未講自助餐陣容之前，不妨同大家講下，基本上有三款生蠔，加龍蝦、七吋阿根廷赤蝦同海膽任食，相信都會認為要$600以上，但北角油街的君綽海逸，可能地理問題，知道的人不多，連同網上折扣，平日都不過是$460左右，其實從炮台山站信步過去都只是5分鐘腳程，真的很方便。
很欣賞酒店地方闊落，由最基本既2至4人檯，到可以一家人既大圓檯，任個組合都無問，真係窩心。
生蠔
愛吃生蠔的朋友，可以一次過品嚐法國的Fine de Claire Oyster、美國的Pacific Rock Oyster與及Irish Rock Oyster，美國蠔太大隻，蠔味稍淡，個人反而覺得體形適中的Irish Rock，略帶海水味，又不至於Fine de Claire的單薄，不過無所謂，可以拎多幾次，反正任拎而且即開，最啱蠔痴。
Seafood Station
生蠔位旁邊是海鮮吧，當然先取半開的波士頓龍蝦，雖然體形偏細，但差不多每隻都有蝦膏，極之邪惡。
加拿大蟹腳肉質甜美，可以任食就最啱自己。
仲有蟹膏多到爆既法國麵包蟹，與及肉質嫩滑的智利藍青口，加上爽甜既凍蝦和柔韌的法國翡翠螺，構成一個好正既海鮮併盤。
刺身
首選當然係每次必食既七吋長阿根廷赤蝦，蝦頭滿是蝦膏，原味的蝦肉的確吸引。
原片海膽放在青瓜片上，入口即溶的感覺真好。
加上八爪魚、希靈魚、吞拿魚及三文魚，海鮮陣容同樣強大。
Carving
Station
Station
燒烤西冷扒
切了一片，中間位帶血絲最啱我。
香煎鴨肝
太邪惡，自己近日吃了不少同類食物，還是暫時忍口。
鐵板豬扒、牛脷及牛仔骨各試了一兩片，size啱啱好，可以一試。
還有鐵板雞軟骨雜菜、烤新薯配車厘子茄、燒烤鯊魚鰭與及烤雜菜。
小食
在好幾款小食中，最想推介海膽蟹肉烚蘿蔔，小小的一杯，放入了油條，蘸滿了味噌湯，置底的蘿蔔清甜無渣，感覺有點喧賓奪主，海膽個人還是覺得刺身食最好。
湯
朋友間都知自己係湯怪，每次食Buffet，都會試均咁多款湯，今次亦不例外，先試花旗參燉竹絲雞湯，原盅隔水燉，有種入口回甘的味道，好鮮甜又滋補，難怪最受歡迎。
海龍皇湯是隱藏湯，要同師傅講先有，加入了三文魚肉、蜆肉及魷魚，配料足，只是略嫌味道咸了些少。
曼克頓銀鱈周打湯
很濃稠的質感，如果不怕太飽，可以配件麵包。
灼料吧
值得推介喇沙湯底，有椰香而且有微辣，就算不食麵，單是淥菜加喇沙湯都好正。
熱葷
星洲蟹鉗
拆開啖啖肉，香口惹味。
鮮菇扒西蘭花
清清地食些少菜，但西蘭花今次好硬。
炸魚
沒有了上次的炸魚薯條，雖然同樣嫩滑，但總是覺得不及前作。
君綽點心區
有蝦餃、饅頭及牛肉燒賣。
仲有自家出品燒味拼盤及即炸什錦天婦羅。
沙律
其實沙律吧都好多選擇，有意式龍蝦魷魚奇異果沙律、魚子煙帶子杯、亞洲海鮮沙律及蕃茄回香沙律配燒魚，味道不錯，但選擇多，又要回本，試了少少便算。
甜品
首先每位客人獲送上花膠天山雪蓮燉鮮奶，熱辣辣又滋潤，舀一下，除了武俠小說出現的天山雪蓮外，更有少許花膠及薏米，甜度恰好，就算不是甜魔都易接受。
第一次係Buffet見到有即製芒果沙冰，又可以係旁邊雪糕櫃加球芒果雪糕，再灑些少topping，好味又好玩，有小朋友家庭就fit晒。
另一亮點當然係12款 Movenpick 雪糕，有Maple Walnut、Yoghurt、Hazelnut、Cappuccino、Tiramisu、Lemon & Lime、Passion Fruit & Mongo、Swiss Chocolate、Stracciatella、Strawberry、Panna Cotta與及Vanilla Dream口味，同行有朋友一口氣掃齊12款，絕對無問題。
至於甜品吧更有拿破崙蛋糕、綠茶布甸、桂花糕、糯米糍、
朱古力撻、檸檬蛋白撻、馬卡龍、Tiramisu、白蘭地朱古力慕絲蛋糕、士多啤梨慕絲、芒果慕絲蛋糕、百利甜酒芝士餅、美式芝士蛋糕、杏仁酒榛子蛋白蛋糕、白酒菠蘿、紅酒燴梨、荔枝車厘子蛋糕、櫻桃酒黑森林卷蛋、蛋撻仔、牛油麵包布甸、合桃露及豆腐花，前後幾十款。
個人覺得白酒菠蘿同紅酒燴梨較特別，如果quota有限，最好試左先，而Tiramisu濕潤鬆軟、美式芝士蛋糕濃香細滑，都是不錯的選擇。
飲品
有自家製造洛神花茶、西柚汁、蘋果汁及橙汁，加埋自助咖啡機，無須就住就住得一杯，可以盡情飲，尤其是近排熱熱地就最正。
反正星期天就是母親節，不想食所謂酒樓套餐，又要分兩輪比人趕走，今年不妨去食自助餐，至少食物多選擇嘛！
酒店專頁 : HarbourGrand Cafe
Facebook 專頁 : 港島海逸君綽酒店
地址 : 北角油街23號港島海逸君綽酒店3樓
電話 : 2121 2689
味道 : 4 環境 : 4 服務 : 4 衛生 : 4 抵食 : 5 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!
