 杯內是
Bloody Mary，陣陣辛勁好刺激，配上甜蝦及辣肉腸橄欖串，絲毫沒有違和感。

甜點

Godiva朱古力

用上自家品牌包裝紙，內裡是 Godiva 朱古力，可以拎返屋企慢慢嘆。

酒漬櫻桃黑朱古力

賣相別緻可愛，同行朋友笑說可以當耳環排，其實黑朱古力與酒香非常匹配，一試便會愛上。

伯爵茶黑朱古力慕絲

慕絲幼滑如綿，沁出佛手柑的香氣，又有黑朱古力的甘甜，我喜歡。

檸檬馬鞭草覆盆子馬卡龍

賣相猶如一個迷你手袋，幾可愛，外層飽滿，咬落微脆，不錯。

自家製碎榛果朱古力

外層是碎榛果，內裡是濃郁的朱古力。

鬆餅

Afternoon Tea 又怎能欠缺少鬆餅？

除了雪糕以及草莓朱古力free flow外，仲有小巧的火腿芝士三文治（綠）及吞拿魚三文治（紫）提供，原來綠色麵包是加入了菠菜汁，而紫色的是用上紫甘筍，如果一次過享用，其實都幾飽肚。

餐飲確實有令人花多眼亂的感覺，但記得要「棉花糖朱古力」，因為在熱燙的朱古力中放入棉花糖花，然後在朱古力中慢慢開花，有水中蓮的感覺。

再來一杯 Earl Grey Tea，佛手柑的幽香沁人心脾，這個下午太美妙了。

#hoteliconhk

Facebook : GREEN at Hotel ICON

酒店專頁 : Hotel Icon

地址
: 尖沙咀科學館道17號唯港薈地下

電話 : 34001300

味道 :
5 環境 : 4
服務 :
5 衛生 : 5
抵食 :
5 位置 : 5

希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!

http://www.facebook.com/foodiephilip