任食蟹肉灌湯餃 X 午間點心放題 @ 桃里 ( 尖沙咀千禧新世界香港酒店 )

 


一向都喜歡食點心,以前最愛掹衫尾跟老爸上酒樓,不過胃納有限多數都係一籠灌湯餃加鵪鶉蛋燒賣或淮山雞札,人越大,食得越多,如果有放題更加食得開心。

其實兩年前已經開始同朋友幫趁桃里的點心放題,早排有朋友轉工成功,知我鍾意飲茶,因利乘便,兩個人撐檯腳。

桃里的點心以數量而言未算多,大概30款左右,但我一般都係點到十幾樣,再多都食不下就浪費,而且個人覺得重質比重量緊要。

點心放題只在星期一至星期五午間供應,兩位用港幣$760,小童(三至十一歲) 每位港幣$280,連茗茶:每位港幣$34,但即場入會可享75折優惠,再係原價加10%服務費,計落都係$352左右。

前菜

梅子醬煙鴨胸、泰式鳳爪、青瓜

想不到西式煙鴨胸都化成中式風味,酸酸地效果不錯。

泰式鳳瓜質感爽滑,辣辣地幾開胃。

拍青瓜咬落脆口,味道清新。

咖喱豬皮魷魚

已經好耐無食這類街頭小食,豬皮爽滑,魷魚彈牙,咖喱不會太辣,而且甜甜地,好有懷舊feel

仲有柱侯醬蘿蔔牛孖筋菠蘿咕嚕排骨,只係諗住每類點兩三樣就算。

點心

以蒸炸為主,而且部分會按人頭出,避免了浪費。

晶瑩鮮蝦餃皇

除了灌湯餃,蝦餃是必食的,單睇餃皮搓揉得通透加上有10摺以上,已知有水準,蝦肉爽彈鮮香,好味,即時要追加。

蟹籽燒賣皇

燒賣是另一款好受人追捧的點心,肉鮮蝦爽,又係必食。

麻辣牛栢葉

傳統風味多數係用薑蔥蒸,但近年風行麻辣燙,轉轉口味都無妨,辣度不算強,反而會挑起了食慾。

蟹籽碧綠帶子鮮蝦鳳眼餃

屬於較新口味的點心,餃子皮加入菠菜汁去搓,色澤淡雅,配以豔麗的蟹籽,餡料是帶子與鮮蝦,爽嫩兩種肉質夾雜,好特別。

脆皮羅漢腐皮卷

腐皮炸得淡黃,食落又不覺油膩,內裡是羅漢齋餡料,帶著雜菌的香氣,不錯。

若果意猶未盡,仲有黑松露菌牛肉燒賣、蠔皇叉燒包、潮州蒸粉粿、紫薯鹹水角、蒸臘味芋頭糕、上湯鮮蝦水餃同芹香韭雞絲蝦春卷

蟹肉灌湯餃

平時係一間街坊酒樓當特點都要$30以上,但係屬於無料到,只得味精湯,不家陣可以任食湯底真係熬好既高湯,點都值四、五十蚊盅,加上有蟹肉,味道更鮮甜,食得兩盅已經差不多成百蚊。

足料老火湯

機松茸乾貝鳳爪北菇老雞湯

陣陣醇香,舌底生津,絕對係用時間換來的美味。

蔬菜

事後先發覺無點菜蔬,不過奶油椰菜花及蒜子浸水東芥菜,下次可以試試。

飯麵

雖然自己係澱粉質怪,但已經好飽,就算單尾有鹹魚蓉雞粒炒絲苗、芹香瑤柱肉碎泡飯以及銀芽榨菜牛鬆炆米粉,都已經太飽,放棄。

甜品

話就話好飽,但甜品係另一個胃,將淨低既食力一次過爆埋。

先來一個凍香芒布甸,香甜而份量細,啱啱好。

再上鳳梨蘭香籽凍糕,清清地正好令味蕾休息一下。

另外兩款係陳皮紅豆沙同埋香麻空心煎堆仔,不過已經好滿足。

Facebook專頁 : 新世界香港酒店

地址 : 尖沙咀麼地道72號千禧新世界香港酒店2

 

電話 : 2313 4225

 

味道 : 4  環境 : 4  服務 : 4  衛生 : 4  抵食 : 4  位置 : 4

 

如果喜歡這篇文章,請在我的專頁上剔“LIKE”,當是給我小小的鼓勵吧!謝謝!

 

http://www.facebook.com/foodiephilip

發佈留言

發佈留言必須填寫的電子郵件地址不會公開。 必填欄位標示為 *