大家都知香港人鍾意食日本菜，拉麵都係其中之一，話說曾經心血來潮，同朋友試過一晚之內，食均尖沙咀區三間以［一］字行頭的拉麵店，結果係名氣最大的反而評分最低，有點令人始料不及。
好奇怪，北區想搵間好些少拉麵店真係好難，莫講話壽司店，Omakase更加無得諗，有時感到似係飲食沙漠。
所以一想食好少少，就要老遠跑出城。
今次接完太太放工，就去了銅鑼灣世貿中心三樓的［一幻］新店。
論地點相當就腳，向海的一排坐位，附有USB叉電位，邊食邊充電好方便，望著銅鑼灣避風塘景感覺良好。
餐牌跟其他幾間分店基本一樣，前菜就選了醬燒雞脾菇（$22）及醬油味筍（$15），用來消磨時間最好。
［一幻］每次開新店，都有限定菜式，而今次推出［海老牛乳蝦湯拉麵套餐］（$138），就只供應到本月底（即五月底）。
今次有點特別，叉燒換成慢煮雞肉，肉質是出奇的軟稔，但湯底卻是濃稠的蝦湯而非雞白湯底，但效果不錯，配料亦豐富，在原有的兩片雞肉外，大大隻褪殼虎蝦，好爽口彈牙，呷一口湯，蝦味香濃不在話下，加入北海道3.6牛乳，更是有種甜滑的質感。
建議大家先喝一口原味湯底，然後再把南瓜蓉撥弄在湯裡，甜美度是進一步提升。
麵條就選了粗麵，而且要求硬身，果然有嚼頭之餘，掛湯的能力不俗，更加避開了淥得太耐而引起鹼水味的問題，滿意度幾高。
而套餐是包含了蘋果味梳打水，都只不過$138，價錢相當合理又夠飽。
太太就點了［特濃蝦汁叉燒拌麵］（$88），同樣地是粗麵底，叉燒則是碎肉粒上，方便拌麵之後每口都享受到叉燒的肉香及油香，粗身麵條再也不是掛湯，而是掛上蝦汁及油香，味覺上呈現更複雜。
太太另選蜜桃果汁梳打（$38）配對，算起來都是百零蚊一位，能夠食到一碗有質素的拉麵，是一點都不貴。
Facebook 專頁 : 一幻拉麵Ebisoba Ichigen Hong Kong
Instagram : @ichigenhk
地址
: 銅鑼灣告士打道280號世貿中心3樓L3-07號舖
電話 : 2789 3799
味道 :
4 環境 : 4
服務 : 4 衛生 : 4 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!