近日風起，所謂不時不食，家陣不外乎大閘蟹、蛇、鵝同羊腩煲。
如果有間餐廳可以提供兩款時令菜色，係咪加倍開心呢？
近日九龍酒店龍逸軒就正正推出大史蛇羹套餐以及大閘蟹套餐。
今次仗著人多，就兩個餐都點了。
大史蛇羹套餐（$2388/四位起，需兩天前預定）龍逸軒小食
酒醉鮮鮑魚 百花釀秋葵椒鹽銀杏 鎮江肴肉
先來四款小食，包括了酒醉鮮鮑魚、百花釀秋葵
椒鹽銀杏以及鎮江肴肉。
鮑魚Q彈有嚼口、秋葵健康又不油膩、椒鹽銀杏佐酒最啱，而肴肉是水準之內。
太史燴蛇羹
每年只會係同樣季度先食，蛇肉切得好幼細，湯底亦火喉十足，鮮甜到一個點，下點薄脆、檸檬葉絲同白菊花瓣，多添了一陣芳香，美味。
海斑兩食
再來是沙巴海班兩食。
翡翠陳皮炒海斑球
先是簡單的菜芯炒班球，菜芯選得好，夠嫩綠，而班球經猛火爆炒，亦滿有香氣。
蟲草花蒸斑頭腩
兩食另一款是蒸班頭腩，火喉啱啱好，肉質嫩滑。
古法羊腩煲配唐生菜
其實今次個人最想食既，除了蛇羮外，就係羊腩煲，龍逸軒講明用新鮮羊肉，肉質一定最佳狀態，蘸點腐乳食無得輸，加埋生菜，沾上了羊肉汁惹味到極，超正。
生炒臘味糯米飯
無理是否真係生炒，很喜歡煙韌的口感，加埋每口都有臘肉粒，油香滿滿，深秋時分來一碗真好。
冰花雪耳燉萬壽果
甜品是滋潤的冰花雪耳燉萬壽果，木瓜燉至軟稔，雪耳爽彈，甜味都跑到水裡去。
流沙奶黃煎堆 燕窩鮮奶燉蛋白
再來是拎上手仍覺熱的流沙奶黃煎堆，咬開時流出熱燙的流沙餡料，又是美味之作，而燕窩鮮奶燉蛋白質地輕盈，與煎堆是一剛一柔的組合。
蛇羊相拼之後，當然係近日大熱既大閘蟹啦！
《以蟹會友》大閘蟹套餐（每位$980/兩位起，當中已包括加一及茶芥，但須三天前預訂）
蔥油海蜇頭、蜜汁西班牙叉燒
海蜇口感爽脆，仲要有蔥油香，正。
叉燒是店方名物，多年來保持水準，夠稔蜜味重，又有嚼口。
蟹粉小籠包
大閘蟹宴中未必係主角，但作為綠葉，蟹粉小籠包一定會出現，夾起包皮沒有穿破，咬落肉汁豐盈，味道又鮮。
清蒸太湖大閘蟹(每位一隻約六兩)
老老實實，近日食過多間餐館，一般都係五兩以內大閘蟹，而龍逸軒竟然用到六兩，又真係幾癲。
無須多講，夠大隻拆蟹都易些少，肉都多幾錢食，整隻拆開再一次過食，滿足度爆燈。
唐生菜刺參扣鵝掌
好有宴會菜的氛圍，原條刺參既大條又夠稔，非常滋補，而鵝掌亦無須大力咬，輕輕用力就可以食到，毫不費勁。
蟹粉扒山水豆腐
真係好澎湃，蟹粉完全蓋過了豆腐，豐腴的口感與滑溜的豆腐好匹配。
紅酒燴牛尾
記得用刀叉享用，牛尾炆得好稔，濃郁的味道，濃稠的醬汁，真係好適配返碗白飯。
蔥花瑤柱蛋白炒飯
炒得非常乾身，蛋白包裹了飯粒，散發陣陣蔥花香氣，有水準。
薑茶湯圓
食大閘蟹又點可以無薑茶呢？
不過個人偏好重口味，龍逸軒的辛勁比較輕盈，相信比較啱女士。
杞子桂花糕
另外就是清甜芳香的杞子桂花糕。
今次可以一口氣食均蛇、羊及蟹，如果可以加埋燒鵝就真係大四喜！
Facebook專頁 : The Kowloon Hotel
地址 : 尖沙咀彌敦道19-21號九龍酒店2樓
電話 : 27343722
IG : foodiephilip
小紅書 : 美食焚化爐
味道 : 4 環境 : 5 服務 : 5 衛生 : 5 抵食 : 4 位置 : 5
希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!