還記得十年前的一個星期，跟幾位食友在聊天室吹水，說起鳳城的焗西米布丁，竟然一呼百應，即時相約午膳，事情當然不會就此完結，第二日大家正在回味之際，竟然又發起去另一間鳳城，可想而知，大家對「食」的熱衷。
早前跟幾位食友相約了九龍灣鳳城飯聚。
餐廳以順德菜為主，的確勾起了不少童年回憶，無他，因為老爸每逢喜慶日子，都愛選擇順德菜。
燉螺頭湯（$58）
以紫砂茶壺奉上，份量雖然較少，但每口都是精華，芳香醇厚，令人齒頰留香。
1954蝦多士（$40）
揉合了中西特色的蝦多士，麵包炸得鬆化可口，但略微過了火，蝦肉是預期的爽彈。
今次以順德菜主打，炸鮮奶（$68/6件）及野雞卷（$68/8件）是少不了。
原先要以水牛乳作料的炸鮮奶，今日已難求，但在大廚的巧手下，倒也似模似樣。
至於野雞卷炸得酥脆香口，雖然好邪惡，但偶爾一件都可以。
金皮炸子雞（$298）
選用新鮮雞，質素已勝一籌，炸得雞皮脆卜卜，而雞肉保持嫩滑，自己倒是食了不少。
孔融釀蟹蓋（$232）
溶化了芝士，烘得表面焦香，內裡是豐腴的蟹粉，都幾足料，喜歡蟹蓋的朋友，大可一試。
金叵蘿蟹鉗（$232）
很飽滿紮實，咬落彈牙，蘸點一下甜酸汁更吸引，不過都幾熱氣，真係一件起兩件止。
蜆介鯪魚球（$56/5件）
或者有人會怕蜆介的味道，又或是魚球有碎骨，其實只要懂得欣賞，自然感受到魚香及鮮味，至於碎骨的問題，食得小心一點就可以啦！
雞油豆苗（$128）
遇上當造的豆苗，用雞油炒翠綠幼嫩，超正。
杏仁茶（$36）
甜品是杏仁茶，好香杏仁味，甜度輕盈，好啱自己怕太甜既人。
係香港能找到食順德菜的中菜館感覺是越來越少，或者我們真的要好好珍惜這個飲食文化。
地址
: 九龍灣宏照道38號企業廣場5期MEGABOX7樓6號鋪
電話 : 39052299
味道 : 3 環境 : 3 服務 : 4 衛生 : 4 抵食 : 4 位置 : 3
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!