一覺醒來，打開露台享受一下陽光與海風，自有種心曠神怡的感覺。
梳洗過後，當然係醫肚時間，地點就係昨天晚餐的 Kitchen。
先來個新鮮水果盤，火龍果、西瓜、哈蜜瓜及提子，甜美可口。
不怕剝皮的，仲有蘋果、雪梨、香蕉及柑桔。
愛健康的朋友，當然有乳酪及穀物類供應。
再加杯脫脂牛奶或者全脂牛奶都可以。
至於自己係澱粉怪，去麵檔來配牛腩麵少不免。
仲有烚蛋、煎蛋、奄列、炒蛋、薯餅、炒麵、炒飯、炒菜及蒜心炒牛肉。
喜歡的話，仲可以加配雞粥，老實講，又真係幾綿滑。
中式點心有蝦餃、菜肉包、奶黃包、饅頭、餃子及粟米。
當然會有西式食物。
單係芝士都有四款。
德國雞肉腸、煙肉、火腿、莎樂美腸、牛肉片及凍肉。
麵包有牛角包、Pancake、窩夫、丹麥包、香蕉包、法棍及多士等十幾廿樣。
食得飽飽又係時候四圍行下幫助消化。
最佳方法一定係去體身室做運動。
話時話，個體身室又幾大，設備亦齊全。
雖然酒店附有海灘，但酒店本身都有室內泳池，方便客人。
畢竟係resort hotel，小朋友設施當然要顧及，兒童遊戲室有適合幾歲的波波池、攀爬組合，又有電動遊戲、足球機及桌球。
就連VR及小火車都有（當然部分是要付費的）。
臨行前同幾位深圳朋友係嘉美軒飯聚。
今餐真係豐富到一個點，所以會另文介紹。
不過有幾款好有特色的確要同大家分享。
湯之中個人覺得石斛涼瓜大連鮑及豬腱肉燉石橄欖味道甘中帶甜。
香煎蠔仔烙比香港不少名店出色。
酥炸油粿就好惹味。
加埋主食中的綠元仔，又真係好少食。
見仲有時間，車又未到，一於食埋下午茶先走。
雖然下午茶非酒店強項，但可以係戶外，坐係內地近年大熱的營地內，吹吹海風，又真係別有一番滋味，相當有趣。
雖然今次只係兩日一夜，但行程又幾豐富，諗諗下真心已經想再來。
想知道更多深圳資訊 :
小紅書 : 美食焚化爐
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!