天氣漸寒，出街真係要加返件外套，不過話分兩頭，又係食大閘蟹既時候。
早排係自助餐已經率先有大閘蟹供應，但蟹膏始終欠澎湃，過了半個月，理應好好多。
位於海港城的［个園竹語］近日開始有大閘蟹供應，仲要係由五兩起跳，最勁可以去到八兩，大閘蟹迷真係兩眼發光。
餐廳近日有個超抵食套餐，6位享用都不過$5888，睇落以為好貴，食落就知好抵，不妨等我介紹一下。
要提提大家，如果惠顧六人大閘蟹套餐，可以自動update到廂房，原先廂房的最低消費要$8000，家陣有闊落的私人空間，又有專人服侍，成件事grand好多。
頭盤係［个園竹語滬式四前菜］，當中包括了四款滬菜館的常客，計有花雕醉雞、涼拌茄子、鎮江餚肉以及四喜烤麩，四款前菜都做得相當到位，不錯。
至於未到主菜已經有驚喜，先來一個［个園竹語蟹粉燴魚翅］，可能近年食用魚翅會比人連環抽擊，所以客人亦可以選擇燕窩代替，悉隨專便。
好有宮保蝦球感覺的［淮陽乾燒明蝦球］一上檯，已經忍不住加碗白飯拌食，蝦球爽口彈牙不在話下，醬汁更是精華所在，熱辣辣的冒煙，好誘人。
相信絕大多數人會喜歡食蟹公，因為蟹膏夠香滑，套餐提供［清蒸江蘇大閘蟹］（五兩至五兩半公蟹），仲可以有專人代拆蟹，真心服務到位，蟹膏的確比早前的較好，軟綿香滑，色澤深黃，入口滿是蟹膏的醇香，超正。
若然意猶未盡？可追加大閘蟹（五兩/$200，六兩/$260，七兩/$360，8兩/時價），不過7，8兩貨色比較少，要睇貨源而定。
想盡慶一點？大家可以來一杯［个園竹語唐宋5年善釀花雕（紹興）酒］，每壺$168，但酒力差都有好選擇，，因為有充滿了玄米香氛圍的［炒*米水］，每壺只不過$58。
再來是重口味的［京蔥燒原條關東遼參］，好有本幫菜濃油赤醬的展示，京蔥的香味完全釋放，原條海參煮至彈牙，而非坊間好多時扣至軟綿綿的狀態，而且好上汁，食落滋味無窮。
另一道重頭戲是［蟹粉扒新鮮時蔬］，蟹粉香滑毫無腥味，蓋滿了菜面，豐腴的味道令菜蔬都變得惹味可口。
最後一道的［蟹粉鍋粑］，是兩種截然不同的口感，舀一湯匙的蟹粉，放在炸得香脆的鍋粑上，綿滑與香脆可以同時享受，超正。
壓軸的甜品是［夠濃薑茶燉燕窩］，薑茶不會太嗆喉，但辛香令人感覺舒服，又有滋潤的燕窩加埋，正好對應近日喉嚨有點乾燥。
講真，個人覺得整個套餐好抵食，先不講另追加蟹，單係套餐內已包含燕窩、魚翅、遼參同大閘蟹元素，連加一大約$1100左右，以係一間普通酒樓食餐飯閒閒都要$300人頭落樓，不如食好少少，至少對得住自己肚皮。
Facebook專頁 : 个園竹語
地址
: 尖沙咀廣東道25號海港城港威商場3樓3202號舖
電話 : 2116 8328
味道 : 4 環境 : 5 服務 : 4 衛生 : 5 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!