早前跟朋友在「帝京軒」品嚐過別出心裁的「張愛玲宴」後，近排又有新攪作，就係「品饌」（日本和牛 * 蟹蓋）。
本身已經係「牛魔王」，仲要加上焗蟹蓋，真係未食已經興奮。
畢竟「帝京酒店」地方就腳，所以就算是平日，客人亦不少，感覺挺熱鬧。
薈萃
一碟三款前菜供客人開開胃口。
桂花陳酒醉鮮鮑魚
滷得好入味，鮮魚薄切下依然有嚼口，不錯。
冰燒五層腩
自家中菜廳出品，品質點都有保證，五層肉相間分明，芝麻皮脆卜卜好香口，水準之作。
雙喜烤麩
烤麩咬落鬆軟，木耳爽脆，小冬菇滷得入味，三者恰如其分。
酸辣三絲花膠羹
很傳統酸辣湯的風味，酸辣度毫不留手，各種湯料切得好幼細，口感有層次，個人好鐘意。
煎日本產A4雪花和牛
就算無事前交帶，煎得是啱啱好，中間肉質嫣紅，油脂位呈溶化，而且有胡椒忌廉汁、黑葡萄燒汁或松露菌王汁三種醬汁供蘸點，今次仗著人多，三款都點了。
胡椒汁的辣度比預期中的輕手，質地幾滑溜；黑葡萄燒汁跟黑松露汁都幾香，但其實如果有海鹽，相信更能吊出牛肉的鮮味，放上了炸過的蒜片及洋蔥，感覺上多了中國菜風味。
櫻海老海皇焗蟹蓋
不單賣相亮麗，份量更大得吃一個都半飽，原來單點都不過是$138，若然是在《張愛玲宴》想加點，只須另加$38，真是誇張到一個點。
蟹蓋很層的蛋漿烘至微焦，而且夠薄，餡料除了大量蟹肉及螺片絲之外，仲加入了櫻花蝦，所以多了那份獨有的絲絲香氣，真滿足。
泮水芹香牛肝菌百合銀杏
在濃口味的菜色後，當然要來碟菜蔬清清味蕾。
以炸過的雲吞皮作金盞，內裡放滿了時令的菜蔬，西芹、蓮藕、銀杏、百合及牛肝菌，味道清新可口。
松茸茶樹菇湯白玉脆米
其實這個菜的重點在於以松茸及茶樹菇熬成的湯底，熱燙的注在米飯上，再灑上炸得香口的脆米，口感豐富，湯底清甜，這個「單尾」吃得令人心花怒放。
香芒凍布甸
作為壓軸甜品之一，份量是否大了一點？
可能近月芒果當造，成熟了的芒果肉又香又甜，唯一要挑剔，是魚膠粉稍微重手。
酥皮豆沙香蕉球
另一道是香蕉球，外層脆漿好薄，餡料香蕉肉加入豆沙，其實都幾甜，但好彩油份瀝得清，小小的一件，未算得過於甜膩。
Facebook : 帝京酒店
電話 : 2622 6161
味道 : 4 環境 : 4 服務 : 5
衛生 : 5 抵食
: 4 位置 : 5
如果喜歡這篇文章,請在我的專頁上剔“LIKE”,當是給我小小的鼓勵吧!謝謝!