早前同太太入住了近羅湖關口的香格里拉酒店，食住都不假外求，除了晚上自助餐外，第二的午餐就約了深圳好友C小姐係香宮飯聚。
估不到早上仍陽光普照，近中午竟然落下傾盤大雨，好彩身處酒店，而且行地下通道過關口好方便。
雖然餐廳有任食點心，但兩位女士都偏向食飯，所以各自點了一些。
瑤柱灌湯餃（￥42）
一向都鍾情懷舊式灌湯餃，不過就算係香港都好難搵到，深圳就更不在話下，家陣多數係浸餃，過多幾年，恐怕連浸餃都給時間湮沒了，所以能享受就要及時。
呷一口湯底，味道鮮甜，內裡是竹笙、瑤柱及菜膽，加點浙醋味道更鮮，好味。
水晶蝦餃（￥52/3件）
上次幫網頁寫點心，結果好多名店都食到一頭煙，各有不足，既有畫蛇添足，又有偷工減料，其實簡單扎實已經好足夠。
香宮的蝦餃見功夫，餃皮通透見蝦肉色，摺紋亦至少十摺以上，蝦肉爽彈，有水準。
上湯小籠包（￥48/3件）
始終是傳統點心，失手機會好少，包皮不會太厚，夾起亦沒有破穿，豬肉是吃得出的鮮味，簡單但滿意。
流沙豬仔包
賣相絕對比得上香港，撕開兩半是熱燙的流沙餡料，豐腴口感，皮包軟熟，不錯。
奶皇芝士荔枝球
望落真係好似一顆荔枝，彈牙的蝦膠內是奶皇及芝士，有心思的菜色。
蜜汁蒜香骨
畢竟是高級中菜廳，對賣相有要求當然是正常，以挖空的彩椒作器皿，添加了色彩，排骨炸得酥香入味，令人突然間好想配杯啤酒。
海皇冬瓜盅
勁足料，鮮蝦、帶子、班片及蓮子等等，湯底清鮮甜美，整個冬瓜盅燉得夠稔，就連瓜肉都能輕鬆刮下，大熱天時消暑一流。
燒椒鵝肝
有種中西融合菜的氛圍，煎香的鵝肝外層微脆，內裡軟綿，滿是油香，置底是中菜常見的椒粒，以辛香來平衡油膩的口感，又是一個不錯的體驗。
鮮鮑拼青芥蝦球
一次過品嚐兩款海鮮，真好。
鮮鮑以醬燒方式處理，柔韌有嚼口，而且好惹味。
蝦球加入芥醬，多了一份辛香，仍無損蝦肉爽彈的質感。
酥薑蜜汁桂花脆鱔片
傳統懷舊菜，鱔片肥大肉厚，選得好，外層包裹了蜜汁，咬落有微脆的口感，而且甜美中有桂花的香氣，用來佐酒好啱。
始終都係酒店中菜廳，有一定水準，屹立了30年，總有原因。
酒店專頁 : Shangri-La Shenzhen
Facebook專頁 : 深圳羅湖香格里拉酒店
酒店地址 : 廣東省深圳羅湖區建設路1002號
電話 : +86 755 8233 0888
想知道更多深圳資訊 :
小紅書 : 美食焚化爐
IG : foodiephilip
希望各位喜歡這篇文章的朋友，請在我的專頁上剔”LIKE”，當作小小的鼓勵吧!謝謝!