尖沙咀酒店林立，每間都有 Buffet 提供，想找一間有水準的不難，但性價比要高，食物有質素的，自然會貨比貨。
前身是日航酒店，現已改名千禧新世界酒店內的 Café East，在裝修前跟家人慶生，一行十幾人食得開開心心，印象猶新，月前重開，當然要走訪一次，看看能否保持水準，下次再有慶祝活動時，又可以拉隊。
裝修後，座位的數目變化不大，但拆除了部份裝飾，感覺開揚及舒適。
食物方面，擺放食物的地方略為增加，而當中有不少是即製，誠意十足，雪糕及甜品更精緻，既然有加自然有減，自助汽水及很有特色的薑拉茶消失了，有點可惜。
Seafood Platter
在原有的位置，擺放了波士頓龍蝦、麵包蟹、藍貝、翡翠螺、雪場蟹爪及凍蝦。
波士頓龍已開半，大部分都嫣紅的蝦膏，愛好豐腴口感的朋友可不要錯過，最難得是不斷 refill 不愁要爭食。
而麵包蟹可說是近年 Buffet 新寵，的確多了出現。
其他幾款海鮮的質素同樣不俗，值得一試。
湯
從未在 Buffet 中可以一次過遇上五款湯水，對於愛喝湯的我，真是兩眼發光。
單是燉湯已經有兩款，適合不同飲食文化的人士。
燉湯有蟲草花茶樹菇淮山紅棗竹絲雞瘦肉燉湯，淨係讀個名已經夠長，原盅隔水燉，湯色清澈，入口鮮甜，舌底生津，夠滋補。
另一款是牛展姬松茸紅棗龍眼肉燉湯，牛肉味濃香，飲完混身發燙，此刻想起都想再來一盅。
新加坡肉骨茶並非我喜好的馬來西亞風味，但其實味道幾正宗，略嫌胡椒未夠重手。
加上粉葛赤小豆豬骨湯及忌廉甘筍湯，每款都喝上了一碗或以上，結果整晚不斷穿梭洗手間。
熱葷
紅燒鴨掌北菇鮑魚
很傳統的喜宴菜色，原隻鮑魚超吸引，扣至入味，咬落煙韌，只可惜不見鴨掌，難道鴨掌比鮑魚更受歡迎？
黑椒牛柳粒
夠鑊氣，又不會炒至過火，入口仍感到有肉汁，好味。
清蒸海中班
足兩斤「條頭班」，蒸得啱啱好，魚肉剛離骨，肉質嫩滑，蘸少少甜豉油就更可口。
黃金蝦
牛油加咸蛋黃簡直是邪惡代表，但真係好香口，蝦殼脆卜卜，蝦肉口感豐腴。
生炒牛肉飯
炒得粒顆分明，油份不多，幾好。
蒜蓉粉絲蒸扇貝
偶爾都會在家煮的一道菜，其實主角反而係粉絲，沾滿了蒜香，真的非常惹味。
鐵板燒
一口氣要了澳洲和牛扒、挪威三文魚扒、紐西蘭羊扒與及牛油蒜蓉炒大蝦。
澳門燒秘製bb豬配葡國臘腸松子仁炒飯
原隻堂斬，熱辣辣皮又脆，豬油滲入炒飯令飯粒更添油香。
燒澳洲牛肉眼
見朋友切得大大塊，都忍不住切了一片，畢竟是以牛肉作主題，感覺特別好味。
西式主食仲有意式焗千層時蔬及黑松露白汁海鮮意粉，不過之前將食力都放入中菜，胃納有限。
秘製炸龍利柳
有時自己都會係屋企煎龍利柳，肉質幾嫩，又少碎骨，小朋友食好啱，試了一件都幾好。
熱葷仲有日式燒豬寸骨、香煎牛仔骨、關東煮牛肉、蜜汁燒雞飯、日式天婦羅及澳門煮大蜆湯，有港、澳、日風味，而且主打牛肉，所以都幾多牛肉菜色，牛魔王最啱。
在大堂一角有印度菜式，首選咖哩雞，不過真係幾辣，要有心理準備。
另外更印度雜菜咖哩、羊肉咖喱、黃豆咖哩、油酥餅及洋蔥蛋薄餅，可以一試。
至於日式關東煮，就最愛煮得夠稔及入味的蘿蔔，又甜又入口即化，太正啦。
刺身
有甜蝦、北寄貝、玉子、吞拿魚及三文魚，都屬於常見的種類，只挑了喜歡的甜蝦及北寄貝試試，解凍的過程處理得不錯。
甜品
明明係甜品專櫃，但竟然擺放了灌湯餃（芒果）、蝦餃（椰汁）、鮑魚（咖啡）及鵪鶉蛋燒賣（栗子） ，真係好奇怪！
原來全部都係甜品，論賣相部份像真度極高，凍凍地令人好開胃。
而甜品區每晚會係不同時段提供即製甜品，六點半自製曲奇、7點半葡撻半熟芝士撻及8點15分即焗梳乎厘。
講真甜品師好忙，因為仲要同時泡製斑蘭窩夫條同檳城薄餅，非常香脆又有特色，千祈唔好錯過。
雪糕則有哈根大師既比利時朱古力、紅桑子芒果雪條、冧酒提子、咖啡、紅桑子雪菓、意大利芝士餅、原味乳酪雪糕及芒果味，共8款口味，真係好難忍，點都要掃幾球。
再食多枝紅桑子芒果雪條，實在太滿足了。
其他甜品有紅桑子芝士餅、紐約芝士餅、朱古力芝士餅、藍啤梨芝士餅、焦糖芝士餅同雲石芝士餅，相信女士們既甜品胃先可以消滅呢！
P.S : 其實~薑拉茶，妳知道我在想妳嗎？
「 牛迷盛宴」自助晚餐
星期一至五）成人$538/位、6-12歲小童$268/位
（星期六、日及公眾假期）成人$598/位、6-12歲小童$318/位
Facebook 專頁 : Café East
地址 : 尖沙咀麼地道72號千禧新世界香港酒店1樓
電話 : 2313 4222
味道 : 4 環境 : 4 服務 : 4 衛生 : 4 抵食 : 4 位置 : 5
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!
新年快樂，祝日日有食神，金銀滿屋。
多謝妳,祝妳工作順利,身體健康~~^^