真係好想~好想返鄉下，已經兩年無去日本，除了睇下「動」漫、煲下日劇外，最佳方法都係食日本菜解鄉愁。
家陣Omakase貴到飛起，動輒要千幾起跳，仲要全數預付加等一年半載。
今次終於有機會食到來自京都的「京都勝牛」。
香港開設兩間分店，一間位於將軍澳，而另一間對於自己相對就腳的銅鑼灣，要搵毫無難度，就係總統戲院對面。
餐前跟朋友先來兩杯紅豆宇治抹茶（$32）以及白桃蒟蒻冰茶（$32），不太甜好啱我。
餐廳基本上以套餐為主，除了主菜外，更包含麥飯、椰菜沙律及味噌湯，最重要係可續加，幾大胃都無有怕。
極上和牛（$285）（M9後腰脊）（附日式溫泉蛋）
炸漿緊扣牛肉，夾起絲毫沒有脫落，肉質呈嫣紅色，時間聽說是以190度高溫炸60秒，概念相信同淥麵算準時間一樣，可見日本人對煮食時間的精準及認真，不由你不服。
因為是後腰脊位，肉質嫩滑味道濃，帶肉汁，自己覺得簡單的蘸點岩鹽會更好，若果怕膩，大可吃點椰菜，仲要係free flow，加埋白飯都可以任添，真係一個價錢，食到飽飽，幾大食都無問題。
若然不太喜歡三成熟，餐廳有迷你鐵板提供，即時翻熱又得，炒椰菜都得，悉隨專便。
而且餐廳提供了芥末醬油、山椒鹽、招牌牛排醬或咖哩醬好幾款醬汁，當然也可以蘸點日式溫泉蛋。
日本黑毛和牛（$438）（鹿兒島A4黑毛和牛西冷）
限量供應（附日式溫泉蛋）
另一款是日本黑毛和牛，油份較多，肉質鬆軟，係我杯茶，更可以蘸點溫泉蛋漿，多了一層滑溜的口感。
東京風里脊豬排鍋膳套餐（$138）（加烏冬$15）
炸豬排配以蔥花滑蛋及壽喜燒湯底，風味絕佳，炸漿蘸滿了湯汁更惹味，用來伴飯一流，講真，仲可以 free flow 白飯，真心覺得抵食。
炸廣島蠔大海老套餐（$198）
吃得出肯花錢在食材上，越南海老夠大隻又新鮮，油份又瀝得清，但炸漿略嫌過厚。
M9和牛丼伴溫泉蛋（$198）
牛肉呈嫣紅色，不會過熟，我鍾意，食之前澆上昆布醬汁，令牛肉更可口，又係一試難忙。
吉列素豚肉餅（$58）
近年多了人追求健康，轉而食素食，想不到餐廳提供 Impossible 素肉，內藏流心芝士，口感豐腴。
元祖牛排炸串（$48）
同場比較下高低立見，用來佐酒還是不錯的。
日本清酒豆腐雪糕（$58）
可以話大家都讚好的甜品，酒香與豆香的融合，在舌尖上縈繞，好味。
棉花糖雪糕（$58）
賣相一流，望落似一隻帆船，其實係棉花糖包裹著雲呢拿雪糕，再灑上黃豆粉，再插上餐廳迷你旗幟，相當有代表性，但食落又真係幾甜下。
抹茶紅豆流心蛋糕（$58）
自己一向喜歡十勝紅豆，與雪白的雪糕作了色彩上的配襯，不錯。
麻糬雪糕糯米糍（$58）
再來是口感Q彈的麻糬雪糕糯米糍，尤其是內裡是抹茶雪糕，一陣甘甜的感覺真好。
終於吃了一頓性價比高的日式餐廳，實在太滿足了，其實餐廳比鄰的「純真牛肉麵」，都是一間風評不錯的餐廳，下次可以試試。
地址
: 銅鑼灣謝斐道535號Tower 535地庫B01號舖
電話 : 2117 9195
(將軍澳店:將軍澳澳南海岸唐俊街23號MONTEREY Place地庫B03號舖)
(電話 : 3425 4616)
味道 :
4 環境 : 4
服務 : 4 衛生 : 5 抵食 : 5 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!