Category archives: 屯門

 早排同轉工朋友食點心放題後，心思思又想食（其實已經成日食），不過今次係同另一位又係轉工朋友飲茶兼食飯。 以前新婚住屯門，已經經常懶浪漫同太太去黃金海岸行沙灘，有時係酒店食Buffet，反而中菜廳就比較少。 事有湊巧，又係有朋友轉工，飲茶傾計最啱我。 因利乘便，就選擇中菜廳［粵］。 先由幾碟點心打頭陣。 就快到新年，率先點了發財黃金元寶（$68），即叫即蒸，撕開一睇，內裡是呈流心的椰汁奶黃，既香且滑，又好意頭，最啱新年食，而且晚市都有得供應，正好用來頂替甜品。 筍尖蝦餃、海皇芝心芋角、奶皇金雞酥（$88）2011美食之最大賞（金獎） 作為餐廳獲獎名物，當然有期待。 先試中間的筍尖蝦餃，餃皮搓得通透，滿有彈性，蝦肉爽鮮，尤其是加入筍尖令口感更佳。 炸芋角食得多，用海鮮餡料亦常見，但加入芝士令味道更豐腴，效果不錯。 至於賣相最萌的金雞酥，咬落幾鬆化，內裡奶皇可以掛住影相，平白浪費時間，變得微溫，相信快少少食效果更好。 金牌焗釀鮮蟹蓋（$148/位）朋友最愛的菜色，以酒店價計，實在好相宜，蟹蓋表層芝士焗得焦香，內裡是滿滿的蟹肉，下點陳醋來提鮮，食味更佳。 脆皮桂花刺參（$368）睇落平平無奇，其實係刺參內藏蝦膠，而蝦膠亦包裹了桂花蚌，口感層層不同，外層是微脆的刺參，中間係彈牙的蝦膠，最後係爽口桂花蚌，美妙的組合，我鍾意。 蝦籽柚皮（$198）看似收得貴，其實背後所花的心機時間，才是菜色的神髓，柚皮汆水處理極佳，絲毫沒有苦澀味，入口即化的感覺真好，又有蝦籽的香氣加持，有水準。 鳳躍天仙（乾坤無花果鹹檸雞煲）（$318/半隻，$618/全隻）2015美食之最大賞又係一道得獎菜，以鹹檸加無花果煮雞，微酸的鹹檸，以自然的無花果的香甜帶來了平衡的口感，雞肉嫩滑而入味，就連冬菇沾上了醬汁都變得吸引，配返碗白飯一流。 聖誕氣氛啱啱過，轉眼又到農曆新年，而每到節日，都會勾起對雙親的思念，無他，老一輩都喜歡親自製作應節食品送給親友，而雙親健在時，每年端午節裹糭、春節炸油角及蒸糕總是少不了，但多年積聚的情感，的確令自己加倍喜愛吃糕點。 而今年率先品嚐了來自黃金海岸酒店中菜廳［粵］的蘿蔔糕。 真空包裝處理下，確保衛生，但因為沒有使用防腐劑，所以一打開真空包裝就要快食。 食蘿蔔糕，不外乎蒸、煎、炒同炸，個人而言，想快靚正一定係煎至兩邊微焦，食既時候再蘸點辣椒醬或者XO醬，惹味到一個點，正。 Facebook : 香港黃金海岸酒店 地址 : 屯門香港青山公路1號香港黃金海岸酒店低層地下   電話 : 2452 8668   味道 : 5  環境 : 4  服務 : 5  衛生 : 5  抵食 : 4  位置 : 3  …

 早兩日入黃金海岸酒店慶祝朋友轉工兼聚舊，見仲未夠鐘，正好四圍行下。見酒店大堂 Lobby Lounge 的凍櫃，有餅房 homemade 的糕點，而且都係$58左右。 當中最吸晴的，就一定係主打的西式賀年糕點～［招財進寶］（$398 / 1.5lb）。 其實係［士多啤梨乳酪雜莓醬慕絲脆餅］，放上九個造型別緻有趣的金元寶，仲有幾隻跳脫可愛的白兔仔隱身其間，而當中一個金元寶更是有驚喜餡料，正好一家人齊齊分享。訂購傳送門   :   https://bit.ly/3k4D8Cl 若果想一個人靜靜享用都無問題，因為有單件購買，都不過$58/件，非常方便。 另一款節日蛋糕［伯爵茶牛奶朱古力橘子慕絲脆餅］，外觀好似一隻柑橘，又係滿有節日氣息，同樣都係$58/件。 其實 order 得一件餅，不如比多些少，因為$98，就可以free flow飲品，平日飲杯咖啡都四、五十蚊，家陣可以係酒店 Lobby Lounge 慢慢嘆足一個下午，簡直值回票價。   Facebook專頁 : Hong Kong Gold Coast Hotel 地址 : 屯門青山公路1號香港黃金海岸酒店大堂   電話 : 2452  8338   味道 : 4  環境 : 4  服務 : 4  衛生 : 4 …

 上次跟朋友入去屯門黃金海岸酒店的扒房食下午茶，半路中途竟然有酒店農莊Gold Coast Farm的導賞團。遇上收割日子，仲可以免費割菜摘瓜果返屋企加餸，酒店不單有活動適合不同年齡人士，更重要係有環保意識，因為而種植的菜蔬，部分會用作慈善用途又或是員工飯堂之用，保證不會浪費，真係WW。 行一轉農場，割下菜已經玩足一個下午，因利乘便，晚餐就係扒房解決。 無他，食了好多次，依然覺得扒房主打的［海岸扒房特選燒牛肉套餐］超抵食。 因為只要 order 以下其中一款，The Starter Cut ( 5oz / $358 )、或The Signature Cut ( 8oz / $608），就附送價值$138以下沙律/湯/甜品，性價比相當高。 再加上配時蔬及Yorkshire pudding，套餐就更加豐富。 就算加埋 Table Wine 都係預算之內，有時 Fine Dining 都可以好相宜。 牛扒會用餐車推到客人眼前，然後按客人要求切出份量，再配上 side dishes，正好讓客人慢慢享用。 前菜水牛雞翼（8隻 / $148）出奇地選用體形較大的雞翼，即炸當然好食，辣辣地好惹味，蘸點藍芝士醬，味道更可口，怕熱氣？伴碟有青瓜及西芹幫幫手，夠細心。 新奧爾良蟹肉餅（$138）足有三大件，啖啖肉無得輸，配上蛋黃醬令味道更具層次，又有新鮮牛油生菜作伴清清味蕾，正。 湯法式焗芝士洋蔥湯（$98）一揭開盅蓋，便瀰漫濃郁的洋蔥及芝士的香氣，湯色清澈，而洋蔥的甜美亦完全融入湯裡，個人覺得必飲。 主菜味增香煎北海道帶子（5隻 / $288)原隻北海道帶子好肥美厚身，稍微煎香兩邊，內裡依然保留嫩滑的肉質，而伴碟是烤蘆筍、野菌及薯蓉，份量不少。 龍蝦意式扁意粉（$188）龍蝦是新鮮起肉煮，肉質爽彈，而意粉煮至 al dente，沾上了龍蝦汁，令人吃得欲罷不能。 甜品蘋果金寶配雲呢拿雪糕（$138）海岸扒房既蘋果金寶，可以話係佢地既 signature dessert，但製作時間要30分鐘，想食又不想浪費時間，麻煩落 order 時一次過講埋。 因為即叫即製，外層烘焙得恰好，邊位帶焦香，一切開便會冒煙，內裡是滿滿的蘋果餡料，配上雲呢拿雪糕，真是人間美味。 Facebook專頁…

 屯門的黃金海岸酒店，也許是我留下最多回憶的地方之一。 當年跟太太新婚期間，就是蝸居於屯門，所以每當踫上好天氣，又或是想慶祝時，都會跑到去酒店餐廳又或是旁邊的海灘逛逛，說起來真是留下不少足跡。 其實上半年酒店方面經重新打造後，增設了陶瓷工藝坊以及烘焙工作室，令整間酒店，除了海灘與美食外，加添了活動元素，令staycation時更豐富。 但工作室並非單單比錢就可以玩，基本上有套餐提供，最平玩法係星期一至星期四，$450/位，包一杯 Lobby Lounge 飲品，而星期五、六、日及公眾假期（$550/位），8歲以下小朋友仲可以由家長陪同，又係一個親子時光。 今次就先試試最新推出的下午茶，之後再去整餅！ 大家可以係酒店的 Gold Coast PRIME RIB 享用以柚子作主題的 “Aromatic Yuzu Afternoon Tea清香蜜柚下午茶”。 而餐廳正正面向泳池景，是日天氣又好，好有悠閒的氛圍。 之前跟囝囝staycation，已經試過特色主題房下午茶，而今次下午茶以懸吊三層架奉上，賣相似乎下了點心思。 SavouriesBlack sesame cones stuffed with shrimp and yuzu柚子蝦肉黑芝麻脆筒以迷你雪糕脆筒放入柚子肉及蝦肉，再灑上黑芝麻，很有泰式風味，咬落脆卜卜，我又幾鍾意喎！ Tuna tartare with yuzu dressing吞拿魚他他配柚子汁魚香中帶柚子的清新感，放上艷紅色的薄脆片增色，效果不錯。 Japanese yuzu with crabmeat sandwiches日式柚子蟹肉三文治甜美可口，加上少許沙律菜，口感清新。 Seared scallops with yuzu vinaigrette香煎帶子配柚子油醋汁帶子兩邊煎得微焦，澆上了油醋汁，微酸的味道，不單起了提鮮的作用，正好平衡了甜膩的感覺。 Deep-fried battered fish bites with yuzu salsa炸粒粒魚配柚子沙沙賣相很有趣，炸魚以意大利青瓜片包紮，再用竹籤插好，加上車厘茄來點綴色彩，沙沙內有彩椒粒及柚子肉，都幾好味。…

 實在有好一段日子沒來屯門了，近日靜極思動，懶骨頭居然想郁動一下，老遠跑到屯門見工。 見工過程尚算順利，但成功與否倒是平常心，甫出門口，心下一鬆，便覺肚餓，沿著黃金海岸的海邊緩跑徑，信步去到酒店找老朋友敍敍。 大堂因為近月迎接聖誕來臨，酒店以動漫「比卡超」作擺設，佈置成多個打卡點，喜歡「比卡超」的朋友可不要錯過。 中菜廳食了好幾次，同名沙嗲軒菜色只在尖沙咀店品嚐過，屯門店多年來都是擦身而過，正好來個輕食午餐。 啱啱 interview 完，天氣又乾燥，口渴到一個點，即時來杯薏米水，清潤甜滑，正好。 餐前小食是「黃金魚皮」，即炸即食熱辣辣，入口時仍感到一陣咸蛋香及熱氣，咬落脆卜卜，送啤酒真係絕配。 五香腐皮豬肉卷（$78）外層又係炸得香脆，未食已傳來五香粉的氣味，豬肉夾有少許肥肉，油香令口感及味道增添吸引力，蘸點帶甜的黑醬油會更惹味。 沙嗲雞及豬（半打/$138）店名稱得沙嗲軒，串燒沙嗲當然有水準。 朋友是免牛族，只點了雞及豬串燒，邊位有焦香，甜甜地又有花生香的沙嗲是靈魂所在，令味道提升了不少。 海南雞飯（$168）用上新鮮雞，雞味比冰貨好多了，雞肉嫩滑，尤其是有三色醬提供，相當對辦。 雞油飯粒顆分明，而油份又足，食得人心花怒放，配上一小碗雞湯當然是加分點，因為坊間好多食肆求其加碗不知名例湯就胡混過關，但如果是雞雜湯我會更欣賞。 蒜蓉咸魚炒芥蘭（$98）吃得太多肉類，想食點菜蔬清清腸胃，朋友二話不說，就來個蒜蓉咸魚炒芥蘭，菜炒得嫩綠，每條都有咸魚的香味，食落亦翠嫩，但略嫌油份偏多。 未知他日會否在附近上班，整個Lunch Time 就在說說笑笑中度過！ Facebook 專頁 : Hong Kong Gold Coast Hotel 地址 : 屯門青山公路1號香港黃金海岸酒店大堂   電話 : 24528822   味道 : 4  環境 : 4  服務 : 4  衛生 : 4  抵食 : 4  位置 :…

以往跟太太入屯門黃金海岸酒店，都是食Buffet、逛沙灘為主，近年反而多了造訪「粵」中菜廳。 早前見又有新菜色推出，當然食指動，一於拉隊試試。 酒店除了有「聆渢咖啡廳」的自助餐聞名外，更有富南洋風味的「沙嗲軒」，輕輕鬆鬆飲返杯的「LobbyLounge」，與及相當抵食的「海岸扒房」，而「粵」就是位於酒店低層地下。 畢竟是在限聚令下，酒店方便是跟足防疫措施，就算是在私人廂房，依然是四人一檯。 前菜著實有點新意，「紫薑皮蛋鴨肉伴薑蓉」賣相以為是青瓜卷，內裡卻是子薑片包裹的松花溏心皮蛋，層層疊疊，口感複雜，更以薑味Jelly置底，令味蕾為之一醒。 而另一道看似簡單的「香煎北海道帶子」，以刺身級別的厚肉帶子煎香兩邊，放上食用花來添色，置底是刴得細碎的薑蓉揉合了中西式的處理手法，卻沒有違和感。 湯品是原個椰皇上的「椰皇燉花膠螺頭湯」，一揭蓋已是陣陣香氣瀰漫，湯料是花膠、響螺及上肉，火喉十足，入口醇香清甜，舌底生津，就連椰皇肉都可以刮起享用。 老實講，食材靚已經贏在起跑線上，加上廚師的巧手處理，更是無得輸，原隻肉蟹鉗拆殼的「荷葉冬瓜鮮蟹鉗」，蟹鉗啖啖肉，而冬瓜片用上湯燴過，更突顯出蟹肉的鮮甜，實在無須太多花巧。 所謂「無雞不成宴」，來一道「干邑生煎雞」正好。用小砂鍋上檯，享用前先在蓋邊澆上干邑，好讓美酒沿鍋邊滲入，一揭蓋，傳來陣陣干邑的酒香，雞是用上了新鮮貨，雞肉不單吸收了酒香，而且嫩滑得可以，正。 單尾是「桂花蟹肉金瑤炒米粉」，新竹米粉炒得好乾身，絲毫沒多餘油份，混和炸過的金瑤柱口感更佳，最正是配上大廚homemade的 X.O醬，食落更加惹味。 壓軸當是甜品時間，一碟三款的「越式美點」，包含了宮廷棗皇糕、腰果酥及香芒楊枝甘露。 棗皇糕不會一味死甜，而是帶少許果酸，平衡了不少甜膩感。 腰果酥咬落鬆化可口。 香芒楊枝甘露甜美芳香，難怪一直是最受歡迎的甜品之一。 餐後再來一個新鮮的「雜果杯」，內裡有新鮮無花果、芒果、蜜瓜、哈密瓜、西瓜、藍莓及士多啤梨，實在相當豐富。 Facebook : 香港黃金海岸酒店 地址 : 屯門香港青山公路1號香港黃金海岸酒店低層地下   電話 : 2452 8668   味道 : 5  環境 : 4  服務 : 5  衛生 : 5  抵食 : 4  位置 : 3   希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!   http://www.facebook.com/foodiephilip

 屯門是個令自己留下美好回憶的地方。 新婚的頭幾年，就是蝸居在屯門。 雖然有人說屯門位置偏遠，但細心一想，卻又有可愛之處。 當年兩口子每每在星期天不用上班的日子，去哥爾夫球練習場幾十蚊可以玩玩揮棒，紅樓附近探探幾隻退役馬王，晚媽媽係屯門碼頭釣魚，半夜肚餓走訪大興良景友愛的車仔檔，又可以去黃金海岸逛逛市集，真是樂在其中。 今日好多地點已經消失，但黃金海岸酒店仍在，早幾年曾到訪過黃金海岸扒房，實在相當抵食，想不到事隔幾年，價錢都好似無加到，難道是通脹敵人？ 餐廳靠窗位置可望到泳池景，稍遠處是高聳的亞熱帶植物，好有置身異地的氛圍。 若然閣下是享用自助餐，部份餐桌更加可以與泳池近距離接觸，如果有小朋友，餐廳旁邊更有大草地可以比小朋友放電。 酒店本身更設有「黃金海岸酒店農莊」，不定期會有親子班，收費大概$200左右，不單會有專人導賞，仲會收割農作物給小朋友回家享用。 望望海岸扒房特選燒牛肉套餐，是根據不同扒類的切法來定價，而且附送價值$138或以下的沙律、湯或甜品乙客。配時蔬、約瑟布甸及肉汁。 當中包括了香煎特選牛肉滋味薄切（The Starter Cut）（5oz/140g）（$358）/ 招牌特色切（The Signature Cut）（8oz/228g）（$518）/豐盛厚切（The Jumbo Cut）（10oz/280g）（$608）。 朋友及自己分別點了薄切及厚切兩款。 薄切在份量上比較適合女士，肉味當然不錯，但比較易熟，伴碟的雜菜份量不少，車厘茄、西蘭花、荷蘭豆、椰菜花及烤蒜，當然更少不了約瑟布甸，若是加上沙律或湯，其實已經好夠飽。 而 Jumbo Cut 當然大得多，比薄切足足大了一倍，但價錢只不過多了$250，近半吋厚肉，中間是誘人的嫣紅色，偶爾有血絲滲出，咬落鬆軟有嚼口，肉味濃，簡單的下點鹽提鮮已經好好。 如果對特選牛肉沒興趣，仲有挪威三文魚扒、香煎北海道帶子、素牛肉漢堡包、紅菜頭意大利飯、龍蝦意式扁意粉、 美國肉眼扒、澳洲草飼羊扒、烤嫩豬排骨及燒烤拼盤，最相宜的紅菜頭意大利飯，都不過由$168起跳，加個前菜同甜品，連10%服務費，三個Course都係$400落樓，以酒店扒房而言，CP值相當高。 Starters 前菜新奧爾良蟹肉餅（$138）由於蟹肉並非沙律、甜品或湯，所以要另外加錢，一碟共有三件，配上蛋黃醬及牛油生菜，蟹肉上檯時仍是熱辣辣，夾起來質地鬆軟，蟹肉的份量不少，蘸點蛋黃醬更覺甜美可口。 其他前菜仲有烤焗薯皮（6pcs/$78）配熱溶車打芝士及水牛芝士、煙肉碎、酸忌廉及青蔥、墨西哥芝士脆片（$128）配熱溶車打及水牛芝士、橄欖、烤紅甜椒及墨西哥辣椒及水牛雞翼（8pcs/$148）配青瓜、西芹及藍芝士醬。 Soup 湯是日精選餐湯或法式焗芝士洋蔥湯（$98/款）西湯中，洋蔥湯可說是其中一種最愛，尤其是洋蔥煮至軟腍，自然散發甜美，放上法式麵包及芝士，麵包蘸滿了湯汁變得海綿狀，食落滿口都是湯汁，超正。 Salad 沙律本地水耕雜菜沙律（$138）既然是套餐所包的上限，當然要點選。沙律菜配上鮮芒果肉及松露炒野菌，吃起來清新爽脆，正好先清清味蕾，準備享受之後牛扒。 其他可供選擇的沙律有十青沙律配芝麻汁（$118）配牛油果、青露筍、青瓜、西芹、青甜椒、西蘭花、青蘋果及胡麻醬；又或者經典凱撒沙律（$128）另加$60可升級為煙三文魚凱撒沙律。 Dessert 甜品可以選擇Häagen-Dazs 雪糕（三球）（$98）/無奶雪糕（二球）（$98）/ 蘋果金寶配雲呢拿雪糕（$138）（製作時間約需三十分鐘）或秘製香滑芝士蛋糕配時令莓果（$138）。 如果同另一半各自點套餐，The Starter Cut 都係$358，仲可以一齊share，幾好吖！ Facebook 專頁 : Hong Kong Gold Coast Hotel 香港黃金海岸酒店…

 今個新年相信好多人免得過都不會去拜年，留係家中自行製造結界避疫，但始終都要有新春氣氛，今次就介紹屯門黃金海岸「Gold Coast Prime Rib」推出既「Chinese New Year afternoon tea set take away 賀年外帶下午茶」（原價$588/兩位，七折後折實價$411.6/兩位）。 廢話少講，一於入正題。 由於酒店內有粵、沙嗲軒及Prime Rib等好幾間餐廳，所以下午的陣容，可說是涵括了幾間餐廳的精心設計。 除了基本鹹甜點外，更加插了新元素。 挪威煙三文魚三文治賣相有如一杯嫣紅的玫瑰花，三文魚肉帶柔和的煙燻幽香，不錯。 芝士火腿三文治很平穩紮實，丁方大小，OK啦！ 北京填鴨卷配海鮮醬想不到下午茶會有北京填鴨，加埋青瓜絲同京蔥一齊食，建議叮返熱，好讓鴨油更香。 鮑魚撻新春菜色，又點可以無鮑魚呢？鮑魚細細粒咬落柔軟入味，放入微波爐略為加熱，撻皮依然酥化，好味。 叉燒酥可能酒店本身有中菜廳，所以下午茶中注入不少中菜元素，放得落menu，當然有信心，叉燒酥就算凍食依然可口，真係要搵次去飲茶，試下其他點心。 和牛酥似乎都幾多酥皮菜色，相比之下，個人會喜歡和牛酥多一些，因為有點新意，和牛份量啱啱好，牛味突出。 迷你雞肉漢堡配泡菜醬漢堡包幾鬆軟，雞肉塗上泡菜醬辣辣地好惹味。 恭喜發財（朱古力爆炸糖慕斯）終於入正題了，先來兩枝好似爆竹的朱古力慕絲，連同爆炸糖一齊，在口中「霹靂拍勒」作響，加些少聯想，係咪好有放爆竹的感覺呢？ 花開富貴（茉莉花慕絲配雲呢拿脆餅）慕絲質地滑溜，又有茉莉花香味，相信會得到女士們的歡心。 五福臨門（櫻花芝士餅）平實的外表，但入口是好豐腴的芝士味，最啱配杯香濃的咖啡。 金玉滿堂（芒果柑橘慕絲）放上金錢形狀的朱古力片，非常好意頭，芒果與柑橘的甜酸平衡得好好。 英式鬆餅配奶油忌廉及雜莓果醬叫得下午茶，又點可以無英式鬆餅？尤其是塗上Clotted Cream或者果醬，邊食邊嘆茶，同朋友傾計就最正。 馬卡龍畢竟是新年，加了「福」字，過年氣息更濃烈，外形漲卜卜，咬落微脆，內裡軟綿，而且甜度適中，個人幾鍾意。 旺來酥聽個名又幾有趣，食落感覺似鳳梨酥，翻查資料，原來是新加坡的賀年食品，因為閩南語將鳳梨叫作「黃梨」，取其諧音「旺來」，真係好啱新年氣氛，而且在下午茶供應期間有得另外購買，大概$100/15粒，用作拜年送禮又幾好喎！ 蛋撻當然是迷你版本，牛油酥皮可能掛住影相，放得太耐，所以未夠鬆化，但非戰之罪，反而蛋香不俗，相信堂食會表現更好。 整體是充滿新春氣息，但有一點要注意，如果路途遙遠，拎到返屋企最好第一時間享受，否則賣相會有些少出入，賣相就無咁吸睛啦！   地址 : 屯門青山公路1號香港黃金海岸酒店大堂   電話 : 2452 8636   味道 : 4  環境 : 4  服務 :…

 記得新婚的溫馨日子，就是在屯門度過。當年每逢放假天，便會跟太太四處逛，偶爾去黃金海岸或食飯，但更多的時候，是在市中心看電影及晚飯，最記得「Titanic」都係當時睇，講返起都20年前既事。 唯一不變是，屯門市中心幾時都人山人海，消費品、日用品及食店林立，可以話足不出戶，係屯門都可以自給自足。 自從大概三年前品嚐過第一口一幻拉麵後，見證了一間又一間的開業，繼香港及九龍後，今次立戶屯門市中心。 既然係新開張，先講下有乜著數。 第一彈（2020年12月16日至20日） 開幕日起一年五日所有拉麵可以享用「得一賞二」優惠。凡惠顧任何一款拉麵可免費享用第二碗。 （ 贈送價錢較低之拉麵，加一服務費以原價計算） 第二彈（2020年12月21日至2021年1月10日） 新定限定拉麵套餐（一位用）$128 當中包括1.自選一款拉麵或拌麵；2.一客餃子五隻；一款指定飲品。 再送限量版 Hygiene of Sweden 抗菌潔手噴霧（$58） 第三彈（2021年1月11日至31日） 凡惠顧指定套餐，即可獲贈限量版摺疊式環保飯盒。 第四彈（2021年2月1日至28日） 儲滿一幻印花便可獲贈終極大賞福袋，包括一幻 x BRUNO 限量便當盒、一幻 powerbank 等。 （第三、四彈詳情將於一幻拉麵 Facebook 及 IG 公布） 未品嚐主角拉麵，先以「香辣甜蝦椰菜沙律」（$38）開開胃口，椰菜絲清新爽甜，而甜蝦炸得香脆可口，相當惹味。 而「餃子」（$35/5隻）煎得啱啱好，底部微焦，食落幾香口。 由於是首次立足屯門，所以推出了屯門店限定版「北の極蕃茄蝦湯拉麵」，麵底有粗麵（極太麵）及幼麵兩種，建議大家選擇粗麵，因為較易沾上湯汁。 很欣賞雖然是新開張，店內亦有十幾個客，但上菜的速度一點都不含糊，值得一讚。其實第一間灣仔店的拉麵，感覺上鹼水味未脫得清，想不到家陣咬落，既有嚼口，掛湯的能力不錯，就連鹼水都是若有若無，至於靈魂的甜蝦湯底，濃稠帶黏口，除了蝦香，更有番茄的鮮甜及微酸，原來是選用了 北海道下川町特級「北の極」蕃茄，吃起來感覺不會太膩。 配料本身有一片幾薄既叉燒，沒多少肥位，所以不覺有油香，但肉味幾濃，再有半隻溏心蛋，火喉控制得不錯。 加上特製麵酥、粟米粒及兩片番茄，食完真係幾飽。 其實仲有一款季節限定的「札幌咖哩蝦湯拉麵」（$78），自己真係食唔落，大家可以試下。 至於「蝦味飯糰」（$20/個）是用蝦湯煮飯，看似單調，內裡加入了蝦肉，咬起來軟綿，更是陣陣蝦香，亦是值得推介的菜色。 由於餐廳暫時未領有酒牌，所以只提供汽水及無酒精飲品，今日就試了西瓜及白桃味梳打，西瓜的賣相很Q，但味道一般，反而白桃梳打幾香，相信好啱女士。 今次係疫情下開新店，不得不說勇氣可嘉，亦都是信心的表現，老實講，拉麵質素的確比幾年前有進步，未知下次又會有乜新意？  Facebook 專頁 : 一幻拉麵Instagram : @ichigenhk  地址 : 屯門屯隆街3號屯門市廣場一期2樓2319號舖…

特意把文章放在正式退休後的日子。 早前稍微放鬆的疫情下，剛好來得及一個八人飯局。 「香港黃金海岸酒店」粵中菜廳，地點看似有點隔涉，但對於曾在屯門度過新婚生活的日子，實在是一個美好的回憶。 可能大家都鬱悶得太耐，是晚雖然是平日，但不論中菜，又或是旁邊的自助餐，都是高朋滿座，氣氛炒得火熱。 菜單是朋友精心挑選，餐前先啃著美味的合桃粒，聊聊天。 餐前小食是「香糟鮑片拌海蜇頭」，鮑片薄切下，香糟更入味；海蜇只挑爽勁的海蜇頭，經冰鎮過更覺清新。 好奇怪，自從多了點心放題後，好多酒店中菜廳都有蝦多士出現，水準雖然不俗，但部份出品美中不足，今次「鍋貼大蝦多士伴鮮果」炸得毫不油膩，酥化可口，灑上少許金華火腿茸，帶出咸香感，再落些少甜酸汁，更有畫龍點睛的效果；拌碟的鮮果，有著平衡的作用，好味。 至於新菜式中，「鵝肝片皮乳豬及蜜汁叉燒」是一門雙傑，自家出品的燒味，令人想起戶外的烤琵琶鴨，一邊是乳豬配鵝肝，但加入日式壽司的元素，上而下是乳豬片、青瓜、鵝肝及米通，四層各有不同口感，令人驚喜；而另一邊是充滿蜜味的叉燒，有嚼口更加想配碗白飯。 係時候來個湯品，以「菌中之王」鮮松茸入饌的「鮮松茸鮑魚燉雞湯」，實在芳香馥郁，湯色清澈，入口甘甜醇厚，正。 主菜「蜜汁火方伴油泡碧綠帶子」有點破格，兩款熱葷同時出現，杭州菜館常見的蜜汁火方吃過不知多少次，既有以桂花蜜燴至汪洋一片的版本，又有經蜜汁燴過再風乾的版本，但今次將乾身版本跟油泡帶子放埋一齊，賣相的確更好，亦帶出咸甜的對立感，但恐怕火腿沾上帶子的醬汁，令味道有所改變。 火肪好乾身，放入熱燙的荷葉包內，加上蜜汁蓮子及代替炸腐皮的芝麻薄脆，不單增添了變化，而且口感更具層次。 至於「油泡碧綠帶子」，很有喜宴菜的氛圍，帶子火喉啱啱好，薄薄的芡汁，很教人喜歡。 所謂「無雞不成宴」，這道「陳皮韭菜生煎雞」勾起些少回憶，當年成班食友去荔枝角羈留所開餐，其中一味就係生煎焗雞球，今日重遇，加入陳皮元素理應更幽香，但陳皮味道稍淡，不妨重手些少，雞皮煎得香脆可口，亦自有動人之處。 簡單的炒碟菜，顯不出酒店的功架，帶點手功菜感覺的「金湯西紅柿會上素」，味道清新，正好平衡了口感。 人生第一碗雲南米線，就係係深圳品嚐，熱燙的石鍋，冒著氣泡的雞湯，把素菜、腩肉及生鵪鶉蛋一一傾倒，最後加入米線，一碗熱辣辣的雲南米線便呈現眼前，尤其是在寒冷的冬天吃上一口，真是暖在心頭。 以過橋米線做單尾，有點別出心裁的感覺，係酒店品嚐「雲南石鍋風味過橋米線」，材料自然更加多，擺滿半張檯，由韭菜、花生、豆干、鵪鶉蛋、什菌、班片到蛋絲、芫荽，足足有15樣，再點師傅放入滾熱辣的湯內燙熟，米線蘸滿了濃稠的雞湯，鮮美到一個點。 甜品是「南安子燉桃膠」，作為近年甜品的常客，桃膠的可塑性甚高，配以少見的南安子，清甜滋潤，好啱自己胃口。 另一道甜品「玫瑰火腿酥餅」確實帶給人驚喜，以芳香馥郁的玫瑰花蜜溶入金華火腿茸，咸甜夾雜，入口酥化，配上一杯香濃的普洱，真是無以尚之的享受。 至於「香芒凍布甸」則鮮甜滑溜，找不到挑剔的地方。 壓軸是送上壽桃包，慶祝席間生日的朋友，難得是在疫情肆虐的日子，依然有人記得大家的生日，人間的確是充滿了「愛」，祝願大家身體健康，每日都開開心心，期待有天大家脫下口罩，展露開朗的笑容！ Facebook : 香港黃金海岸酒店 地址 : 屯門香港青山公路1號香港黃金海岸酒店低層地下 電話 : 2452 8668 味道 : 5  環境 : 4  服務 : 5  衛生 : 5  抵食 : 4  位置 : 3 希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝! http://www.facebook.com/foodiephilip