坊間有不少 Buffet 都標榜食品款式多又好，但真正實至名歸的可不多。
Cafe Kool 可說是其中一間值得推薦的自助餐。
若果不是出色，親友訂婚時的私下宴會，都不會選擇 Cafe
Kool 吧！
說起來，對上一次造訪，已經是大半年前的事，當日是以韓牛作主打，而今次卻是換上了更具瞄頭的即劏吞拿魚。
環顧香港的 Buffet 界，如果不是有相當客源，試問誰敢引入原條吞拿魚？成本之高，可想而知，沒足夠客人，莫說是賺錢，要回本都有難度。
即劏原條吞拿魚
以往只會在高級日本餐廳先可以品嚐到的刺身，家陣每逢星期五、六的晚上六時四十五左右，便會由副主廚 Byron
Lee，即劏原條吞拿魚，而且客人可以即場享用，如果係專門店食，點都要三幾百，新鮮貨色果然正，肉質柔軟，魚味香，所以絕對係回本位。
生蠔
餐廳選用法國生蠔，而且是即開，每次三隻，正好保持新鮮，蠔身比較狹長，但食落蠔味不俗，當然要試。
Seafood
首選及受歡迎當然是任食半開波士頓龍蝦，好多都是滿膏，夠晒邪惡。
另外，更有東風螺、藍青口、鑽石蝦、皇帝蟹、鱈場蟹腳、蜆、藍蟹及麵包蟹，尤其是近年 Buffet 大熱麵包蟹，又是海鮮迷回本位，加上是選用獲海洋管理委員會認證的優質可持續海鮮，當然值得投以信心一票。
刺身
除了即劏吞拿魚係刺身迷必食之外，個人首選少見既比目魚邊，魚味香濃，超正；另外，更有三文魚子、八爪魚、魷魚、北寄貝、油甘魚及三文魚，自製一個刺身併盤已經值回票價。
點心
大堂一角有點心區，不論叉燒包、冬菇雞肉餃及素菜餃都係熱辣辣，包保新鮮。
再加上第一次出現既蒜蓉蒸海鮮，陣容不可睇少，龍蝦、花蟹、帶子、海蝦及蜆，全部用蒜蓉蒸，所以好惹味，但部份蒸得太耐，所以有點韌。
燉湯
想飲靚湯就要搵，因為椰子蟲草花燉排骨湯正正放係點心區，睇漏眼隨時忘記飲，加上好清甜滋潤，千祈咪走寶。
另一款忌廉蘑菇湯，質地綿滑，不錯。
串燒區
有原隻燒雞翼、雞肉串同牛肉串。
而旁邊是即炸海蝦天婦羅同野菜天婦羅。
Carving Station
Prime Rib取中間位置，肉質嫣紅帶血絲，肉味夠濃又有嚼口，正。
但反而無試麵包三文魚及香煎鱸魚，點解？因為太多野食嘛。
灼料區
又係一個必食位，喇沙湯底比上次更濃稠，辛勁更強，麵底有四五種，但個人心水係上海麵，因為可以蘸滿湯汁，生麵怕有鹼水味，影響口感。
配料當然要龍蝦鉗、蝦仁同白魚蛋，尤其是魚蛋彈牙有魚味，絕非求其貨色。
熱葷
若果大家胃納仲有空間，可以花少少試下熱葷，因為有北京烤鴨、燒肉、清蒸海班、辣酒東風螺、香菇鴨掌、炒海鮮及冷盤燻碲。
咖喱區
印度酸辣灌湯脆球
首次係自助餐內見到，非常有趣，建議大家先挑選一個脆球，然後挖穿一個洞，再按喜好放入鷹咀豆、乳酪、薯仔粒，香草或辣汁，一口吃下，味道非常特別又好玩，值得一試。
叫得咖喱區，當然不會得三幾種口味，印式羊肉咖喱印式咖喱蝦、雞芯豆咖喱、印式烤雞、印式薄餅、印式雜菜卷、印式烤魚及印式羊肉卷，味道正宗，款式又多。
東南亞食品區
又是一個絕對少見既美食區，內裡已包含馬來西亞及泰國地道菜色，有馬來炒麵、巴東雞、巴東牛肉、辣椒炒鮮魷、脆香鯰魚、泰式辣雞與及泰式咖喱鴨。
芝士
一般自助餐，都會提供芝士，但多數得三幾款，Cafe Kool 卻有Manchego、Cambozola、Taleggio、Edam Cheese、Brie Cheese 及 Chaddar Cheese，芝士迷應該收貨！
沙律
沙律吧的選擇是出奇地多，除了自家製沙律外，更有不同地區風味沙律，算起來，有雞心豆秋葵茄子沙律、希臘沙律、吞拿魚沙律、泰式海鮮粉絲沙律、印度薯仔沙律、泰式青木瓜沙律、煙三文魚、辣青瓜沙律及坊間少見既加多加多沙律，愛健康的朋友今次真是心心眼。
Cold Cut
有莎樂美腸、巴馬火腿、獵人腸及意式火腿。
甜品
一向會推介雪糕，但今次忍不住，先講梳乎厘班戟，蛋白撥打得鬆軟香滑，客人又可以隨心水，灑點綠茶粉，又或是果漿，難怪整晚都是人龍，建議大家海鮮可以放低一陣，反正 refill 好快，以免最後排餐曚！
另一亮點是今川燒，有三種味道，個人較喜歡雲呢拿味，外層有點煙韌，而內裡香滑，好味。
Buffet 尾段，又係圍攻甜品的時間，甜品櫃有杏仁朱古力撻、芝士蛋糕、荔枝奶凍、栗子塔、大黃草莓慕絲餅、椰汁杏汁西米杯、焦糖燉蛋、桑梅泡芙及榴槤慕絲。
甜品太多，當然無可能試得晒，個人推介荔枝奶凍同榴槤慕絲，甜美滑溜，尤其是榴槤慕絲，跟坊間另一名店Buffet 毫不遜色。
雪糕不單是品牌Häagen-Dazs，而且有朱古力、咖啡、芒果雪菓、士多啤梨芝士餅、焦糖脆餅、芒果、雲呢拿、士多啤梨、香檸雪菓、Tiramisu及紅桑子雪菓，口味勁多，食幾款已經好夠。
當然會有小朋友最鍾意既白朱古力噴泉，可以用水果或綿花糖蘸點，有得食有得玩。
另外，喜歡甜中帶清新的有焦糖菠蘿、焦糖蜜桃及雜果蛋糕。
整個自助餐變化多端，同樣是印度菜，已經有脆球，刺身更是原條吞拿魚即劏，仲有即製甜品，難怪整晚爆滿，真是不無道理。
Facebook 專頁 : Kowloon Shangri-La, Hong Kong
地址 : 尖沙咀麼地道64號九龍香格里拉大酒店閣樓
電話 : 27338753
味道 : 4 環境 : 4 服務 : 4 衛生 : 5 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝！