最記得起初寫深圳食評時，正值朗廷酒店開業，說起來都有一段日子了。
今次趁著囝囝外遊，見有時間就同太太走一轉，在繁忙中擠出一點私人空間。
酒店位於車公廟站B出口，只要往前直走大約10分鐘腳程就到，都幾方便。
而酒店旁邊就是超大型商場，仲可以由酒店專用通道過去，就算是下雨天都沒有問題，勁方便。
由於今次入住行政樓層，所以可以係22樓既行政酒廊 checkin，慢慢飲返杯茶，嘆下 free flow afternoon tea，重點係已經包含所有行政酒廊的飲食，當中值得一提係每晚都有駐場調酒師，調較指定的幾杯雞尾酒。
講返間房，我諗接近500呎，闊落而舒適，客廳、睡床及梳洗間各有不同的照明度，而叉電位亦充足，不愁沒地方餵飽手機同相機。
沐浴間有齊浴缸及企缸，如果浸浴更可以一邊睇電視，一邊享受。
至於窗外景觀雖然是樓景，但隔了一條大街，總算開揚。
而隱藏式酒吧櫃是另一亮點，可以自費飲用威士忌等烈酒，晚上來一杯也不錯。
見有時間，就去健身室活動一下，健身室設備齊全，亦有水及毛巾提供，好啱自己。
畢竟朗廷是大型酒店，當然設有室外游泳池，仲要是古羅馬式設計，亭台樓閣，按摩水池，游完水又可以曬下太陽，夠放鬆。
晚餐不假外求，就在酒店餐廳享用自助餐。
以前寫專欄都有試過講自助餐，當年部份五星級酒店可以用災難級別去形容，但朗廷酒店屬於大集團，質素是有保證的。
.jpg?ssl=1)
海鮮原以為只得扇貝、砂白、青口、熟蝦、花蟹及鮮魷，及後送來半邊新鮮蒸龍蝦，但可否早一點上檯，因為太太已經食得好飽。
起初都覺得有點奇怪，因為不見有刺身，及後送來刺身拼盤真的夠澎湃。
既有原隻開邊龍蝦，又有柔韌的鮑魚，加上希靈魚、吞拿魚、三文魚及魷魚片，質素真的不錯。
當以為一切平靜下來，又來一碟香煎鵝肝，老實講，又真係幾飽。
因為之前要了深圳自助餐常見的一人火鍋，配料不單有肥牛，仲有海蝦、新鮮黑柏葉同鮮魷，蔬菜更加不用說的多，就連湯底都有麻辣與清湯供選擇。
加上個人推薦的焗蠔、每天不同的燉湯、即煮新加坡喇沙以及麻辣龍蝦仔，足夠了吧？
甜品是強項之一，種類多而且精緻，Panna Cotta、馬卡龍、芝士蛋糕、曲奇、慕絲及雪糕，總有合大家心意的。
水果除了常見的西瓜及哈蜜瓜外，更有熱情果及火龍果，愛健康的朋友最開心。
餐後再上22樓飲返杯酒，睇下繁華的夜景，帶著少許酒意去睡真好。
而第二日一覺醒來，當然是嘆返個靚早餐。
在行政樓層與自助餐之間選擇了食得較精緻的。
餐牌選擇不多，但質素好，尤其是班尼廸的流心效果，比起好多有名餐廳還要好。
中式粥品是廣東開花米粥，煮得好綿滑，但腐竹稍微重手。
排骨麵亦好惹味，而沙律、甜品、水果、飲品及奶類都是free flow 的，不錯。
食飽飽當然係去做運動，而午餐就在大堂的Palm Court，高懸的燈飾、柔和的光線寛敞闊落的座位，安寧寍靜的空間感，令人身心都放鬆了。
至於餐廳有什麼推介？
下次再同大家分享！
酒店地址 : 深圳福田區深南大道7888號
電話 : 00 86 755 8828 9888
想知道更多深圳資訊 :
小紅書 : 美食焚化爐
IG : foodiephilip
希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!