話咁快又到新年，有無諗過去邊度食團年飯？
家陣有個上佳推介，位於旺角火車站旁邊既帝京酒店帝京軒，除了搭飛機同船之外，地鐵、小巴及巴士都係附近有落，超方便。
老實講，當年老媽未遠去時的生日飯及自己的結婚周年紀念，都曾在帝京酒店慶祝。
大家都知我係澱粉怪，食自助餐都可以「對」兩碗粉，今次餐廳推出全新菜單，而且以「米」作主題，真係好少見，又睇下佢有乜攪作？
DKH 御米,暖饌 :
乳豬芽米珍珠御結. 海老鹽咱家米豆腐.
米皇人參小籠包
選用北海道夢美人米，以乳豬皮做壽司真係第一次見，效果又不錯喎；至於豆腐望落似椒鹽炸豆腐，但內有乾坤，原來加入了咸蛋黃，又真係估你唔到，而且配以櫻花蝦鹽，多了一份香脆的口感；小籠包皮夠薄，輕輕夾起柔韌而不破，放上一小片鮮人參，多了一份甘甜的感覺。
DKH 御米,暖饌 :
富山白蝦鮮奶米盞
白蝦一向是日本菜的食材，今次混和在炒鮮奶當中，很有賽螃蟹的風味，而置底的米盞，脆卜卜之餘，絲毫不覺得油膩，不知不覺地消滅了。
DKH 御米,暖饌 :
甘蔗雪梨麥冬燉桃膠
好一道素菜湯，全新的配搭，有神來之筆的感覺，清潤，甜中帶微酸，令人有生津解渴的作用。
DKH 單點菜式 :
胡椒忌廉汁珍寶蝦球
蝦球中已褪穀，體形又大，咬起來啖啖肉，質地爽彈，醬汁略嫌胡椒味未夠重手，但都幾甜滑，不錯。
DKH 單點菜式 :
金牌黑豚又燒
叉燒是自家出品，蜜味重，而肉質有嚼口，其實好啱送白飯，但望下餐牌，單尾竟然有兩款飯，唯有忍手，不過我想講句，我真係食得落架！
DKH 單點菜式 :
拔絲菠蘿咕嚕黑豚
甜酸汁推得幾好，至少碟底沒過多醬汁留下，黑豚肉有點脆口，但切得太薄，如果厚肉些少，效果會更好，不過都好啱送飯。
DKH 御米,暖饌 :
酒糟米香煎農場雞
酒香四溢，而雞肉嫩滑，又好入味，只可惜得兩件，真的不夠呀！而伴碟的花生芽同栗子，扣得入味又粉糯，好味。
DKH 御米,暖饌 :
砂鍋古法雙冬羊腩
秋冬時節，當然少不了一鍋羊腩煲，雖然羊腩夠羶，但可以炆得耐少少，因為個人偏好肉質較稔，太太就最喜歡食周邊食物，枝竹、冬菇、生菜同馬碲真係食不停口。
DKH 御米,暖饌 :
米湯海帶甜薯菠菜苗
係時候清清味蕾，米湯本身帶少許甜度，加上甜薯，配搭很有趣，菠菜苗選得好，嫩綠無渣，就連湯水都可以飲埋。
DKH 御米,暖饌 :
蝦乾臘味白鱈魚燉飯
單尾有兩款，先是用上龍蝦湯去煮北海道夢美人米，真係份外覺得矜貴，白鱈魚肉質嫩滑，卻又有蝦乾及臘味的嚼勁，層次分明，而且好豐腴的口感，其實都幾飽肚。
DKH 單點菜式 :
生炒臘味糯米飯
係講求速度及回報率既氛圍下，可以食到生炒糯米飯既地方真係少之又少，大廚竟然肯花時間去煮，誠意度十足，臘肉切得夠碎，吃起來更具嚼口，煙煙韌韌的，吃得稱心滿意。
DKH 御米,暖饌 :
南瓜芽米露,椰芒軟米糍,玫瑰米茸布甸
三款甜品賣相簡單，但都比較小巧，南瓜芽米露幾甜滑；軟米糍煙煙韌韌；玫瑰米茸布甸最得我心。
想不到，單是用米這個常見的食材，能有這麼多的變化，或者這個團年飯，又多了一個選擇。
Facebook : 帝京酒店
電話 : 2622 6161
味道 : 4 環境
: 4 服務
: 4 衛生
: 5 抵食
: 5 位置
: 5
: 4 服務
: 4 衛生
: 5 抵食
: 5 位置
: 5
如果喜歡這篇文章,請在我的專頁上剔“LIKE”,當是給我小小的鼓勵吧!謝謝!