聖誕過後，又要倒數，因為好快又會過新年，大家有無諗過食乜慶祝？
聖誕節就話食自助餐，新年我諗好多人會想食中菜，加上近排凍凍地，最啱食煲仔菜同煲仔飯，包保食完成個人暖笠笠。
沙田帝都酒店玉庭係我幾欣賞的一個中菜廳，上次外傭要回鄉，我都特意係玉庭擺一圍同佢餞行。
餐前先飲盅火喉十足既菜膽杏汁豬肺燉花膠湯（$188/位），湯呈奶白色，入口醇香滑溜，豬肺跟白菜同樣燉得夠稔，跟上年係西灣河一間所謂街坊名店（絕不便宜），個豬肺竟然係勁韌，只係煮熟就算，杏仁渣多多的豬肺湯，簡直是天堂與地獄的感覺。
古法雙冬扣羊腩煲（$498）
家陣正值食羊好日子，大廚找來黑草乳羊來炮製羊腩煲，不單烹調時間可以縮減，而且肉質幼嫩，醬汁以竹蔗、冬菇、馬碲、竹筍、柱候醬及腐乳等熬煮而成，個人最鍾意食羊肉加埋腐乳一齊食，真是人間美味。
豆豉金蒜生啫大鱔煲（$338）
個人好怕鱔肉有泥味，大廚以豉汁先行醃過鱔片，然後以薑蔥芹末置底，連煲一齊焗，上檯前再沿邊灒酒，令鱔肉泥味盡消，而且口感Q彈，滋味無窮。
桂花蟹粉蟹肉銀絲煲（$338）
好少係係煲仔菜食到桂花蚌，但更意想不到爽彈的口感與鮮甜的蟹肉沒違和感，粉絲沾上蛋漿及蟹粉，增添了層次感。
椒香黃油雲南姬松茸虎蝦（$298）
虎蝦先經牛油煎過，所以蝦殼好香脆，而姬松茸沾上了蝦汁，亦變得好惹味，就連配角的彩椒都不能錯過。
蘿蔔栗子蜑家雞煲（$268）
其實似濃雞湯，但加入了砂白，多了一份鮮味，褪骨雞肉好啱懶人，而魚肚爽口之餘，蘸滿了湯汁好啱我胃口，蘿蔔切成細細粒容易入味，真的食了不少。
食完煲仔菜，轉頭就食煲仔飯，今次仗著人多，先後點了三款，叫得煲仔飯，飯底一定要焦香而不過火，有時候踫上燶底，令飯粒變苦就真失敗，但今次幾款煲仔飯都展現出大廚在掌火上的功力，超正。
原隻鮑魚海味佛跳牆煲仔飯（$468）
矜貴版煲仔飯，鮑魚、海參、元貝及花膠舖滿了煲面，但又扣得軟稔，飯底混和了醬汁，食落有點似福建炒飯。
法國鵝肝波士頓龍蝦煲仔飯（$498）
另一個矜貴版煲仔飯，以原隻龍蝦及鵝肝作主角，油脂豐富的鵝肝混和飯中，又是另一種滋味，而龍蝦亦焗得肉質爽彈，不錯。
南安油鸭髀臘味煲仔飯（$258）
三個煲仔飯中，大家不約而同較喜歡傳統風味的油鸭髀臘味煲仔飯，尤其是油份滲入飯粒，飯粒香氣撲鼻，多年來點食都不會厭，有時候覺得比臘味更吸引。
所謂［無雞不成宴］，同行朋友基本上無雞不歡，今次就追加了炸子雞，$228(半隻)/ $456 (全隻)。
先講雞皮，可以話薄而脆，就連雞胸位都肉嫩，水準好高，真心推薦。
薑茶銀耳燉金薯（$48）
就算是中菜，以甜品壓尾是常態，蕃薯同雪耳煲得夠稔，入口即化的感覺，薑味亦夠辛勁，甜度啱啱好，我鍾意。
香芒糯米卷（$48）
糯米搓得軟熟，外層灑上椰絲，中間芒果肉芳香馥郁，必食。
Facebook 專頁 : 帝都酒店
地址 : 沙田白鶴汀街8號帝都酒店1樓
電話 : 26943939
味道 : 4 環境 : 4 服務 : 5 衛生 : 5 抵食 : 4 位置 : 5
IG : foodiephilip
小紅書 : 美食焚化爐
希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!