富豪酒店集團其下酒店Buffet曾造訪了好幾間，然而，地點最就腳方便的尖沙咀店，倒是第一次品嚐。
今次主題是「 龍蝦·黑松露盛宴」，或者是太吸引了，到訪當晚是全院滿座，看來有麝自然香的道理真的不錯。
海鮮
有一向海鮮皇者半開波士頓龍蝦，滿是蝦膏又啖啖肉，肉質爽彈質素好，鐘意既仲可以任食。
麵包蟹一揭開蟹蓋，蟹膏多到漏，邪惡到極點，愛食蟹膏朋友就最啱。
仲有青口、凍蝦、蟹腳及翡翠螺，解凍處理得幾好，沒有令人討厭的雪味。
刺身
有大大隻既紅蝦，肉質甜美，絕對值得推介。
加埋油甘魚、吞拿魚、立魚、八爪魚及三文魚，係間普通日式食店食個刺身盛合閒閒地都二三百啦，更何況家陣任食。
小食
有吞拿魚配菠蘿莎莎、青瓜蟹肉黑松露沙律、火腿、鴨肝多士配無花果醬及龍蝦三文魚籽沙律，說起來，每款沙律都包含一款海鮮或鴨肝，相當特別，個人偏好龍蝦三文魚籽沙律，夠清新爽朗。
熱葷
西班牙海鮮炒飯
單係個鐵鑊既直徑已經兩尺，海鮮飯底放滿了墨魚仔、青口、魚肉、海蝦及蟹腳，賣相澎湃，好少地方有得食，千期咪錯過。
避風塘炒龍蝦鉗
好香口惹起味，啖啖肉一流。
黃金蝦
咸蛋黃緊緊包圍海蝦，極之邪惡，令人難捨難離。
至於螺片扒時蔬、黑松露野菌炒象拔蚌、蟲草花棗蓉蒸班球與及蒜蓉粉絲蒸扇貝，好有宴會菜感覺，炒既鑊氣夠，蒸既時間啱啱好。
西式有鴨肝慕絲雞卷、香煎牛柳配黑松露菌汁、燒羊架配黑松露菌汁、黑松露芝士通心粉同埋焗青咖哩龍蝦蘆薈杯。
湯
龍蝦湯
質感濃稠又滑溜，好香龍蝦氣味，對於湯怪就最啱，自己都忍不住飲了兩三碗。
金腿瑤柱花膠節瓜湯
同樣地，中湯亦夠火喉，材料味道好出，又係飲了兩碗，有點成肚水感覺。
Carving Station
烤有骨牛肉
太多其他食物，今次就放過你。
香煎鴨肝
有油香，但自己知自己事，試了少少便算。
印度精選
始終咖喱有一定捧場客，店方開闢了一角，擺放了咖哩羊、印度黃飯、添多利魚、咖哩雞心豆，不過有太多野食，有時候要取捨，對嗎？
天婦羅
有炸蝦、炸生蠔與及蔬菜天婦羅，油份瀝得清，脆漿可以再薄一點更好
甜品
一次過可以享受兩大品牌雪糕，真開心！
Movenpick
有雲呢拿、士多啤梨及瑞士朱古力味道。
Dreyer’s
有比利時三重朱古力、呂宋芒果及紐約藍莓芝士餅。
不敢食太多每個品牌食兩款算了！
每晚有加插節目，每晚8點便會響起鈴聲，大廚會推出火焰雪山，燈光較暗後點火，即時酒香四溢，又可以免費享用，實在太滿足了。
如果意猶未盡，仲有即焗松露梳乎厘 ，質感鬆軟又陣陣幽香，好正。
其他甜品有以「茶」主打的菊花芝士餅、綠茶軟心芝士餅、香片慕絲蛋糕、奶茶慕絲、草莓玫瑰花茶餅、伯爵茶戚風蛋糕、伯爵茶芝士忌廉蛋糕、紅茶奶凍及綠茶檸檬忌廉；玫瑰味芳香甜美，伯爵茶甜而不膩又鬆軟，好幾款都有高水準表現。
至於車厘子布甸、雜莓奶凍、香芒雲呢拿慕絲餅、特濃朱古力蛋糕、士多啤梨慕絲蛋糕、芒果布甸、藍莓乳酪杯、薄荷香橙蛋糕、鮮果拿破崙、
麵包布甸、紅豆綠茶蛋糕及芝麻慕斯蛋糕，單係讀一次都有排，要點取捨？盡量發揮妳/你的食力吧！
麵包布甸、紅豆綠茶蛋糕及芝麻慕斯蛋糕，單係讀一次都有排，要點取捨？盡量發揮妳/你的食力吧！
P.S : 整個5月（除了母親節正日）
星期一至星期四 成人/$588 小童/$368
星期五至日及假期與及前夕 成人/$648 小童/$398
每晚6:30pm~9:30pm供應
渣打信用卡更享有6折優惠
地址 : 尖沙咀麼地道71號富豪九龍酒店地庫1樓
電話 : 23138718
味道 : 4 環境 : 4 服務 : 4 衛生 : 4 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝！