有時放假，都會係家中整返幾味，而兩個囝囝就好鍾意食海鮮，鮑魚就係其中之一。
但係個人好怕洗刷鮑魚，既要用牙刷將邊位污漬刷走，又要起肉去除內臟，真是夠煩人，最好就係有人整埋。
最近金域假日酒店的自助餐以鮑魚作主打，最啱在下呢種懶人。
並非巧立名目，單係食一round鮑魚菜色，已經夠飽。
最受歡迎的鮑魚菜色多數係熱葷類，蒸鮑魚配鴨腳花生煙煙韌韌，加埋鴨腳同花生，佐酒真係一流。
雖然陳皮清蒸九孔鮑係屋企都做到，但有人整埋，仲可以任食，收貨啦！
至於鮑魚白菌酥盒，小巧的一件，外層酥化，想不到鮑魚同白菌味道好夾。
香煎鮑魚蟹餅是同場大熱菜色，煎得略帶焦香，好味。
另一個駐重兵的鮑魚區是頭盤位。
有鮑魚海蜇沙律、鮑魚紅酒你梨串、鮑魚雜菌沙律、鮑魚銀芽沙律及鮑魚海鮮沙律白酒啫喱杯，將鮑魚包裝成清新的口感，變化真多。
Seafood Station
畢竟是晚鮑魚先係主角，其他海鮮依然有日本長腳蟹、小龍蝦、翡翠螺、青口及凍蝦，質素不錯，refill 速度亦不差，合格有餘。
刺身
陣容是越見進步，有帶子、甜蝦、仿鮑片、三文魚、吞拿魚、鯛魚及八爪魚，當中帶子肥大肉厚，質地柔軟嫩滑，最值得推薦比大家。
即開美國生蠔，不會太大隻，喜歡食蠔既朋友點可以放過。
熱葷
可能本身有中菜廳，所以中式熱葷一向都幾受歡迎。
可能自己夠老鬼，所以每次必食蒜香西蘭花炒蝦仁與及蒜蓉粉絲蒸扇貝，尤其是鍾意食粉絲，又懶得係屋企整。
另一個懶人包，就係豉汁蒸龍利魚同鮑魚冬菇燴伊麵，其實兩款自己都識整，但懶人就係識都唔想郁手，畢竟款式多，每款都可以試先係Buffet精神，龍利魚惹味嫩滑，而伊麵柔韌又不會太多水份，夠乾身，好味。
加埋烤乳豬、日式蒜香雞、印式雜菜咖喱、咖哩魚及印度烤雞，可以試多幾款。
湯
佛跳牆
原盅上，絕對夠火喉，鮑魚燉至軟稔，味道通通跑了出來，加埋滋補花膠超正。
其實餐廳的中湯，就算不是燉湯，都值得大家試試，因為每次都不同，今次是下火湯野葛菜羅漢果煲生魚，鮮甜潤喉，真心覺得好飲。
而西湯是蕃茄忌廉湯就反而無飲。
Carving Station
有燒火腿及燒西冷，今晚似乎火腿更受歡迎。
鐵板燒
個人幾鍾意牛仔骨，尤其是骨膜位有油香，至於燒羊扒最好有少少生，肉質先至軟熟。
煎至蝦殼脆卜卜既海蝦三文魚，都食得過。
仲有青椒、彩椒及鹽燒鯖魚。
灼料吧
主要是日式湯麵，但個人卻對之前的喇沙湯情有獨鍾。
甜品
當然要先品嚐Häagen-Dazs雪糕，而且有香草、草莓及朱古力三款口味，加上獨立杯上，衛生得多。
Tiramisu濕潤可口，好味；西班牙油條配朱古力醬口感不錯，不過都幾甜；美式芝士蛋糕好濃郁芝士香味，入口豐腴；加埋香滑既3.6牛乳布甸，已經覺得好滿足。
其實甜品仲有蘋果撻、雲呢拿奶油角、孖寶牛油蛋糕、法式朱古力杏仁蛋糕、生果酒 jelly、草莓乳酪、椰汁西米布甸、檸檬撻、草莓芝士蛋糕、朱古力薄脆蛋糕、紅桑子蛋糕、栗子布頓撻及紅豆沙，總會有啱大家心意。
相信鮑魚受到大眾的歡迎，因為是晚就算是平日，都有八九成客滿，氣氛熱鬧，個人覺得喜歡鮑魚的朋友一定不會失望。
Facebook專頁 : Bistro on the Mile
電話 : 2315 1118
味道 : 4 環境 : 4 服務 : 4 衛生 : 5 抵食 : 4 位置 : 5
如果喜歡這篇文章,請在我的專頁上剔“LIKE”,當是給我小小的鼓勵吧!謝謝!