仍記得有一年聖誕節，跟教會朋友到大澳宿營，當時橫水渡只是一隻舢舨，客人上船拋下五角，就由船頭船尾兩位大嬸拉動繫在兩邊碼頭的大鐵鏈，將客人送到對岸，雖然只是三兩分鐘的時間，但真的充滿了漁村風情，更有一次見到水上人坐舢舨迎親，真是熱鬧非凡。
其實個人幾鍾意大澳，簡單而寧靜，仍保持著日漸消失的本土情懷，而尖沙咀凱悅酒店大廚則將當地的物產，化成美饌，用味蕾帶大家遊走大澳一敞。
蒜香醬油秋葵吊桶仔（$168）
前菜已經選用大澳出產的吊桶仔，肉質軟綿，簡單的利用醬油及蒜蓉調味，吃得出的新鮮。
酥炸九肚魚墨魚餅（$238）
大廚揉合了兩種不同口感的食材，外層炸得酥化，油份又瀝得清，內裡多了一份九肚魚的軟綿，下點陳醋味道更鮮。
大澳蝦膏鮑魚滑雞煲（$368）
好有漁鄉風味，瀰漫陣陣蝦膏香氣，用上本地三黃雞及南非鮑魚，烹調時加入大澳特產蝦乾、冬菇及蝦醬，份外覺得惹味，真係白飯良伴。
香煎原條咸鮮馬友（$298）
目測至少有14兩，魚皮煎得好脆同乾身，肉質嫩，醃得好入味，碎骨亦不覺多，送啤酒一流。
金湯岩米釀原條花膠筒（$338/位）
選用有「米中黃金」美譽的尼泊爾岩米，一種純淨無污染及營養豐富的植物籽，配搭日本珍珠米，當中加入瑤柱及雞脾菇，燴好後釀入花膠筒內再蒸，令口感更豐富，最後澆上南瓜蓉及炸過的瑤柱絲，甜甜地令人吃不停口，尤其是花膠對女士十分滋補。
啫啫蝦乾肉碎芥蘭煲（$228）
芥蘭只取中間最嫩綠的一段，每條菜都帶有濃郁的蝦乾幽香，屬於重口味菜色，咬落爽甜，我鍾意。
大澳三寶蒸肉眼筋鴛鴦飯（$268）
充滿水鄉風情的單尾，三寶是指魷魚乾銀魚乾以及蝦乾，配以肉眼筋，飯粒更是用糯米混和日本珍珠米，口感煙韌，而拌勻後，味道更可口。
迷你砵仔糕（$78/3件）
想不到除了懷舊下午茶，午飯都可以食到砵仔糕，甜度輕盈，豆下得足，最可惜欠白色，如果齊兩款仲好。
酥皮流沙盞（$60/4件）
凱悅軒名物，就算並非今次主題菜，都不會遺忘。
雖然一碟4件，老實講，我一個可以掃光，上層是菠蘿包式酥皮，內裡是流沙餡，即叫即製，入口熱燙，令人回味。
栗子蓉西米焗布甸（$50）
表層烘至微焦，蛋香四溢，栗子蓉幼滑香甜，正。
這個充滿特色的菜單，供應期只去到3月尾，加上暫時沒有了晚市，其實不妨來個午間小聚吧！
酒店專頁 : Hyatt Regency Hong Kong, Tsim ShaTsui
地址
: 尖沙咀河內道18號香港尖沙咀凱悅酒店3樓
電話 : 3721 7788
味道 :
4 環境 : 5
服務 :
5 衛生 : 5
抵食 :
4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!