數數下，月尾就係萬聖節，除了兩大主題樂園公園出招外，好多餐廳都有古怪菜色提供。
都話過近排每逢假日都同太太去飲茶，今次就選來中環的「飲茶」。
餐廳門面依然萌爆，打卡一流。
想不到就算是星期天的中環，午間都人頭湧湧，當中夾雜了外籍人士，看來懂門路的不少。
可能就近萬聖節，餐廳推出了好幾款「別注版」點心，當然要試試。
木乃伊腸（$59/2件）
萬聖節版的臘腸卷，睇起來又有幾分似木乃伊，加上一雙眼睛就更萌，包皮鬆軟可口，好耐無食過，兒時回憶返晒黎。
蝙蝠雲吞（$59/4件）
將炸雲吞打造成蝙蝠外形，望落可愛多過恐怖喎！
即炸即食當然脆口，蝦肉餡料彈牙，喜歡的大可蘸點甜酸汁，就更惹味。
中指叉燒（$59/3件）
其實係叉燒酥，賣相又幾似喎，指甲用杏仁代替，有絲絲恐怖的氛圍，但放膽一咬，又幾鬆化，叉燒甜甜地。
蝦靈入眼（$59/3件）
恐怖版蝦餃，賣相飽滿，都幾大粒，唔知係乜動物既眼呢？望落都有幾分神似眼珠，真眼珠唔敢食，假既就好好味，尤其是蝦肉好爽彈。
睇住流奶（$49）
原版好萌，但萬聖節期間會有 Jack 版，包皮的確鬆軟，內裡的奶黃先係重點所在，一撕開，熱燙的奶黃傾瀉而出，陣陣香氣四溢，邪惡但好味。
幾款萬聖節版各有特色，但意猶未盡，當然要追加。
鴿吞鳳梨（$49）
店方名物，造型比起之前更神似，相信是工多藝熟，放在特製鳥籠內的確可愛，餡料是鳳梨，都幾香，但個人偏向多些小餡料。
湯品就點了兩款share。
椰皇老雞（$79）
原個椰皇上，湯料是螺頭、紅棗、雞肉及瘦肉，湯色好清，但入口醇厚，在家好少機會燉湯，實在沒有時間，有時候錢真係要比人賺的。
阿毛燉湯（$59）
另一款湯水有甘筍、粟米、雪耳及瘦肉，都是一些尋常的湯料，但火喉十足，味道都跑到湯裡，入口清甜，湯色清澈，不錯。
水煮辣牛（$109）
上次跟朋友食過，一試難忘，辣度個人覺得啱啱好，牛肉質地細嫩，蘸滿了辣汁，惹味到一個點，紅薯粉更是不在話下，連埋芽菜青瓜一齊食，滋味無窮。
老干媽炒雜菜（$79）
其實點都要來碟菜蔬，雜菜有芥蘭、菜心及小棠菜為主，老干媽下得重手，所以有點油膩，但好香口同埋有少少鑊氣。
最後當然要食甜品先夠完美，如果只叫一兩款再分享未必化算，倒不如選擇甜品拼盤（$89）（一A二B），可以在甜品中選三款。
楊枝甘露布甸棉花雲
可能之前食過，並未有第一次見到咁震撼，但囝囝就好開心，一次過食到棉花糖同布甸兩款心水甜品，童心即刻返晒黎。
另外選了杞子桂花糕及蜜糖蛋散，桂花糕幾香，而蛋散炸得色澤金黃，質地鬆化，但略嫌蜜糖過於重手。
地址
: 中環德輔道中173號南豐大廈2樓1-2號舖
電話 : 37088081
味道 :
4 環境 : 4
服務 : 4 衛生 : 4 抵食 : 3 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!