說起來，又是跟 Staycation 有著千絲萬縷的關係。
早前入住鴨脷洲兩日一夜本土遊，壓軸一餐就係「澄海小館」。
話說跟食友C小姐相識都有6，7年，近年對方淡出飲食界，之後偶爾都會相約敍舊，但近一年來先後約了好幾次，都因著不同原因取消，想不到就在「澄海小館」門前相遇。
難得踫到，即約飯聚。
「紅花會」並非「反清復明」組織，裡面亦唔會有陳家洛、文泰來同駱冰，而係一間位於商業大廈內既餐廳。
餐廳主打川菜，座位間非常寬敞，不單有卡位，亦有私人廂房，感覺良好。
由於早到，兩個人隨意找了個靠窗的4人卡位，相當舒適。
望望餐牌，午市套餐兩位用都不過$248，就算連茶芥加一都不過$300左右，每人不用$150，真係好抵食。
前菜共有三款，「香油萵筍絲」幾清新爽朗；「椒汁鮑魚」西芹好脆嫩，但鮑魚切成超薄片，而且份量稀少；「麻辣豬耳絲」陣陣辛香又爽脆。
再來是一碗火喉十足的例湯。
至於主菜先有「紅花水煮魚」或「老壇酸菜魚」（桂花魚或海沙巴）二選一，C小姐之前試過水煮魚，今次就轉點酸菜沙巴魚。
一上檯，便知道份量十足，酸度與辣度都比較輕盈，魚肉燙得嫩滑，以$150一位的價位，個人覺得CP值相當高。
另外仲有兩道主菜，包括「麻婆豆腐」及「乾煸四季豆」。
麻婆豆腐帶濃油赤醬的氛圍，辣度屬BB級，用來伴飯一流。
至於四季豆雖然未至於乾身，但食落惹味，又係好啱伴飯。
單尾是「XO醬海皇炒絲苗」，餡料有蝦仁、菜頭及帶子，飯粒尚算乾身，而且加入蛋花，可說是有誠意的出品，絕非求求其其兜兩兜炒埋一碟就算。
百零蚊，仲要有甜品，雖然「金絲棗蜂蜜黑糖糕」每人只得一件，但熱辣辣之餘，咬落煙韌，甜度恰好，正。
連埋甜品足足有9樣食物，加上咁既環境，性價比真係無得輸。
地址
: 灣仔謝斐道303號凱聯2樓
電話 : 27223412
味道 :
4 環境 : 4
服務 : 4 衛生 : 4 抵食 : 5 位置 : 4
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!