就趁著係酒店 Staycation，返正都要食飯，倒不如退房後食埋 Lunch 先走。
之前兩餐都係 Café Circles 解決，今日就轉食中餐。
「如粵滬」已光顧多年，第一次就係同 PJ 拜年食飯。
最衰係有「限聚令」，否則一定會 call 埋 PJ 開餐。
「薑蔥龍蝦生麵」（原隻），原價$368，優惠價$240，龍蝦肉吃得出的新鮮，而以往多數是伊麵底，轉作生麵口感更爽，龍蝦汁亦掛在麵身，但略嫌有少許鹼水味，但整體CP值是高的。
「廣式片皮鴨」（一食），原價$488，優惠價$198，就算想變成兩食，都只不過另加$100，以酒店菜館而言，實在相當相宜，難怪是日差不多每檯都有一隻。
鴨皮是即場割開，用熱辣辣的「麽麼皮」包起，放些少京蔥同青瓜絲一齊食，陣陣鴨香，真是人間美味。
每次造訪都會點鳳梨咕嚕肉（$148），因為有水準，外層咬落微脆，甜酸汁來得自然及平衡，而且醬汁不會太多，好味。
而湯品就選了「天然人參響螺燉烏雞」（$168）及「花膠筒響螺爵士湯」（$168），前者燉至人參都變得軟稔，甘甜味都跑到湯裡，入口陣陣醇厚甘香，超正；而後者亦不示弱，花膠筒同樣軟滑，響螺的味道與湯水水乳交融，加上蜜瓜的清香甜美，係中秋時分，起了滋潤作用，真係好啱太太。
好喜歡係餐桌上加碟菜，今次就點了「啫啫蝦乾蝦膏唐生菜煲」（$138），蝦乾好大隻，味道濃郁，而且蝦膏落得重手，所以幾鹹下，真係要叫碗白飯伴食。
今次亦點了非常考火喉控制的「桂花蟹肉炒粉絲」（$168），完全無令自己失望，乾身、鑊氣、蛋香樣樣俱全，加些少XO醬仲惹味。
甜品分別點了「楊枝甘露」（$48）、「栗子蓉西米焗布甸」（$48）及「香芒凍布甸」（$48）。 楊枝甘露是預期的味道，清香縈繞；栗子蓉西米焗布甸熱辣辣的，甜美滑溜；而香芒布甸賣相別出心裁，尤其是底部軟綿綿的，相當討好。
整體菜色紮實，光顧了這麽多次，從來沒有失望過，加上近排有優惠價，就更加抵食，難怪現場有好多街坊。
Facebook 專頁 : L’hotel
Nina et Convention Centre
地址 : 荃灣楊屋道8號香港如心海景酒店暨會議中心7樓
電話 : 22802923
味道 : 4 環境 :
4 服務 :
4 衛生 : 4 抵食 :
4 位置 : 4
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!