近年真係越發喜歡上深圳staycation。
無他，不單出入地點就腳，出入方便，酒店內餐廳性價比高，而且附近有好多特色地點，包保令人不會悶。
而且一橋之隔，兩日一夜幾時都可以成行，又有旅遊充電的氛圍，所以上個月又去了深圳一轉。
而今次就選擇了位於車公廟站的“金茂JW萬豪酒店”。
其實由車公廟地鐵站J1出口信步行過去，都不過是幾分鐘腳程，真係好方便。
大堂寬敞闊落，12條直通天花的燈柱別具心思，而且酒店內設有購物中心，的確好少見。
因為今次入住行政樓層，如覺得大堂多人 checkin，大可逕自上行政酒廊登記入住，大可順便喝上一杯休息一下。
因為今次早到，索性先行在中菜廳食午飯。
其實萬豪集團所有酒店都設有中菜館，香港、澳門及深圳都光顧過不少次，而香港金鐘的一間更是榮膺米芝蓮一星的名譽。
翻看餐牌，以酒店級數而言，真的一點也不貴。
既有廂房，食物選上了點心、蒸蟹鉗、鮑魚飯及燉湯，都是￥1000/位左右，比起那間從北京開過來，幾隻小龍蝦收我￥200的划算得多了。
食飽飽之後就可以取房，今次入住24樓的“ 開放式大床高爾夫景觀套房”，差不多有600呎，因為是假期，所以要￥1650左右，其實好視乎入住當天的日子，價格已包了行政樓層的飲品、簡單晚餐以及雙人自助早餐，如果想食得豐富一點的，又可以加錢享用晚上的自助餐，都是￥320左右，稍後再作介紹。
房間極之開揚，可以遠眺前方景色，床又勁大，兩個人點轉身都得。
梳洗間將廁所與沐浴間分開，就算兩個人同時使用都沒有問題。
酒店作為深圳旗艦店，設備當然齊備，露天泳池以及偌大的健身室，正好飯後活動一下，出身汗。
晚上就在酒店 Cafe Chinois 享用自助餐，人均大約￥360左右，平日更是低至￥320左右，而且非常有賣點。
因為是在星期六入住，所以一入門口已經見有即劏吞拿魚（只在星期五及星期六供應），係香港有同類級數，恐怕要作價$700以上，即時排隊取了大拖羅一碟，相信已經是一個勁正回本位。
再來是清蒸活海鮮，幾個大魚缸放滿了游水瀨尿蝦、花蟹、海蜆、加菲蟹同海蝦，全部都係即蒸。
仲未夠？沒問題，每位客人會另行送上一份海鮮拼盤，當中有龍蝦、生蠔、鮑魚及沙白，又係新鮮度爆燈，但服務員有提及國慶期間改供應時令大閘蟹。
如果係食肉獸，就一定要介紹熟成45日牛排，每份都是配上烤蒜子及肉汁，而且火喉控制得相當好，medium rare 的質感無可能不收貨。
仲有麻辣及蒜蓉小龍蝦。
加上熱葷以及大量甜品，豐富到極，比起香港好多酒店有過之而無不及。
飯後見有時間，就上行政酒廊飲返杯雞尾酒，睇下夜景。
見仲有時間，兩公婆拖下手，搭地鐵去福民站行下水圍夜市，其實真係不太明白，全世界都有小販夜市，就連北京都有王府井大街，香港就想搵條有特色夜市都無，老實講，我真係對廟街夜市提不起勁，反而水圍夜市既熱鬧，攤檔多又多完化，好玩好多。
返到酒店沖涼瞓覺，好好休息一晚之後，又可以落餐廳食早餐。
很開心有新鮮自助榨果汁，有人參果、橘子、甘筍及青瓜，大家可自行調製喜歡的口味。
再來碗粥、煎蛋、麵條及麵包，已經好飽。
雖然深圳金茂JW萬豪已經有一段歷史，但內裏設施卻絲毫不覺陳舊，中菜廳及自助餐有驚喜，出入又非常方便，放假充電不錯，有回頭再來一次的衝動。
酒店地址 : 深圳福田區深南大道6005號
電話 : +86 755 2269 8888
想知道更多深圳資訊 :
小紅書 : 美食焚化爐
IG : foodiephilip
希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!
