最近兩個月，前前後後都吃了好幾次的大閘蟹，但近排質素是漸入佳境越來越好，而今次到訪旺角帝京酒店中菜廳帝京軒，正推出龍宮▪︎蟹皇盛宴套餐，每位$698，就帶大家睇睇內容。
懷舊芝麻虎蝦多士配金榜蟹粉醬
炸得恰到好處，多士鬆化，放上虎蝦更具層次，最開心係將蟹粉完全蓋過蝦多士，味道豐腴。
珊瑚元貝蟹粉鮮奶盞
把亮麗的魚籽放在雪白的元貝上，增添了色彩，置底是嫩滑的炒鮮奶，最難得係加入蟹粉去炒 ，美味又可口。
甜梅菜一口東坡肉
東坡肉用小蠟燭保溫，炆得既腍又入味，豐腴的口感邪惡度爆燈，油脂位超香，入口即化的感覺真好，最啱配返碗白飯。
葛仙米泉竹花膠泡班球
重口味過後，又到清清地時間，原來葛仙米是食用藻類，而且蛋白質豐富，再加上滋補的花膠及班球，實在幾欣賞這道菜。
清蒸江蘇大閘蟹
（每位雄蟹一隻 / 每隻約四兩半）
餐廳好窩心，會因應客人用餐時間蒸蟹，上檯時包保熱至辣手，亦提供了代客拆蟹的服務，客人可省卻了時間，一揭開蟹蓋，深橙的蟹膏好誘人，食落甘甜味美。
食大閘蟹當然要配杯薑茶，帝京軒的薑茶可以話係我遇過辛勁最澎湃的一間，但係我又好鍾意喎！
荷香銀鈎臘味糯米飯
以竹籠送上，糯米飯煙韌有嚼口，加入蝦乾、臘腸及膶腸令味道有層次，又有油香，實在好啱近日天氣。
薑茶金薯芝麻湯圓
之前配大閘蟹的薑茶是澎湃到一個點，但作為壓軸的甜品，薑味反而好輕盈配上芝麻湯圓及蕃薯，份量恰好。
相信今個大閘蟹季節，大家都會食得開心。
Facebook : 帝京酒店
餐廳專頁 : 帝京軒
電話 : 2622 6161
味道 : 4 環境 : 4 服務 : 5
衛生 : 5 抵食
: 4 位置 : 5
如果喜歡這篇文章,請在我的專頁上剔“LIKE”,當是給我小小的鼓勵吧!謝謝!