千呼萬喚，彷彿皇恩浩蕩下，美食車終於出爐。
面對諸多限制，未開始已經有人先勢頭不對，及早離場。
個人總係覺得陰謀論，求其比幾個鳥不下蛋的地方，等你班人蝕本到一個點，兩年後再無人敢入場，到時可以名正言順取消計劃。
講真吖 ! 游牧民族式開檔，放係海洋公園門口，遊客一到都飛撲入場啦，點會得閒食野，中環碼頭個位仲仆街，撞正大型活動，又擺放係死位，如非有心搵，根本睇唔到，講講下，都替美食車檔主可憐。
凍檸茶BB $28
飲落幾方便，因為用檸檬茸，又夠凍，如果可以自行加減甜度會更好。
潮州魚蛋麵 $48
魚蛋果然係店方名物，爽彈有魚味，但只提供幼麵，有些少鹼水味，畢竟係戶外，想用清水脫鹼有難度，不過在能力範圍內，已盡力交出功課，或者巧慮下轉食河粉，效果會更理想。
鹵爆茶葉蛋 $10 /隻
鹵得好入味，但又不會死實實，又頂得下肚，所以幾受歡迎。
是否西多士 $28
其實係沙律海鮮卷的變奏版，外層麵包炸得不油不膩，有種鬆化的口感，內裡可口，誠意推介。
炸一字雞翼 $1
大家無睇錯，的確係一蚊隻，但一次過要買八隻，如果買16隻既，要買一杯飲品，但都好相宜，所以買雞翼既客係未停過。
一口蠔丸
即叫即炸，熱氣直冒，咬開一半，內裡真的有蠔仔，童叟無欺，而且蝦膠混和墨魚丸好彈牙，加入了鴨蛋更是充滿潮汕風味，就算不蘸點醬料都問題不大。
文章出街日，美食車已轉移陣地去左灣仔金紫荊廣場，大家如果經過，不妨支持一下。
希望各位喜歡這篇文章的朋友，請在我的專頁上剔“LIKE”，當作小小的鼓勵吧!謝謝!